Kundalan 29 - BII BILA

Sálàá le kafo hɔŋaa labuloo

¹ «O paale taselen coo o paangii ŋɔmmɛwndɔɛi nin, la bɛnda mì la cuungian le kaannden tosaa. Ɲinkon, la bɛnda mì la tosa vali niaa tosà paandu-o le. La bɛnda mì la hɔŋ bululan taw-taw paale len.

² Mì la soli sálà loamaa, o ya tuɛi cun mì ɲɔɔ hɛnan ya-o a naw tova téndóó pilɛ, saa kóndóó pilɛ a saa téndéa nɔ vɔsio pilɛ-a nda ŋɔmmɛw. Cɔlua kan kpow a bɛnda mà nɔ lenamta le.

³ Mì la cɔɔlu sálà dɛɛ vɔɔcan a cuɛiyan-ndo handɔɔ lecoo: kiloo leŋɔmahiɔɔlu le naw tova oo naw tova, kiloo leŋɔmpum le saa kóndóó,

⁴ kiloo leyàá le saa téndé oo saa téndé.

⁵ O kon kɔɔli, mì la dii cuin toovio pilɛ le sálà co le hakio sɔlaa malɔɔ-o, le faleŋii baŋannde tosaa le haki niaa.

⁶ Sálàla lan la handunnin o sálà loamaa solin o paangei kandɔɔ-o a o sálà mamɔi ndɔɔ coo ni. Ndu koni handunnin vɛlɛ o sálà solin lepalaa-lepala-o, o kpeyan sálà kon a o sálà ndɔ mamɔiyo coo ni, maa mɛɛ falennde co le dɛnɛ kon yɛ. Sálàla ŋɔa o yin le ya Mɛlɛka lan la co lan ni, la ya tuɛi cun mì ɲɔɔ hɛnan ya lan.»

Sálàá le paale bɛndule malaa lahakilen

⁷ «O paale tɔ́ndɔlen coo o paangii ŋɔmmɛwndɔɛi nin, la bɛnda mì la cuungian le kaannden tosaa. Mì la bii sumndo ɲinkon, la tosa paale len vali niaa tosà paandu-o le.

⁸ Mì la solul-la sálà loamaa, o ya tuɛi cun mì ɲɔɔ hɛnan ya-o: naw tova téndóó pilɛ, saa kóndóó pilɛ a saa téndéa nɔ vɔsio pilɛ-a nda ŋɔmmɛw. Cɔlua kan kpow a bɛnda mà nɔ lenamta le.

⁹ Mì la handu sálà dɛɛ vɔɔcan a cuɛiyan-ndo: kiloo leŋɔmahiɔɔlu le naw tovaa, leŋɔmpum le saa kóndóó,

¹⁰ leyàá le saa téndé oo saa téndé o saa téndéa ŋɔmmɛvaa kan nin.

¹¹ Mì la dii vɛlɛ cuin toovio pilɛ le sálà co le hakio sɔlaa malɔɔ-o. Mì sálàla lan la cɔɔlu handɔn o sálà teengen co le hakio sɔlaa malɔɔ-o coo, o nda soli o paale bɛndule malaa lahakilen coo-o, a o sálà loamaa solin lepalaa-lepala-o coo, o dɛɛ ndɔ sálàá coo a o mɔima ndɔma sálàn coo.»

Sálàlan le kafo lakùùo

¹² «Te paangii ŋɔmmɛwndɔɛi tiiya pɛ palɛi tɔ́ a iŋuɛɛnu, la cuungian vɛlɛ le kaannden. Paale len, la bɛnda mì la tosa vali niaa tosà paandu-o le. O palɛi ndii ŋɔmmɛw bɛngu, la bɛnda mì la va kafoo tosaa le ya Mɛlɛka biiloo.

