Kundalan 27 - BII BILA

Vanlaandua bɛnda mà lo o kɛ́ɔ coo-a

¹ Selofad, fulaa o polale Yosɛf len coo, ndóò velu vanlaandua nda ŋuɛɛnu. Manase velu Makir ni, mí Makir vialu Kalaad, mí Kalaad vialu Hefɛr, mí Hefɛr vialu Selofad kon. Cuavaa laandua ŋuɛɛnua Selofad kon velu-a va haa ni: Mala, Noa, Hɔkla, Milka a Tirsa.

² Má hun o Moise, Eleasar a vanaa bɛndua Israɛlla lo nɛɛ nda va o cɛi-kola-toandaa-labɔɔŋianndo sondoo-a, ma dimi aa:

³ «O lɛŋnde veselɛilen nin fuɲa naa vi ni, kɛ o ve o kunda Kore simul Mɛlɛka-o nin te. Le tɛɛmbuu ndɔ ndu pilaa o vi ni, kɛ o mɛi hɔ́ɔ́ piaandu le.

⁴ Kɛ vɛ̀ɛ̀ le tùú o mɛi po loo mì diola fuɲa naa la ɲum o yungu ndɔɔ coo? Lelan, naa bɛɛ yɔngu naa kɛ lelɛŋndo ó naa mɛɛ n yɔngu puapilɛa fuɲa naa yɛ.»

⁵ Mí Moise ke Mɛlɛka sɔɛi ken.

⁶ Mí Mɛlɛka mulul ndu aa:

⁷ «Cuavaa Selofad-a nɔ dí. Á bɛnda mà yɔngu nda lɛŋnden kɛ́ɔ mɛɛ n yɔngu puapilɛa fuɲa nda-a yɛ. Yɔngu nda fonda fuɲa nda ndóò bɛnda le sɔlaa-o kɛ́ɔ.

⁸ O kon kɔɔli, dimul Israɛlla aa te vanapɔnɔɔ vi pɛ mo mɛi hɔ́ɔ́ piaandu le, la yɔngu cua ndɔ laandoo kɛ́ ndɔɔ.

⁹ Te o nɔ vɛlɛ hɔ́ɔ́ laandu le, la yɔngu puapilɛa ndɔa kɛ́ ndɔɔ.

¹⁰ Te o nɔ puapilɛ le, bɛndaa fuɲa ndɔa, te kon te pɔmbɔa fuɲa ndɔa loo kɛ́ ndɔɔ.

¹¹ Te fuɲa ndɔ ndóò nɔ bɛndu, te kon te pɔmbɔ le, la yɔngu vana nda co vanayɛi kpeekpei-yo kɛ́ kon, vana kon loo ndu. Israɛlla bɛnda mà bii sɔɛi ken mɛɛ ya dimul nɔm yɛ.»

A hɛli Yosue le muungoo o fonda Moise-o

¹² Mí Mɛlɛka dimul Moise aa: «Hel o pembii Abarimnda he coo, ma mɛɛndan lɛŋnde ya co Israɛlla yɔngu len.

¹³ A cii pɛ len mɛɛndan kpede, a dem fuɲaa nɔmaa mamaa ciee-piɔ́m maa Aarɔn bɛ nɔm.

¹⁴ Kani diom nuu niaa sɛɛngiaa o lɛŋnde veselɛilen Sin nin telen Israɛlla va ya simullo-o ni. La cɔm nda maa o diandaa le ya Mɛlɛka co le mɛnndan solio le. Sɔɛi mɛnndan Meriba, dɛnɛ tosan Kadɛs o lɛŋnde veselɛilen Sin nin-ndo pɛɛn.»

¹⁵ Mí Moise soaa o Mɛlɛka lo, mó dimul ndu aa:

¹⁶ «Màá nɔm Mɛlɛka Hala pila, nɔm nɔ yoomu ɲɛm yooman cɔwnun-ndon kpow o ba-o hɛli simlacinɔɔ le vannda ha!

¹⁷ Vana nɔla mò sim nda laci o cɔwvo-o, o nɔla mò cɔm vanaa cɔwva taasila cɔwlan-ndo, yɔŋii kunda Mɛlɛka-o siŋnun maa cɔlua nɔ vana mandaa le-a.»

¹⁸ Mí Mɛlɛka dimul Moise aa: «Cua Yosue, po Nun-ndo, o Kɔl nuu co nin-ndo, ma handu ndu baa coo.

¹⁹ Ma simi ndu Eleasar vana-solia-lasálàá a sɛ́lɔ́ɔ́ kpow o hɔl, ma siinguu ndu vana bɛnda le fonda nɔmndo cuaa-o nda kpow o hɔl.

²⁰ Ma ke ndu kpaaya nɔmndo o tiŋ, haliko mi Israɛlla bii sɔɛi ndɔɛi.

²¹ O simnin Eleasar vana-solia-lasálàá o hɔl, mì Eleasar ɲuna ya Mɛlɛka a urim le dɛnɛ ndɔɔ. Mɛɛ o diminin yɛ Yosue a sɛ́lɛ́ Israɛlla kpow a tosanin o dɛnndan kpow nin ni.»

²² Mí Moise tosa mɛɛ Mɛlɛka dimul ndu yɛ, mó hun a Yosue, mó simi ndu Eleasar vana-solia-lasálàá a sɛ́lɔ́ɔ́ kpow o hɔl.

²³ Mó handu ndu balan coo, mó pɔla ndu le vali o bɛnda le tosaa-o mɛɛ Mɛlɛka pila dimi a sondo Moise-o yɛ.