Biblia Todo Logo
Bìoball air-loidhne

- Sanasan -

Kundalan 20 - BII BILA


Mɛnndan Meriba
( Fulaa 17.1-7 )

1 O paangii tasei o vɔsi kon nin, mí Israɛlla kpow a tiiya o lɛŋnde veselɛilen Sin nin, má kila dɔ́ɔ́ngɔ́ ndaa Kadɛs. Lon Miriam vi ni, lon koni nda kumbu ndu ni.

2 Mɛmma kolaama ve lon te, mí Israɛlla cuungian, má simul Moise nda Aarɔn.

3 Má ciŋilan Moise, má dimul ndu aa: «O co fisa mí náà n vinnun telen puapilɛa naa va vuo Mɛlɛka o hɔl-lo.

4 Le kɔlɔ yɛɛ niaa hin yɛ a kunda Mɛlɛka-o o lɛŋnde veselɛilen nden nin? Vɛ̀ɛ̀ le naa diwvo a cɔlua naa niaa hin a naa ni?

5 Le yɛɛ niaa faŋa yɛ naa Esipte mí la hun a naa o mɔnɛi he nin? Vana nɔla ɲɛ-ɲɛ vàà nanu le. Voosu tum co nanu le, rɛsɛn tum co le, krenadiee co le. Hali mɛmma kolan ma co nanu le.»

6 Mí Moise nda Aarɔn a faŋan sɛ́lɔ́ɔ́ ikɛi, má kɔa o cɛi-kola-toandaa-labɔɔŋianndo sondoo, má deli lɛŋ ndon a kuumbuannda o kɔl coo. O kon, mí biilu Mɛlɛka-o cɔmnun nda.

7 Mí Mɛlɛka soaa o Moise lo, mó dimul ndu aa:

8 «Cua tinda nɔmndo mì la cuungiaa sɛ́lɔ́ɔ́ nɛɛ pilɛ niaa Aarɔn bɛ nɔm. A cuungian pɛ, la dimul pow kpovaa ho nda o hɔl le mɛmma ndɔan yɔngoo. O kon, a solul sɛ́lɔ́ɔ́ mɛnndan o pow kpovaa ho, a koesi nda a cɔlua ndaa.»

9 Mí Moise cua tinda va kon o kɛsiaa Mɛlɛka o hɔl-lo mɛɛ mɛlɛka pila dimul ndu yɛ.

10 Mí Moise nda Aarɔn a veelu sɛ́lɔ́ɔ́ kpow o pow kpova Mɛlɛka cɔm kon-ndo hɔl-ndɔ, mí Moise dimul nda aa: «La yaŋ-ndɔ nilan, niaa vanaa nila kalua ha. Vɛ̀ɛ̀ n tiwba mì n solul niaa mɛnndan o pow kpovaa ho?»

11 O kon, mí Moise heelu ba ndɔɔ coo, mó lɔaa pow kpovaa lediin a tinda ndɔɔ. Mí mɛnndan ma fula taw-taw. Mí vanndacieea a cɔlua kol, má pum ca.

12 Kɛ mí Mɛlɛka dimul Moise nda Aarɔn aa: «La lo o diomnde nilen coo le, la cɔm diondɔɔ nuu Israɛlla o hɔl te. Lelan, o co lɛ niaa le tiiyanin a sɛ́lɔ́ɔ́ ho o lɛŋnde ya yɔngu nda len nin te.»

13 Lelan mɛmma man má sɔla diolan ni aa mɛnndan Meriba (kon co dimio ni aa «Mɛmma lasɛɛngianndan»), kani lon Israɛlla nuwviaa sɛɛngianndo Mɛlɛka o n'dial ni. Lon o cɔm diondɔɔ ndɔɔ nda o hɔl ni.


Masaa Edɔm kɛɛ le Israɛlla malɔɔ hiovɔɔ

14 A lo Kadɛs, mí Moise viam kiilaa o masa va Edɔm-ndo lo le ndu dimullo aa: «Cuavaa puapilɛ nɔmndo Israɛl a soaa nuaa ni: Nɔm pila sina sangala kei naa coo lan kpow.