¹³ La bɛnda mì la bii navaa tovaa téndéa tɔ́ a à yaa, saa kóndóa nda ŋiɔn a saa téndéa nɔ vɔsio pilɛ-a tɔ́ a à hiɔɔlu, mì la soli sálà loamaa a nda, sálà ya Mɛlɛka tuɛi cun mì ɲɔɔ hɛnan ya-o. Cɔlua kan kpede a bɛnda mà nɔ lenamta le.

¹⁴ Mì la handu dɛɛ vɔɔcan a cuɛiyan-ndo lecoo: kiloo leŋɔmahiɔɔlu le naw tova oo naw tova o navaa tovaa tɔ́ a à yàá-a nin, kiloo leŋɔmpum le saa kóndóó o pilɛ o saa kóndóa ŋiɔnda nin,

¹⁵ kiloo leyàá le saa téndé oo saa téndé o saa téndéa tɔ́ a à hiɔɔlua nin.

¹⁶ Mì la dii vɛlɛ cuin toovio pilɛ le sálà co le hakio sɔlaa malɔɔ-o. Kon kpow handunnin o sálà loamaa solin lepalaa-lepala-o coo, o dɛɛ sálà kon coo a o mɔima sálà kon coo ni.

¹⁷ Paale diinndɔlen, la bɛnda mì la soli sálàá a navaa tovaa téndéa tɔ́ a à ŋiɔn, saa kóndóa nda ŋiɔn a saa téndéa nɔ vɔsio pilɛ-a tɔ́ a à hiɔɔlu, cɔlua kan bɛnda mà nɔ lenamta le.

¹⁸ Mì la soli nda sálàá a kpeyanndo, a mɔima bɛnda le navaa tovaa kan, saa kóndóa kan a saa téndéa kan-ndan, mɛɛ nda co sɛ́lɛ́ yɛ. Mì la tosa a sálàla lan mɛɛ tɔŋndo dimi yɛ.

¹⁹ Mì la dii vɛlɛ cuin toovio pilɛ le sálà co le hakio sɔlaa malɔɔ-o o sálà loamaa solin lepalaa-lepala-o coo, o kpeyan ndɔ sálàá a o mɔima ndɔma sálàn coo.

²⁰ Paale yàándɔlen, la bɛnda mì la soli sálàá a navaa tovaa tɔ́ a ò pilɛ, saa kóndóa nda ŋiɔn a saa téndéa nɔ vɔsio pilɛ-a tɔ́ a à hiɔɔlu, kan kpow a bɛnda mà nɔ lenamta le.

²¹ Mì la handu kpeyan sálàá a mɔima sálàn lecoo mɛɛ nda co sɛ́lɛ́ yɛ, mì la tosa mɛɛ tɔŋ kon dimi yɛ.

²² Mì la dii cuin toovio pilɛ le sálà co le hakio sɔlaa malɔɔ-o, kon kpow handunnin o sálà loamaa solin lepalaa-lepala-o coo, o dɛɛ sálà kon coo a o mɔima sálà kon coo ni.

²³ Paale hiɔɔlundɔlen, la bɛnda mì la soli sálàá a navaa tovaa tɔ́, saa kóndóa nda ŋiɔn a saa téndéa nɔ vɔsio pilɛ-a tɔ́ a à hiɔɔlu, nda kpow a bɛnda mà nɔ lenamta le.

²⁴ Mì la handu dɛɛ sálàá a mɔima sálàma bɛnda a sálà kon-ndan.

²⁵ Mì la dii vɛlɛ cuin toovio le sálà co le hakio sɔlaa malɔɔ-o.

²⁶ Paale ŋuɛɛnundɔlen, la bɛnda mì la soli sálàá a navaa tovaa nda ŋɔmahiɔɔlu, saa kóndóa nda ŋiɔn a saa téndéa tɔ́ a à hiɔɔlu, a nɔ vɔsio pilɛ-a, nda kpow a bɛnda mà nɔ lenamta le.

