Kundalan 18 - BII BILA

Valta yɔngun vanaa-solia-lasálàá a leviia lan

¹ Mí Mɛlɛka dimul Aarɔn aa: «Nɔm, cuavaa-imamaa nɔmnda a vanaa fula o polale nɔmnden nin-nda, niaa cɛi-kola-toandaa diandaa co va o ba le fɛɛn a fɛɛn ni. Te biondɔnndo yɔŋnun pɛ o cɛi kalaa nin, niaa sɔɛi ken vanin o lebol ni. Handɔɔ o kon coo, te biondɔnndo yɔŋnun pɛ a vali solia lasálàá o kɔɔ, niaa sɔɛi ken vanin o lebol ni.

² Sɔɔngun puapilɛa nɔmnda ikɛi, a niaa fula latulu o polale fuɲa niaa mamaa Levii len nin-nda, mì nda va nɔm malaa niaa cuavaa nɔmaa imamaa o vallo nin, vali niaa vanin tosaa o cɛi-kola-toandaa kesu kpemaa co nin-ndo sondoo-o pɛɛn.

³ À vanin nɔm o ba bɛngu mà tosa vallo a cɛi-kola-toandaa kon kpow o kɔɔ. Kɛ à bɛnda mà sɔɔnguu o fonda-loamaa-lasálàá a o ɲɛm-laandun solia lasálàn co le cɛi-kola-toandaa diandaa kon-ndon ikɛi le, yɔŋii nda kondu niaa dɛnɛ mì la sɔla piɔ́mndo niaa ndaa vellaa-velle.

⁴ À vanin nɔm o ba bɛngu mà va valta bɛnda le tosaa lan tosaa o cɛi-kola-toandaa-labɔɔŋianndo nin kpow, kɛ vana celen bɛnda mò sɔɔnguu niaa ikɛi le vali kon te.

⁵ Niaa vanin baalaa tosaa o cɛi-kola-toandaa diandaa nin a o fonda-loamaa-lasálàá coo ni. O tosan pɛ lende, kɔl ni tuwvo tul-lɛnin Israɛlla coo le.

⁶ Kani ya pila hɛli puapilɛa niaa, leviia o Israɛlla tɛɛn ni mí sɔaa nda niaa o ba bɛngu, bau ya Mɛlɛka kan yɔngun ni, haliko ma va valta co a cɛi-kola-toandaa-labɔɔŋianndo o kɔɔ lan tosaa.

⁷ Nɔm Aarɔn pila a cuavaa nɔmaa imamaa yɛ, la bɛnda mì la tosa vali solia lasálàá a ɲɛ-ɲɛ co a fonda-loamaa-lasálàá o kɔɔ a á ɲɛ-ɲɛ co o kola-landaa kɔɔli o kɔɔ, vali yɔngun niaa-o co kon ni. Vali solia lasálàá ya yɔngu niaa ni. Vana celen sɔɔnguu pɛ ikɛi o sɔla piɔ́mndo.»

Ɲɛ vanaa-solia-lasálàá bɛnda le sɔlaa-o

⁸ Mí Mɛlɛka soaa vɛlɛ o Aarɔn ndo aa: «Ya pila yɔngu nɔm ɲɛ-ɲɛ Israɛlla co faŋaa le ya o ɲɛm diandan nda co ya sálàá solullo-on kpow coo ni. Nɔm a poaa nɔmnda ya yɔngu ɲɛm mun ni few. Sɔɛi kelun-nde co ken le fɛɛn a fɛɛn ni.

⁹ Ɲɛ n bɛnda le sɔlaa o sálàla diandaa-diandaalan nin-ndo vanin hoo ni: a cii pɛ o nda bɛnda le ya yɔngoo o sálàla ɲɛm-vaalan kpow nin, o sálàla co le hakio sɔlaa malɔɔ lan kpow nin a o sálàla-bɛɛndiaa-isɔɔlan kpow nin-ndo faŋa, ɲɛ tɔ̀ co lo-o, ó lumnunnin o yin too, nɔm nɔ ɲɛm diandaa-diandan mun niaa poaa nɔmnda ni.

