Cɛɛŋɔnnda Yeremi lan 1 - BII BILA

Yerusalɛm muungu maa vanalanɔ pɔnɔɔ ndɔ vi mó va o malnanndo-o

¹ «Éé vannda! Kobi vannda va hoo icali nin sɛ́lɛ́ bɛndoo-o lo hau ndu pilɛ kpé. O muungu maa vanalanɔ pɔnɔ ndɔ vi-o. Ndu óò hiow tɔ́ɔ́ a kobila tɔ̀lan o lɛŋii vanaa mangaa isɔɔa tɛɛn ni. Ndu nda tundu hau baala lecɛo tosaa nuaa ni.

² Lɔan pii, o co caŋndo. Kuulan la liva ndu yɔ́-yɔ́ a mɛmɛan, vanaa ndáà yeema ndu pandu-a kpow, o kɛ́-kɛ̀ co yiyan le ndu ɲɔɔloo le. Caaŋaa ndɔa kpow a hui ndu, má siŋnun yaamɔaa ndɔa.

³ À kɔɛ a polale Yuda len o cɛlen nin, má luei nda mɔnɛi. À co o baala kálà-kálà lecɛo nin. À co icali vanaa-mangalaa-isɔɔa tɛɛn, pɛngi bɛɛ co le nda le, yaamɔaa ndaa kpow a bii nda. À cal o mɔnɛi nin.

⁴ Dɛnɛ palaa tol nɛila kɔɛ Siɔn-ndan coo. Kani vana co lɛ hunɔɔ lon o kafolan te. Koŋnda Siɔn-ndan kpow la Siɔŋ. Vanaa-solia-lasálàà ndɔa co cɛɛŋɔnndo. Cuaambɔa lemboa ndɔa co a kɔl tambɛi bɛndoo. Mɔnɛi ndɔɛi co ibɔɔ dɛ!

⁵ Yaamɔaa ndɔa nɔla ndu, a connun o kɔlɲuloo nin fɛɛ. Mí Mɛlɛka tuisi ndu dɛnɛ palaa coo, le hakila ndɔla bɛndulan. Yaamɔaa ndɔa kɔɛ a poaa ndɔa o biyɔɔ nin.

⁶ Biilu va le kobio Siɔn-ndo hɛlun ndu. Vanaa ndɔa bɛndua muungu maa kialaa co lɛ bil diaa saalɔn te-a. A co kiltan doosunɔ laci, kɛ hali yoomulen, a nɔ len te.

⁷ Telen Yerusalɛm va o siɛmbulan nin mó va kelan fondoo-o, mó loonun a ɲɛm sɔvɛn ndóò nɔ kabi paandu-on kpede. Telen yaamɔɔa bii vanaa ndɔa vana-vana ve le nda mala loo, mí yaamɔaa ndɔa kan va ndu tofaa, má ndu mamɔɔ le tambii ndɔɛi.

⁸ Yerusalɛm vangala hakila ndɔlan taw, lelan o siŋnun ɲɛ nɔɔlɛiyo ni. Vanaa va ndu bɛɛlen keo-va kpow a kelun ndu yii le tùú nda ce ndu tum fondo-o. Ndu pila co ŋɔɔcanndo mó va hɔlla vionɔɔ.

⁹ Nɔ́ɔ́ dɛnɛ nɔɔlɛi ndɔɔ co ndu o domaa. O ve kɔl o ɲɛ va ndu hunɔɔ komal-lo le. Mí delɔɔ ndɔɔ dɔaw ndu kɔndɔfili. Nduyɛ vana-vana ve le ndu ɲɔɔlu le. Mó dimi aa: ‹Éé Mɛlɛka! Tofa vɔ siɛmbula ya co nin-ndan, bau yaamɔɔ nuu nɔla ya.›

¹⁰ Yaamɔɔ handu baa o ɲɛm ndɔn sɔvɛn ndóò nɔ-on kpow coo. Hali vanaa-mangalaa-isɔɔa, à nɔm óò kuuna luɛyɔɔ vanaa nɔmnda tɛɛn-nda, mó ca nda luɛyɔɔ o Cɛi nɔm diandaa nin.