²⁷ Mì la handu dɛɛ sálàá a mɔima sálàn lecoo mɛɛ navaa tovaa, saa kóndóa a saa téndéa co sɛ́lɛ́ yɛ, mì la tosa mɛɛ tɔŋ kon dimi yɛ.

²⁸ O sálà loamaa solin lepalaa-lepala-o kɔɔli, o dɛɛ sálà kon a o mɔima sálà kon kɔɔli, mì la dii vɛlɛ cuin toovio pilɛ le sálà co le hakio sɔlaa malɔɔ-o.

²⁹ Paale ŋɔmpumndɔlen, la bɛnda mì la soli sálàá a navaa tovaa nda ŋɔmaa, saa kóndóa nda ŋiɔn a saa téndéa nɔ vɔsio pilɛ-a tɔ́ a à hiɔɔlu, cɔlua kan kpow a bɛnda mà nɔ lenamta le.

³⁰ Mì la handu dɛɛ sálàá a mɔima sálàn mɛɛ navaa tovaa kan, saa kóndóa kan a saa téndéa kan co sɛ́lɛ́ yɛ, mì la soli sálà kon mɛɛ tɔŋ kon dimi yɛ.

³¹ O sálà loamaa solin lepalaa-lepala-o, o dɛɛ sálà kon a o mɔima sálà kon kɔɔli, mì la dii cuin toovio pilɛ le sálà co le hakio sɔlaa malɔɔ-o.

³² Paale ŋɔmmɛwndɔlen, la bɛnda mì la soli sálàá a navaa tovaa nda ŋɔmmɛw, saa kóndóa nda ŋiɔn a saa téndéa nɔ vɔsio pilɛ-a tɔ́ a à hiɔɔlu, cɔlua kan kpow a bɛnda mà nɔ lenamta le.

³³ Mì la handu dɛɛ sálàá a mɔima sálàn mɛɛ navaa tovaa kan, saa kóndóa a saa téndéa kan a co sɛ́lɛ́ yɛ, mì la soli sálà kon mɛɛ tɔŋ kon dimi yɛ.

³⁴ O sálà loamaa solìn lepalaa-lepala-o, o dɛɛ sálà kon a o mɔima sálà kon kɔɔli, mì la dii cuin toovio pilɛ le sálà co le hakio sɔlaa malɔɔ-o.

³⁵ Paale ŋɔmaandɔlen niaa siownin kafo niaa ni. La bɛnda mì la cuungian paale len le kaannden tosaa. La bɛnda mì la tosa ɲinkon vali niaa dema tosa-o le.

³⁶ Mì la soli sálà loamaa, sálà ŋɔa o yin mì tuei ndu cun, mì ɲɔɔ hɛnan ya-o a naw tovaa o pilɛ, saa kóndóó o pilɛ a saa téndéa nɔ vɔsio pilɛ-a nda ŋɔmmɛw. Cɔlua kan kpow a bɛnda mà nɔ lenamta le.

³⁷ Mì la handu dɛɛ sálàá a mɔima sálàn lecoo mɛɛ o bɛnda le naw tova kon, saa kóndó kon a le saa téndéa kan yɛ, mì la tosa mɛɛ tɔŋ kon dimi yɛ.

³⁸ O sálà loamaa solin lepalaa-lepala-o kɔɔli, o dɛɛ sálà kon a o mɔima sálà kon kɔɔli, mì la dii cuin toovio pilɛ le sálà co le hakio sɔlaa malɔɔ-o.

³⁹ Sálàla niaa bɛnda le ya Mɛlɛka solullo o telen kafola niaalan-ndan la co lán ni. Lan niaa vanin ya solullo o sálàla niaa kelu o kɔlta niaalan nin-ndan, o sálàla niaa soli le yoolen timbio lan, o sálàla niaala loamaalan, o sálàla niaala kpeyanndan, o sálàla niaala mamɔilan a o sálàla niaala kɔlɲululan kɔɔli ni.»