15 Fuɲaa naa mamaa kɔɛ sindɛ o lɛŋnde Esipte len nin ni, mí naa cuavaa ndaa n cii vɔsila bɔɔ-bɔɔ lon. Kɛ mɛɛ Esiptea luei nda mɔnɛi tei, má mulin vɛlɛ má tuisi naa pila sangaa coo taw.

16 O kon mí n koŋul Mɛlɛka o lani, mó tuɛi somisomin naa. Mó viam mɛlɛkanɔɔ, mo kɔ faŋa naa Esipte lon. Sunsun, n tiiya Kadɛs, kobi co o lɛŋnde nɔmnden mɛɛlulan-ndo.

17 Lelan, cɛl yandi mì n kei o lɛŋnde nɔmnden nin. N keinin o ciɛɔn niaan nin te, n keinin o nakɔla niaala n'rɛsɛnndan nin te. Hali mɛmma co o soonnda kólaala niaalan nin-ndan, n kolnin man te. O nɛi bɛndoo coo sanaa naa n co lakɔ ni, háá mì n cii lɛŋnde nɔmnden taŋɔɔ, n seinin o ba kɛndɛ coo le, n seinin o ba mɛl coo le.»

18 Mí masa va kon Edɔm-ndo mulul nda aa: «La kei o lɛŋnde nilen nin te. Te la pila pɛ pelei lenin, i del niaa coo a cɔwvo.»

19 Mí vanaa Israɛlla vem nda dimul ndu aa: «Nɛi bɛndoo sanaa naa n co lakɔ kɔɔli ni, te naa pila a cɔlua naa n kol pɛ mɛmma nɔmndan, n dɔw man vɔngu. N ɲuna nɔm ɲɛ-ɲɛ celen te, fɔ le naa cɛlɔɔ mì n kei o lɛŋnde nɔmnden nin a n'pelu.»

20 Kɛ mí masaa Edɔm dimul nda aa: «La kei nanu le.» O kon, mí Edɔmnda can kundala bɛndulan, má kɔa Israɛlla diomɔɔ a vanaa cɔwva taw-taw.

21 Mɛɛ masaa Edɔm kuuna Israɛlla le keiyo o lɛŋnde ndɔlen nin, má bii kɔlan a nɛi celen.


Piɔ́m Aarɔn-ndo

22 Mí Israɛlla faŋan Kadɛs kpow, má tiiya o pembei Hɔr,

23 o lɛŋnde Edɔm-nden mɛɛlulan. Mí Mɛlɛka dimul Moise nda Aarɔn aa:

24 «O lo ɲɛ-pɔmbɔ mì Aarɔn dem vanaa ndɔa ciee-piɔ́m. O lueinin o lɛŋnde ya yɔngu Israɛlla len nin te, kani la sɛɛngiaa ya a dɛnɛ mɛnndan Meriba o kɔɔ.

25 Lelan, cua Aarɔn nda Eleasar po ndɔ, ma hel a nda o pembei Hɔr coo.

26 La tiiya pɛ, a soli Aarɔn volɔɔla ndɔla solia lasálàlan lekɔɔ, a vow Eleasar po ndɔ lan. Lon Aarɔn co vanaa ndɔa diomɔɔ ciee-piɔ́m ni, lon o co vu ni.»

27 Mí Moise tosa ɲɛ-ɲɛ Mɛlɛka dimul ndu, má hel o pembei Hɔr coo nda yáá Israɛlla kpow o hɔl.

28 Mí Moise soli Aarɔn volɔɔlan lekɔɔ, mó vow Eleasar po ndɔ lan. Mí Aarɔn vu o pembei tullo lon. Mí Moise nda Eleasar a toal pembei.

29 Mí sɛ́lɔ́ɔ́ kpow ca maa Aarɔn vi. O kon, mí Israɛlla kpow a tosa biisi ndɔɔ o palɛi beleyaa bɛngu.

© Alliance Biblique en Guinée

Bible Society in Guinea-Conakry
Lean sinn:



Sanasan