Kundalan 3 - BII BILA

Vali vanaa-solia-lasálàá

¹ Haa yɔŋnun poaa Aarɔn-nda a poaa Moise-a telen Mɛlɛka soo o Moise lo o pembei Sinai coo-o ni.

² Poaa Aarɔn-nda yɔŋnun haa ni: po ndɔ tasoo diolan Nadab, o Nadab kɔɔli, mó vialu Abihu, Eleasar a Itamar.

³ Kan yɔŋnun poaa Aarɔn-nda ni, vanaa-solia-lasálàá sɔla pɔlaa le vali solia lasálàá tosaa-a nda va ni.

⁴ Kɛ mí Nadab nda Abihu a sɔla piɔ́mndo Mɛlɛka o hɔl o lɛŋnde veselɛile balu Sinai len nin, le tùú nda luɛi a yinnde súú celennden Mɛlɛka o hɔl-lo. Ndáà vilu n'cuaw le. Mí Eleasar nda Itamar lo vali solia lasálàá tosaa Aarɔn fuɲa nda o labɛngunin.

⁵ Mí Mɛlɛka soaa o Moise lo, mó dimul ndu aa:

⁶ «Cua vanaa fula o polale Levii len nin-nda, ma sɔɔ nda Aarɔn vana-solia-lasálàá o ba le ndu malaa o vali kon nin.

⁷ A vanin Aarɔn o ba bɛngu mà tosa baala le sɛ́lɔ́ɔ́ kpow o cɛi-kola-toandaa-labɔɔŋianndo sondoo le baalala co a Calta Mɛlɛka lan o kɔɔ lan tosaa.

⁸ Nda bɛnda ni mà landu hɔlla o ɲɛm-laandun co o cɛi-kola-toandaa-labɔɔŋianndo nin-ndon coo, ma va vallo tosaa o Calta Mɛlɛka la lan nin le Israɛlla.

⁹ Lelan, cua nda ma sɔɔ nda Aarɔn nda poaa ndɔa o ba. Kan bɛnda ni mà yɔngun Aarɔn, mì nda va hɔlte Israɛlaa tɔ̀a kpede.

¹⁰ Mì nɔm Moise va mɛɛndanndo haliko mi Aarɔn nda poaa ndɔa kínɛí a tosa vali solia lasálàá. Te vana celen, vana fula o yungu Aarɔn-ndo nin too sɔɔnguu pɛ ikɛi, o bɛnda mò sɔla piɔ́mndo.»

¹¹ Mí Mɛlɛka soaa vɛlɛ o Moise lo, mó dimul ndu aa:

¹² «Yaŋ-ndɔ nilan, i hɛli leviia o Israɛlla tɛɛn, haliko ma muungu o fonda poaa tasea vanlaandua Israɛl co violɔɔ-a. Lelan, a nia nda co nin ni.

¹³ Kani poaa tasea kpow, le ya nda co ni. Paale ya diw poaa tasea a cɔlua piaandua tasea Esiptea len, mí siinguu ɲinkon poaa tasea a cɔlua piaandua tasea Israɛlla teengen le ya Mɛlɛka pila. Kandɔɔ a po tasoo, kɔ bii a cɔlu piaandu tasoo, le ya nda co nin ni. Ya co Mɛlɛka ni.»

Sɛvan leviia sɛvan kpow-kpow-vo

¹⁴ O kon kɔɔli, mí Mɛlɛka soaa o Moise lo o lɛŋnde veselɛilen Sinai nin, mó dimul ndu aa:

¹⁵ «Cɔ́m polale Levii len mɛɛ nda co a kundala ndala n'vanayalan a á yungula ndalan a pilɛn-pilɛnnda yɛ, ma cɔm vanpiaandua nɔ paangei ipilɛ-a a á hiow nin paangii pilɛ coo-a.»

¹⁶ O kon, mí Moise cɔm nda mɛɛ Mɛlɛka pila vem ndu le tosaa yɛ.

¹⁷ Diola poaa Levii velu-a la co lan ni: Kɛrsɔn, Kehat a Merari.

¹⁸ Poaa Kɛrsɔn velu-a va Libni nda Simei ni, nda yɔŋnun fuɲaa-mamaa le yungula ndalan ni.

