Kundalan 19 - BII BILA

Mɛmma dindianndan

¹ Mí Mɛlɛka soaa o Moise nda Aarɔn ndo, mó dimul nda aa:

² «La tofa vɔ silala co o tɔŋ Mɛlɛka yɔngu-o nin-ndan: la dimul Israɛlla mà hin a naw siaŋaa o pilɛ, o nɔ lenamta loo, o nɔ sɔŋ too, o nda hendu vɔ yɔm lebol o lebol too.

³ La hin pɛ a ndu, la yɔngu Eleasar vana-solia-lasálàá ndu. Eleasar kɔɛ a ndu o dɔ́ɔ́ngɔ́ɔ̀ kɔɔli, a kelu ndu bololan ndu o hɔl.

⁴ Eleasar cua kooma ndɔan a isu, o vesul man bɛmbɛ leŋɔmmɛw o cɛi-kola-toandaa-labɔɔŋianndo laci.

⁵ O kon, a lom naw kon ndu o hɔl, kandɔɔ a yáwvo, visin bɛɛnndon, koovan, kɔ bii a ɲɛm co ndu o dembe-on kpow, a lom mun o yinnden nin.

⁶ O kon kɔɔli, vana-solia-lasálàá cua yɔm sɛɛdre, bil hisɔp, kɛi nda yin yinɔɔ siaŋaa vólotótoo-o, o vuu ɲɛm mun o yin nɛɛ nawvo co ŋɔu-va.

⁷ O cii pɛ tosa lende, o tɔɔ volɔɔla ndɔla cuɛinanndan, ndu pila pulun cɛ́kɛ́lɛ́ malan o muungu o dɔ́ɔ́ngɔ́ɔ̀ nin. O va bɛɛ lende, o lonin o nɔɔlɛiyo Mɛlɛka o hɔl háá icɔllo.

⁸ Vana loamnin naw kon-ndo bɛɛ bɛnda mò tɔɔ volɔɔla ndɔlan, mì ndu pila pulun, mò lo o nɔɔlɛiyo Mɛlɛka o hɔl háá icɔllo.

⁹ Mì vana co o diandaa Mɛlɛka o hɔl-lo kɔndu pulta naw ŋɔalɛi kon, mò kɔ kɛsi lan o dɔ́ɔ́ngɔ́ɔ̀ kɔɔli, nɛɛ diandaa pum, lon pulta lan la vanin la mandaalan le sɛ́lɛ́ Israɛlla ni, haliko ma va mɛmma dindianndan toosiaa a lan. Sálà co le hakio sɔlaa malɔɔ-o co kon ni.

¹⁰ Vana kɔandunin pulta naw kon-ndan bɛɛ bɛnda mò tɔɔ volɔɔla ndɔla cuɛinanndan, mò lo o nɔɔlɛiyo Mɛlɛka o hɔl háá icɔllo. Silaa co hoo le fɛɛn a fɛɛn ni, le niaa cuavaa pilacieea Israɛl a le mialaa co niaa icali tɛɛn-nda.»

Tɔŋndo a dindinndo o kɔɔ

¹¹ «Vana-vana pilan pɛ vana vílɛ́iyo, mɛ̀ɛ́-mɛ̀ɛ́ o va, ndu siŋnun vana nɔɔlɛiyo ya Mɛlɛka o hɔl le palɛi ndii ŋɔmmɛw.

¹² Te o dindin pɛ o paale yàándɔlen a o paale ŋɔmmɛwndɔlen coo a mɛmma diandaama man, mɛɛ o siŋnun vana diandaa Mɛlɛka o hɔl. Te o tosa lende le, mɛɛ o lonin-ndɔ o nɔɔlɛiyo.

¹³ Te vanndo pilan pɛ vana vílɛ́iyo, mò saalan le dindinndo le, mɛɛ vana kon nɔɔliaa Calta Mɛlɛka lan. Lelan, a bɛnda ma faŋa ndu Israɛlla tɛɛn, kani le tùú mɛmma dindianndan ma hulun ndu coo loo, nɔɔla ndɔɔ co vɔ ndu coo.

¹⁴ Te vanndo vi pɛ o cɛi-kola-toandaa pum nin, tɔŋ niaa bɛnda le lou kɔɔli-o co hoo ni: vanaa luɛinin o cɛi-kola-toandaa kon nin-nda a vanaa va lenin mó vu-a kpow a bɛnda ma lo a nɔɔlɛiya Mɛlɛka o hɔl háá palɛi ndii ŋɔmmɛw.

¹⁵ Ɲɛi laandu oo ɲɛi laandui va pɛ lenin sondo fondo, mì kumbu ve lecoo le, ndi siŋnun inɔɔlɛi Mɛlɛka o hɔl.

¹⁶ Te vanndo pilan pɛ vana vílɛ́i vanacieo dii-o, te kon te vana vi a ba ndɔ-o yondoo nin di-di, te kon te o boŋ pɛ o paala vanacieo, te kon te mò kei o sɛiyo coo, vana kon bɛnda mò lo o nɔɔlɛiyo háá le palɛi ndii ŋɔmmɛw.

¹⁷ Le ndu dindio, a bɛnda ma cua pulta naw nda lom le sálàá solio le hakio sɔlaa malɔɔ lan, ma vow lan o hɛngɛiyo nin, ma vow mɛmma peean lecoo.

¹⁸ Mì vana co o diandaa ya Mɛlɛka o hɔl-lo cua lɛvii bil hisɔp, mò yin ndi o mɛnndan nin, mò vesul man o cɛi-kola-toandaa vanacieo vi nin-ndo, ma vesul vɛlɛ man o ɲɛm-laandun va lenin-ndon a o vanndacieea va lenin-nda kpow coo. Mò tosa vɛlɛ lende a vana pilan paalan-ndo, vana pilan vanaciee vanndo dii-o, te kon te o vi a ba ndɔ-o, te kon te vana pilan sɛiyo-o.

¹⁹ Mì vana co o diandaa-o vesul vana co o nɔɔlɛiyo-o man o paale yàándɔlen a o paale ŋɔmmɛwndɔlen coo. O paale ŋɔmmɛwndɔlen, o dindin few-few a tɛɛmbuu ndɔ kon, vana co o nɔɔlɛiyo-o tɔɔ volɔɔla ndɔla cuɛinanndan, ndu pila pulun cɛ́kɛ́lɛ́, icɔllo o muungu o diandaa.

²⁰ Kɛ te vana nɔɔla-o dindin lende le, a bɛnda ma faŋa ndu caanda tɛɛn few. Kani cɛi-kola-toandaa diandaa o co nɔɔliaa kon ni. Le tùú mɛmma dindianndan ma vesulun ndu loo, o lo o nɔɔlɛiyo.

²¹ Tɔŋndo co hoo le nda le fɛɛn a fɛɛn ni. Vana vesulnin mɛmma dindiamma man-ndo bɛnda mò tɔɔ volɔɔla ndɔla cuɛinanndan. Vana pilan pɛ mɛmma man, o lonin o nɔɔlɛiyo háá icɔllo.

²² Ɲɛ-ɲɛ vana co o nɔɔlɛiyo-o pilan pɛ, ɲɛ kon bɛɛ siŋnun o nɔɔlɛiyo. Vana-vana pilan pɛ ɲɛ kon, vana kon lo o nɔɔlɛiyo háá icɔllo.»