Kundalan 8 - BII BILA

Mɛɛ vana kɛsi fitinalan yɛ

¹ Mí Mɛlɛka soaa o Moise lo, mó dimul ndu aa:

² «Soo o Aarɔn ndo ma dimul ndu aa: ‹Taa cii pɛ fitinala ŋɔmmɛwlan handɔɔ o fondala ndalan, a toosiaa lan kɛsi haliko mi la va ɲɛ-tengaa yɔngoo o ɲɛ kɛsiaa lafitinaa laci.›»

³ Mí Aarɔn tosa lende. Mó hɛɛnduu fitinalan o ɲɛ kɛsiaa lafitinaa le ɲɔɔ vaa teengiaa o ɲɛ kɛsiaa lafitina kon laci mɛɛ Mɛlɛka dimul Moise le ndu tɛɛngullo yɛ kpafii.

⁴ A sianin fɛtufɛton ndáà cɔw ɲɛ kɛsiaa lafitina kon ni, kandɔɔ a tum ndɔɔ, kɔ bii a lɔɔla ndɔlan. Mɛɛ Mɛlɛka ndóò cɔm Moise tɔɔmaseloo yɛ ndáà cɔw ndu ni.

Leviia sɔla hɛlio le baala Mɛlɛka-o tosaa

⁵ Mí Mɛlɛka soaa o Moise lo, mó dimul ndu aa:

⁶ «Sɛi leviia a Israɛlaa tɔ̀a, ma dindi nda.

⁷ Mɛɛ n bɛnda le nda dindio yɛ co hoo ni: a bɛnda ma fasaŋiaa nda mɛmma dindianndan coo, mì nda pila sendin kɔɔlen kpow a kùisiei, ma tɔɔ volɔɔla ndala cuɛinanndan, o kon, mà siŋnun a diandaa.

⁸ Mà bii naw tova téndóó a sálà co le solio latulu a ndu-o, a dɛɛ nda vɔɔca o cuɛiyan nin-ndo, mì nɔm Moise bii naw tova diinndɔɔ le sálà co le hakio sɔlaa malɔɔ-o solio.

⁹ Ma sɔɔnguu leviia o cɛi-kola-toandaa-labɔɔŋianndo sondoo, ma cuungiaa Israɛlla kpow.

¹⁰ Ma sɔɔnguu leviia Mɛlɛka o hɔl, mì Israɛlla handu balan nda coo.

¹¹ O kon, Aarɔn tosa faleŋii vana tosa le ya Mɛlɛka ɲɔɔ cɔmndo-e, le ya leviia yɔngoo fulaa Israɛlaa tɔ̀a o ba, mì nda va nin le vali nuu.

¹² Mì leviaa kan handu bala ndalan navaa tovaa ŋiɔŋaa kan o lebol, mì nɔm pila solul-la o pilɛ sálà co le hakio sɔlaa malɔɔ-o, ma soli o pilɔɔ sálà loamaa, haliko mi faleŋii baŋannde tosan le leviaa kan.

¹³ Ma simi nda Aarɔn nda poaa ndɔa o hɔl, mì nɔm Moise pila tosa faleŋii vana tosa le Mɛlɛka ɲɔɔ cɔmndo-e le nda sɔɔ ya Mɛlɛka o ba.

¹⁴ Lende n bɛnda ni ma sɛi leviia a Israɛlaa tɔ̀a. Mì nda va le ya Mɛlɛka.

¹⁵ Kon cuu pɛ, à kandu niko vali ndaa o cɛi-kola-toandaa-labɔɔŋianndo nin. O kon, a dindi nda, a cɔm ya nda a faleŋii vana tosa le ya Mɛlɛka ɲɔɔ cɔmndo-e.

¹⁶ Kani le ya nda vanin fasɛi o Israɛlla tɛɛn ni, sɔ̀ngɔ́ poaa tasea Israɛlla kpow nda vanin le ya ni. I cua nda ma va ɲɛ ni pɛ́-pɛ́.

¹⁷ Bau ya nɔ poaa tasea a cɔlua piaandua tasea Israɛlla kpow ni. Paale ya diw poaa tasea a cɔlua piaandua tasea Esiptea len ya soli nda sálà ni mí kɛsi nda teengen le ya pila.

¹⁸ Lelan, i cua leviia sɔ̀ngɔ́ poaa tasea Israɛlla kpow,

¹⁹ mí sɔaa nda Aarɔn nda poaa ndɔa o ba maa hɔlte Israɛlla tɔ̀a, haliko ma tosa vallo o diola Israɛlaa tɔ̀a o cɛi-kola-toandaa-labɔɔŋianndo nin, mà va vali baŋaa tosaa le nda. O kon, kpundɛ tul lɛ Israɛlla coo le sɔɔnguuo o Cɛi-Diandaa ikɛi le.»

²⁰ Mí Moise, Aarɔn a Israɛlla kpow a tosa ɲɛ Mɛlɛka dimul nda a sondo Moise-o le tosaa a leviia-o.

²¹ Mí leviia dindin, má tɔaa volɔɔla ndala cuɛinanndan, mí Aarɔn tosa faleŋii vana tosa le Mɛlɛka ɲɔɔ cɔmndo-e Mɛlɛka o hɔl, mó tosa vɛlɛ faleŋii dindiannde le nda dindio.

²² O kon kɔɔli, má kandu niko vallo Aarɔn nda poaa ndɔa o labɛngunin o cɛi-kola-toandaa-labɔɔŋianndo nin. Má tosa a nda kpafii mɛɛ Mɛlɛka vem Moise le tosaa yɛ.

²³ Mí Mɛlɛka soaa o Moise lo, mó dimul ndu aa:

²⁴ «O leviia tɛɛn, vanaa nɔ vɔsilan bidiin a laŋuɛɛnu-a a vanaa nɔ hiovɔɔ kon coo-a bɛnda ni ma cuannun le vallo pum tosaa o cɛi-kola-toandaa-labɔɔŋianndo nin.

²⁵ Á tiiya nin pɛ vɔsilan beleŋuɛɛnu, nda bɛnda mà mal vallo, a bɛnda lɛ ma tosa vali le.

²⁶ A bɛnda mà mala vanaa tɔ̀a co vali pilɛ kon tosaa-a vallo o cɛi-kola-toandaa-labɔɔŋianndo nin, kɛ nda pila nɔ lɛnin vali vana kelu ilal te. Sɔɔn n bɛnda ma tosa a vali yɔngun leviia-o o kɔɔ-on co mun ni.»