¹⁹ Poaa Kehat velu-a yɔŋnun Amram, Yisehar, Hebrɔn a Usiɛl ni, nda yɔŋnun fuɲaa-mamaa le yungala ndalan ni.

²⁰ Mí Merari ndu vialu Mahli a Musi, nda yɔŋnun fuɲaa-mamaa le yungula ndalan ni. Vanaa fula o polale Levii len nin-nda yɔŋnun kan ni.

²¹ Polale Kɛrsɔn-nden le yɔŋnun yungu Libni-o a yungu Simei-yo ni, yungula lan la yɔŋnun cuavaa-imamaa Kɛrsɔn-nda ni.

²² Tuma nda sɛva nda-o, a va vanpiaandua vàálan tan ŋɔmmɛw a kɛmɛ leŋuɛɛnu (7 500), kandɔɔ a nɔ paangei ipilɛ-a, kɔ bii a hiow paangei ipilɛ-a.

²³ O dɔ́ɔ́ngɔ́ɔ̀ nin nda va icali o Calta Mɛlɛka lan kɔɔli a ba paalen le del-lo ni.

²⁴ Vana va bolle pangale ndalen-ndo va Eliasaf, po Laɛl-lo ni.

²⁵ O cɛi-kola-toandaa-labɔɔŋianndo nin, vali ndaa va hoo ni: hɔlla landɔɔ o Calta Mɛlɛka la va lenin-ndan coo, o kolala nda vii ndu lan coo, o kola-landaa va o cɛi-kola-toandaa kon sondoo-o coo,

²⁶ o kolala kunga balu cɛi-kola-toandaa kon-ndan coo, o kola-landaa va o dio bɛɛ balu Calta Mɛlɛka la lan a fonda-loamaa-lasálàá-o coo a o yoei va le baalalan-nde kpow coo.

²⁷ Yungula fula o cuavaa-imamaa Kehat-a nin-ndan la va yungu Amram-ndo, yungu Yisehar-o, yungu Hebrɔn-ndo a yungu Usiɛl-lo ni. Yungula fula Kehat o ipulu lan la yɔŋnun ndan ni.

²⁸ A va vannda vàála ŋɔmaa a kɛmɛ leŋɔmpum (8 600), vanpiaandua kposon, vanaa nɔ kandɔɔ paangei ipilɛ háá hiovɔɔ paangei pilɛ coo-a. Nda va hɔlla landɔɔ o Cɛi-Diandaa coo ni.

²⁹ O Calta Mɛlɛka lan a ba too yungula fula o Kehat nin-ndan la va icali ni.

³⁰ Elisafan, po Usiɛl-lo yɔŋnun bolle pangale ndalen ni.

³¹ Ɲɛm nda va mandaa-on va mun ni: kesu kpemaa, tabali bulu toosian a lɛvɛn too va coo-o, ɲɛ kɛsiaa lafitinaa, fondala-loamaa-lasálàlan, ɲɛm diandan va le sálàlan solio-on a kola-landaa kelu Fonda-Diandaa a Fonda Diandaa-Diandaa tɛɛn-ndo. Ndáà tosa valta va a ɲɛm mun o kɔɔ lan ni.

³² Vana bɛndu va leviia kpow bollen-ndo va Eleasar, po Aarɔn vana-solia-lasálàá ni. Ndu óò mɛɛndan vali nda va tosaa o Cɛi-Diandaa nin-ndo ni.

³³ Yungula fula o cuavaa-imamaa Merari-a nin-ndan la yɔŋnun yungu Mahli-o a yungu Musi-o ni.

³⁴ A va vannda vàálan tan ŋɔmpum a kɛmɛ lediin (6 200), vanpiaandua nɔ paangei ipilɛ-a a á nɔ hiovɔɔ pangei pilɛ coo-a.

³⁵ Bolle pangale ndalen le va Turiɛl, po Abihayil-lo ni. Fonda nda calaa va o Calta Mɛlɛka lan a maluaŋ ni.

³⁶ Polale Merari len, vali ndaa va hoo ni: hɔlla landɔɔ o pɛngɛn Calta Mɛlɛka lan coo, o kandola ndɔlan coo, o sungbuma ndɔan coo, o fondala sungbuan ma kɛsi tumndan nin-ndan coo a o ɲɛm-laandon kpow coo. A ɲɛm mun ndáà tosa vallo ni.

