Kundalan 35 - BII BILA

Kobila leviia sɔla lan

¹ Mí Mɛlɛka soaa o Moise lo o dɛɛlalan Moab nin, o peo Yurdɛn kɔngɔ, Yeriko o hɔl-ndɔ, mó dimul ndu aa:

² «Dimul Israɛlla aa o ɲɛm nda sɔla kɛ́ɔ-von nin, a bɛnda mà yɔngu leviia kobila nda hɛlinin o lɛŋii nda sɔlanin-nde nin-ndan, mì leviia nda cal lon.

³ Kobila lan la vanin nɛɛ calaa ndaa ni. A bɛnda mà sɔla yondolan a tàndàla balu kobila lan-ndan le cɔlua ndaa, le ɲɛm ndan sɔlan a le visia ndaa kpow.

⁴ O kobila niaa yɔngunin nda lan nin, la bɛnda mì la tuu dunndo vàá pilɛ kandɔɔ o kunga kobio lekɔɔli, mì la balu tuuvo lende kobio pindo.

⁵ O kobio kɔɔli, mì la tuu dunndo vàála tiɔn a ba paalen le can-ndo, dunndo vàála tiɔn o ba too, dunndo vàála tiɔn a ba paalen le del-lo, dunndo vàála tiɔn a ba luaŋ-ndo, mì kobio lo tɛɛn. Yondola balunin kobila ndalan-ndan la vanin ndan ni.

⁶ Mì la yɔngu vɛlɛ leviia kobila ŋɔmpumnda vana viannun nin-ndan, lá niaa hɛlinin le vanaa sulalle fula o ba má dii vanacieo-va vionnɔnndo nin-ndan pɛɛn. Mì la yɔngu vɛlɛ nda kobila celen belehiɔɔlu a latiɔn.

⁷ Kon co dimio ni maa la bɛnda mì la yɔngu nda kobilan belehiɔɔlu a laŋɔmaa, kobi oo kobi a yondola ndɔla balu ndu lan.

⁸ O kobila Israɛlla sɔlanin kɛ́ɔ lan nin niaa hɛlinin kobila lan ni. Mɛɛ lepola oo lepola le sɔlanin kɛ́ɔ yɛ le bɛnda ni mì le yɔngu kobilan. Polama sɔla lɛŋnden taw-van ma bɛnda mì ma yɔngu kobilan taw, mì polama sɔla lɛŋnden ɲɛ-pɔmbɔ-an ma yɔngu kobilan ɲɛ-pɔmbɔ.»

Kobila vana viannun nin-ndan

⁹ Mí Mɛlɛka soaa vɛlɛ o Moise lo, mó dimul ndu aa:

¹⁰ «Soo o Israɛlla lo ma dimul nda aa: ‹La co peo Yurdɛn taŋɔɔ, mì la luɛi o lɛŋnde Kanaan-nden nin.

¹¹ La tiiya pɛ lon, la hɛli kobilan lapum, lenin vanaa sulalle fulanin o ba ma dii vanacieo-va vanin kɔlan vionnɔnndo ni.

¹² Kobila lan la vanin niaa malaa le vana dii vanacieo-vo kandaa ni, yɔŋii vana yeema le màá mingio-o dii vana kon. Kani fɔ mò sim fɔlɔn sɛ́lɔ́ɔ́ o hɔl le kɔɔsɔɔ, mì sɛ́lɔ́ɔ́ kelu yamɛi ndɔɛi.

¹³ La bɛnda mì la hɛli kobila vana viannun nin-ndan laŋɔmpum:

¹⁴ Layaa la co va Yurdɛn leeloo nanu, mì layàá la va o lɛŋnde Kanaan-nden nin.

¹⁵ Kobila ŋɔmpumnda lan la vanin nɛɛ viannannda le Israɛlaa kpeekpeiya, le vanaa co icali nda tɛɛn-nda a le mialaa vanin icali nda o bɛngu coo-a ni. Vana-vana sulalle fula pɛ o ba, mò dii vanacieo, o nɔla mo kɔ vionnun ndon.

¹⁶ Te vanndo lɔɔ pɛ vanacieo a ɲɛ-ɲɛ co cilinnde mo dii ndu, mɛɛ vana diyaa n'vanndo co kon ni. Lelan, o bɛnda mò sɔla piɔ́mndo kangalan.

¹⁷ Te vanndo lɔɔ pɛ vanacieo a pow nɔla mò dii vana-o, mò dii vana o lɔɔ kon-ndo, mɛɛ vana diyaa n'vanndo co kon ni. O bɛnda mò sɔla piɔ́mndo kangalan.

