Kundalan 25 - BII BILA

Israɛlla luɛi piɔmnda sooloo

¹ Telen Israɛlla va Sitim-ndo, mí vanpiaandua kandu laasianndo o suundaa nin a vanlaandua Moab.

² Mí vanlaandua kan a nɛlanɛla nda le piɔmaa ndaa sálàlan solullo nda ndaa. Mí Israɛlla a va kulon dioo nda ndaa, ma va vulan baŋɔɔ piɔmaa ndaa o labɛngunin.

³ Lende Israɛlla siinguu piɔmndo Baal-Peɔr ɲɛ nda biilaa ni, mí Mɛlɛka tuulu kɔl a nda.

⁴ Mó dimul Moise aa: «Cua vanaa co bolii lapangɛi-ya kpow, ma landu nda o paalen ya o hɔl, haliko mi kɔl ni tuw bɛndoo ɲulul, mò kpakpala Israɛlla.»

⁵ Mí Moise dimul vanaa kialaa n'yamaa Israɛlla aa: «O niaa tɛɛn, vana-vana diw vanaa ndɔa co piɔmndo Baal-Peɔr sooloo-a.»

⁶ A telen kon kpafii, mí langbanɔ Israɛlnɔɔ pum va hunɔɔ a cuaambɔ laandu Madiannɔɔ pum. Moise nda Israɛlaa tɔ̀a kpow a va icali caŋndo a mɔnɛi o cɛi-kola-toandaa-labɔɔŋianndo sondoo, má ca nda.

⁷ Mɛɛ Pineas, po Eleasar-o, po imama Aarɔn vana-solia-lasálàá ce lende, mó can vannda tɛɛn tangban, mó cua bállo,

⁸ mó lo kɔlan Israɛlnɔ kon kɔɔli háá o cɛi-kola-toandaa ndɔɔ nin. Mɛɛ nda tiiya lon, mó cuku nda dembelan a bállo lepilɛ kpé, mó diw nda nda ŋiɔn kpow, langbanɔ kon a cua laandu kon. Tosaa dɔ́ɔ́ lende, mí kpundɛ va Israɛlla coo-o pɛngi tosanndo.

⁹ Kɛ kpundɛ kalaa ndóò diw nin vannda vaalan bidiin a lahiɔɔlu.

¹⁰ O kon, mí Mɛlɛka soaa o Moise lo, mó dimul ndu aa:

¹¹ «Pineas, po Eleasar-o, po imamaa Aarɔn-ndo faŋa kɔl ni tuwvo Israɛlla coo, kani o tosa paŋalaa le ya o nda tɛɛn. Kon tosa ni, i cii Israɛlla diw a kɔltuwvo le paŋalaa le.

¹² Lelan, dimul ndu Pineas maa i yii kpema kɔlɲuloo naa ndu tɛɛn.

¹³ Kpema kon yɔngu ndu dío le lou o vali solia lasálàá coo le fɛɛn a fɛɛn, kandɔɔ a ndu pila, kɔ bii a polale ndɔlen fɛɛn-fɛɛn. Kani o tosa paŋalaa le Hala ndɔɔ, mó tosa vɛlɛ faleŋii baŋannde Israɛlla coo.»

¹⁴ Langbanɔ Israɛlnɔ ó dii kon nda cuaambɔ laandu Madiannɔɔ-o diolan aa Simri, po Salu-o, Salu kon va bolle pangalen lepilɛ o polale Simeɔn-nden coo.

¹⁵ Cuaambɔ Madiannɔɔ ndu, diolan aa Kɔsbi, cua Sur-o. Sur kon va bolle pangalen le yungulan taw o polale Madiannda lepum coo ni.

¹⁶ Mí Mɛlɛka soaa o Moise lo, mó dimul ndu aa:

¹⁷ «La del Madiannda coo mì la diw nda.

¹⁸ Kani a siŋnun yaamɔaa niaa, má tosal niaa kɔlvesɛiyo o dɛnɛ Peɔr-o nin a o dɛnɛ Kɔsbi-o nin, cua vana nda bɛndoo pum. Cuaambɔ kon sɔla piɔ́mndo telen nàà halimaa va Israɛlla coo le sɔɛi piɔmndo Baal-Peɔr ni.»

A sɛva vɛlɛ Israɛlla sɛva sɛnɛi

¹⁹ O kpundɛ kon kɔɔli,