³⁷ Ndáà tosa vɛlɛ vallo a sungbuma balu kunga bɛɔ-van, a fondala sungbuma man ma kɛsi tumndan nin-ndan, a pikin ndan a á yoei ndɛi ni.

³⁸ Moise, Aarɔn a poaa ndɔa nda, fonda nda calaa va o Calta Mɛlɛka lan hɔl-ndɔ a ba paalen le can-ndo ni, o cɛi-kola-toandaa-labɔɔŋianndo sondoo pɛɛn. Nda va vallo o Cɛi-Diandaa nin o diola Israɛlla ni. Te vana celen ndóò sɔɔnguu pɛ ikɛi maa nda, ndóò sɔla piɔ́mndo.

³⁹ Leviaa Mɛlɛka vem Moise nda Aarɔn sɛvaa-a va vaalan bidiin a latiɔn (22 000), vanpiaandua kposon, a nɔ paangei ipilɛ-a a á nɔ hiovɔɔ paangei pilɛ coo-a.

Silaa le poaa tasea baŋaa

⁴⁰ Mí Mɛlɛka dimul Moise aa: «Sɛva poaa tasea kpow o Israɛlla tɛɛn, kandɔɔ a nɔ paangei ipilɛ-a a á nɔ hiovɔɔ paangei pilɛ coo-a, ma sɛva nda diolan a pilɛn-pilɛnnda.

⁴¹ Ma yɔngu ya leviia sɔ̀ngɔ́ poaa tasea kan. Ya co Mɛlɛka ni. Cɔlua leviia vanin vɛlɛ le ya Mɛlɛka sɔ̀ngɔ́ cɔlua piaandua tasea Israɛlla kpow.»

⁴² O kon mí Moise sɛva diola poaa tasea Israɛlla kpow mɛɛ Mɛlɛka dimul ndu yɛ kpafii.

⁴³ Poaa tasea o sɛva diolan-nda, kandɔɔ a nɔ paangei ipilɛ-a kɔ bii a nɔ hiovɔɔ paangei pilɛ coo-a, a va vaalan bidiin a latiɔn a kɛmɔɔ lediin a belaŋɔmmɛw a à yaa (22 273).

⁴⁴ Mí Mɛlɛka soaa o Moise lo, mó dimul ndu aa:

⁴⁵ «Yɔngu ya leviia mì nda va le ya sɔ̀ngɔ́ poaa tasea Israɛlla, ma yɔngu ya vɛlɛ cɔlua piaandua ndaa sɔ̀ngɔ́ cɔlua piaandua tasea Israɛlaa tɔ̀a. O kon, mì leviia va le ya. Ya co Mɛlɛka ni.

⁴⁶ Kɛ a kon kpede, poaa tasea kɛmɛ lediin a belaŋɔmmɛw a à yaa (273) Israɛlla a co le baŋaa, kani leviia siow ciŋa le kan baŋaa le.

⁴⁷ Le kan o pilɛ baŋaa, a bɛnda ma kelu vɔngoo volin latámán mún ŋuɛɛnu, mɛɛ volin latámán co dionnɔnndo o Cɛi-Diandaa nin-ndon co yɛ, volin mún i pilɛ lusul ndɔɔ co le kalamulan tɔ́.

⁴⁸ Ma cua volin mun, ma yɔngu Aarɔn nda poaa ndɔa maa vɔngu baŋaa le poaa tasea hiow vaa sɛ́lɛ́ a kunda leviia-o.»

⁴⁹ Mí Moise sɔla volin vɔngu baŋaa kon le poaa tasea, à vana baŋaa sɔlan kan o leviia tɛɛn le nda baŋa le-a.

⁵⁰ A ba poaa tasea Israɛlla, mó sɔla volin latámán vàá pilɛ a kɛmɛ leyáá a belaŋɔmpum a ŋuɛɛnu (1 365) mɛɛ volin latámán va o Cɛi-Diandaa nin-ndon va yɛ.

⁵¹ Mó cua volin vɔngu baŋan mun, mó sɔaa Aarɔn nda poaa ndɔa o ba, mɛɛ Mɛlɛka dimul ndu le tosaa yɛ.