¹⁸ Te vanndo lɔɔ pɛ vanacieo a yɔm nɔla mò dii vana-o, mò dii vana o lɔɔ kon-ndo, mɛɛ vana diyaa n'vanndo co kon ni. O bɛnda mò sɔla piɔ́mndo kangalan.

¹⁹ Lelan, te vana cɛn le màá kon mingio-o saalun dɔ́ɔ́ pɛ vana kon, o bɛnda mò dii ndu.

²⁰ Te vanndo ɲindu pɛ vanacieo a nɛyɔnndo, mo dii ndu, te kon te, o tùú pɛ tuu vɔɔndo a ndu, mo vɛ ndu a ɲɛ mo dii ndu,

²¹ te kon te, te o kposoŋa ndu pɛ a ba mo dii ndu, mɛɛ vana diyaa n'vanndo co kon ni. O bɛnda mò sɔla piɔ́mndo kangalan. Lelan, te vana cɛn le màá vana o dii-o mingio-o saalun dɔ́ɔ́ pɛ vana kon, o dii ndu.

²² Kɛ te vanndo ve sìná le, mò ɲindu vanacieo, mì sulalle fula ndu o ba, te o co viɔw le o vɛ ndu a ɲɛ pum a kɔlvesɛiyo le,

²³ te o ci ndu le mò mal ndu powvo coo, mò dii ndu kɛ o ve a kɔlvesɛi le, te o ve sɔɛi o tuunun o kɔl le ndu tosal te,

²⁴ sɛ́lɔ́ɔ́ kpede bɛnda mà kelu yamɛi vana kon nda vana cɛn le màá mingio-o tɛɛn mɛɛ silala co a dɛnɛ vaa lende o kɔɔ lan la co yɛ.

²⁵ A bɛnda mà baŋa ndu vana cɛn le màá mingio-o o ba, mà mingi ndu o kobi vana viannun nin-ndo nin, nɛɛ ndóò kɔ vionnun nin-nda. Vana sulalle fula kon o ba mó dii vanacieo-vo lonin o viannanndo o kobi vana viannun kon nin-ndo nin háá mì bolle vanaa-solia-lasálàà nda pɔla a cuɛima diandan-ndo vi.

²⁶ Kɛ te o faŋan pɛ o kobi o co o viannanndo nin-ndo nin mo kɔɛ nɛɛ celen,

²⁷ te vana co le màá mingio-o komal pɛ ndu lon mo dii ndu, vana kon sɔlanin isɔɔ-sɔɔ le diyɔɔ o dii ndu kon-ndo le.

²⁸ Kani vana dii vanacieo-vo bɛnda mò lo o kobi o vennun nin-ndo nin háá mì bolle vanaa-solia-lasálàá vi. O kon kɔɔli, o nɔla niko mò muungu o lɛŋii ndɔɛi coo, o calta ndɔlan.

²⁹ Fonda oo fonda niaa va pɛ fɛɛn icali, tɔŋndo co kon le niaa pila a le cuavaa niaa imamaa ni.

³⁰ Te vanndo dii pɛ vanacieo, fɔ mì seiya taw a tɛnda fɔlɔn seilen malan vana dii kon vanacieo-vo sɔla piɔ́mndo. Seiyo ndu pilɛ bɛnda mò tɛnda seilen mì vana kelu yamɛi vana dii kon vanacieo-vo le ndu diyɔɔ le.

³¹ La bɛnda mì la cɛl mì vanndo baŋa yoomu vana dii vanacieo a kɔlvesɛiyo mì yamɛi kiolu maa o bɛnda le piɔ́mndo sɔlaa-o le. Vana kon bɛnda mò sɔla piɔ́mndo kangalan.

³² Te bolle vanaa-solia-lasálàá vi vɔ le, la cɛ́l mì vana sulalle fula o ba mó dii vanacieo-vo faŋan o kobi o co o viannanndo nin-ndo nin mò kɔ cal o ndu lo le.

³³ La laasiaa lɛŋnde niaa co nin-nden te, kani vana dii pɛ vanacieo mɛɛ ndu nɔɔliaa lɛŋnden. Nduyɛ le lɛŋnden dindinndo, fɔ mì vana dii vanacieo-vo sɔla piɔ́mndo.

³⁴ La nɔ́ɔ́liàà lɛŋnde niaa vanin icali nin-nden te, ya Mɛlɛka pila bɛɛ vanin o lɛŋnde len nin, kani ya co Mɛlɛka cal Israɛlla tɛɛn-ndo ni.›»