¹¹ Vanaa ndɔa kpow a co kuŋndan, a co ɲɛdiaa nuwviaa. A cii vannda ɲɛm ndan sɔvɛɔn yɔngu le ɲɛdiaa sɔlaa, le mɛɛ nda sɔla yoomuan yɛ. Mó piɛi Mɛlɛka nuaa aa: ‹Éé Mɛlɛka! Tofa vɔ, mà ce mɛɛ ya tambu labɛɛ yɛ!›

¹² Niaa Sei! Niaa vanaa co haa hiovɔɔ-a, la tofa vɔ, mì la ce. Vɛ̀ɛ̀ dɛnɛ palaa súú vaa nuaa nɔ pá velanndo? Dɛnɛ palaa súú del-la hoo coo-o pɛɛn, ò Mɛlɛka tuisi hoo ya coo o paale ndɔle kɔl tambɛilen coo-o.

¹³ Mɛlɛka lo coo, mó soli yinnden, mó cuu yinnde len o paala nilan nin. Mó toandu yalaa ya o labɛngunin, mó mingi ya a makɔɔ, mó kɛsi ya o mɔnɛi nin, o nàà imɔnɔ kon nin ya co le lɔ́ɔ́-lɔ́ɔ̀ ni.

¹⁴ O nɔ hɔlten o hakila ya tosa lan coo. O cii lan yii nɛɛ pilɛ ndu o ba, mó handu ya lan o congú. La hel-la háá o labolo dí, Mɛlɛka cii ya yoomuan soli pó. O mal-la vanaa ya nɔla simullo le-a o ba.

¹⁵ Maalii cii vanaa cɔvaa nia kpow kɛɛ, vanaa cɔvaa va ya ikɛi-ya pɛɛn. O cuungiaa vanaa cowva le ya ciŋilanndo, le langbaa felengia ya nɔ-a ciimiaa. Maalii vayia ya, ya Siɔn kɛndɛ-kɛndɔɔ, mɛɛ vana vayia rɛsɛnndon o doola nin yɛ.

¹⁶ Le kɔlɔɔ ho ya co caŋndo ni, mì hɔlta nilan la va mɛmɛan tuisio. Kani vana kon faŋan ya ikɛi polon, vana ɲɔɔlaa óò lueinin ya yoomuan-ndo. Poaa nia laasian kɔltan, kani yaamɔɔ hiow nda mayoomu.

¹⁷ Siɔn sanga balan sɛndio, o sɔla vana ɲɔlaa kɛ́-kɛ̀ le. Mɛlɛka cii vannda dimul le Yakɔb delɔɔ coo, o cii yaamɔaa ndɔa balu ndu-a dimul. Yerusalɛm siŋnun ɲɛ nɔɔlɛiyo nda tɛɛn.

¹⁸ Mɛlɛka nɔ dí le ɲɛ o tosa hoo-o, kani nila kalulan ya tosa a silala ndɔlan ni. Niaa vanndacieea kpow la yaŋnun-ndɔ, la tofa vɔ dɛnɛ palaa del-la coo-o. Cuaambɔa lemboa nia a langbaa felengia nia kɔɛ o biyɔɔ nin.

¹⁹ I veelu vanáà yeema ya paandu-a, kɛ má hui ya. Mí vanaa-solia-lasálàà nia a vanaa nia silaa cuu vu o kobio nin, le ɲɛdiaa nuwviaa haliko mi ndáà lo yoomu.

²⁰ Éé Mɛlɛka! Tofa vɔ dɛnɛ palaa ya co nin-ndo! Niŋndo co ya ŋolɔɔ. Kɔllo laasian ya nin laasi-laasi, kani lekɛ́ndɛi vana nila kaloo ya yɔŋnun ni. Mɔɛi cɔwve ciilu ya cuavaa nia o bɛ́ɛ̀, n co cɛinin vana ca ko aa ciee-piɔ́m ni.

²¹ Vannda co ya tuɛyɔɔ kuŋndan, kɛ vana-vana co ya ɲɔɔlu le. Yaamɔaa nia kpow a tuei dɛnɛ palaa nuu tɔ́ɔ́, a co ɲaaloo dɔwnɔnndo le tùú n tuisi ya ndu coo-o. Màá paale n dimi sɔɛi ndɔɛi len le tiiya, haliko mi nda bɛɛ a muungu maa ya!

²² Màá nɔm pila cɔ vanavɔɔnyɛi ndɛi kpow! O kon mà tosal nda mɛɛ n tosal-la le tɛɛmbuula nilan kpow yɛ. Kani kuŋnda ya co lan la co sɛ́lɛ́, kɔl nuu co o sangaa nin.»