¹⁰ O nɛɛ diandaa-diandaa pum niaa bɛnda ni mi la de mun, vanpiaandua kínɛí a bɛnda ni mà de mun. A bɛnda mà ce mun maa ɲɛm diandan n co ni.

¹¹ O kon kɔɔli, a bɛnda ma bii ɲɛm nda faŋanin o ɲɛm-kéan ndan coo-on nda o ba, kon co dimio ni aa ɲɛ-ɲɛ Israɛlla solul-la sálà a faleŋii vana cɔm Mɛlɛka ɲɔɔ-e tosaa. Nɔm Aarɔn, poaa nɔmnda a cuavaa nɔmaa laandua ya yɔngu kon kpede ni. Tɔŋ vana faŋa lecoo loo co kon ni. O yungule nɔmnden nin, vanaa-vanaa va pɛ a diandaa, nda bɛnda le ɲɛm mun dioo ni.

¹² I yɔngu nɔm vɛlɛ ɲɛm tasen nda yɔngunin ya o cuɛiyan nin, o mɔima yɛngian nin a o ɲɛm koavan nin-ndon,

¹³ a ɲɛm tasen nda yɔngunin ya o tɔlɔɔla nda vanin sɔlaa o lɛŋnde len nin-ndan nin-ndon. Vanaa-vanaa va pɛ a diandaa o yungule nɔmnden nin, nda dianin ɲɛm mun ni.

¹⁴ O lɛŋnde Israɛl-ten nin, ɲɛ-ɲɛ nda yɔngu pɛ Mɛlɛka fasɛi, nɔm nɔnin kon ni.

¹⁵ Poaa tasea a cɔlua piaandua tasea Israɛlla yɔngu ya-a, kan vanin le nɔm fasɛi. Kɛ a bɛnda ma tosa mì poaa tasea baŋan, mì cɔlua piaandua tasea co a nɔɔlɛiya Mɛlɛka o hɔl-la bɛɛ a baŋan.

¹⁶ Tosa mì cuaambɔa baŋan o paangei ipilɛ mɛɛ n kialunin vɔngoo yɛ: volin latámán mún ŋuɛɛnu, mɛɛ volin latámán co dionnɔnndo o cɛi-kola-toandaa diandaa nin-ndon co yɛ, lusul volin mun ipilɛ co kalamulan tɔ́.

¹⁷ Kɛ cɛl mì vana baŋa naw tova tasoo, saa kóndó tasoo a cuin toovi tasoo le, kani a diandaa nda co Mɛlɛka o hɔl ni. A bɛnda ma fasaŋiaa kooma cɔlua kan o fonda-loamaa-lasálàá coo, ma lom visin macuɛiyon o yin, sálà ŋɔa o yin-ndo co kon ni, o ya tuɛi cun mì ɲɔɔ hɛnan ya-o.

¹⁸ Le nɔm visin ndan vanin ni mɛɛ kɔŋɔ niaa cɔm ya Mɛlɛka a faleŋii vana cɔm ya ɲɔɔ-e tosaa-e a lɔlu ba kɛndɛ cɔlu sálà kɔlɲuloo co le nɔm yɛ.

¹⁹ Ɲɛm diandan Israɛlla faŋa le ya Mɛlɛka o sálàla ɲɛm-vaala ndalan coo-on, nɔm Aarɔn, poaa nɔmnda a cuavaa nɔmaa laandua ya yɔngu mun ni. Tɔŋ vana fáŋà lecoo loo co kon ni. Kpema vana nɔla tɛɛmbuu ma faŋa ndu o fonda ndɔɔ loo co kon ni, o ya Mɛlɛka handu ba coo le dɛnɛ kɛndɛ nɔmndo a dɛnɛ kɛndɛ cuavaa nɔmaa imamaa-o.»

²⁰ Mí Mɛlɛka dimul vɛlɛ Aarɔn aa: «A nɔnin lelɛŋ, te kon te kɛ́ o lɛŋnde ya yɔngunin Israɛlla len nin te, a sɔlanin ɲɛ-ɲɛ o nda tɛɛn te, kani ya pila co ɲɛ-sɔlaa nɔmndo a kɛ́ nɔmndo o Israɛlla tɛɛn ni.

²¹ Kɛ́ ya yɔngu polale Levii len-ndo co o-tɔ́ndɔla Israɛlla vanin yɔngoo o ɲɛm ndan nin-ndan ni. I yɔngu nda kon le vali nda co tosaa o cɛi-kola-toandaa-labɔɔŋianndo nin-ndo.

²² O tosan pɛ lende, Israɛlla bindun ndɛnin ma sɔla piɔ́mndo le sɔɔnguuo o cɛi-kola-toandaa-labɔɔŋianndo ikɛi le.

²³ Leviia daama bɛnda le vali cɛi-kola-toandaa-labɔɔŋianndo tosaa ni, te biondɔn tosan pɛ lenin, sɔɛi ndɛi co ken ni. Le fɛɛn a fɛɛn, kandɔɔ a niaa pila kɔ bii a cuavaa niaa imamaa, silaa co hoo ni, à sɔlanin kɛ́ lelɛŋ o Israɛlla tɛɛn te.

²⁴ Kani o-tɔ́ndɔ Israɛlla vanin faŋaa o ɲɛm ndan coo le ya Mɛlɛka-o ya yɔngu nda kɛ́ɔ ni. Lelan ya dimul nda ni maa a nɔnin lelɛŋ o Israɛlla tɛɛn te.»

²⁵ Mí Mɛlɛka soaa vɛlɛ o Moise lo, mó dimul ndu aa:

²⁶ «Dimul leviia aa: ‹Te la sɔla pɛ o-tɔ́ndɔ ya yɔngu niaa maa kɛ́ fulaa Israɛlla o ba-o, niaa bɛɛ la faŋa o-tɔ́ndɔɔ lecoo le ya Mɛlɛka sálàá solullo, o-tɔ́ndɔ fula o o-tɔ́ndɔɔ nin-ndo co kon ni.

²⁷ Sálà niaa solinin kon-ndo vanin maa sálà ɲɛm vaa nda faŋa o kullon coo o kpele lɔaa n'mallo coo-o a o nda faŋa o mɔima sɛnɛima nda co bɛɛndiaa-an coo-o.

²⁸ Lende niaa bɛɛ bɛnda ni mì la faŋa sálà ɲɛm vaa le ya Mɛlɛka o o-tɔ́ndɔ niaa vanin sɔlaa Israɛlla o ba-o kpow coo, mì la yɔngu vana-solia-lasálàá Aarɔn ndu maa sálà ɲɛm vaa le ya Mɛlɛka.

²⁹ O ɲɛ-kea oo ɲɛ-kea niaa vanin sɔlaa nin, la bɛnda mì la faŋa o co le sálàá solio o ya Mɛlɛka lo-o. O ɲɛm hiow naŋɔɔ-on kpow coo, la bɛnda mì la faŋa o co le ya sálàá solullo-o.›

³⁰ Ma dimul nda vɛlɛ aa: ‹Te la faŋa pɛ kunda hiow naŋɔɔ-o, o tɔ̀u lo le niaa pila, niaa leviia pɛɛn, o va o n'malu nin, o va o mamɔi nin.

³¹ Fonda oo fonda niaa yeema pɛ, la de ndu lon a yungula niaalan, kani sálà niaa co kon le vali niaa co tosaa o cɛi-kola-toandaa-labɔɔŋian nin-ndo ni.

³² Lɔ́ɔ́ niaa faŋanin kunda hiow naŋɔɔ-o mì la ke ya-o, o ve lɛnin tana le niaa mi la de ɲɛ tɔ̀u le. O kon, la laasiaanin sálàla diandaala Israɛlla vanin solio lan mì la sɔla piɔ́mndo le ken te.›»