Kundalan 16 - BII BILA

Kore simul Moise

¹ Langbanɔɔ pum va diolan aa Kore, po Yisehar-o, fulaa o cuavaa-imamaa Kehat-a nin, o polale Levii len coo, mó cɛlan nda vannda nda yáá fulaa o polale Rubɛn-nden coo: Datan, Abiram po Eliab-o a Ɔn po Pelɛt-o,

² le Moise simullo. Mó cua vɛlɛ Israɛlaa celen kɛmɛ lediin a beleŋuɛɛnu, bolii lapangɛi a vanaa ndáà ke bɛɛlen o kafolan coo-a vanaa kan va ni, vanaa tɔ́ɔ́-a nda va ni.

³ Má kɔ balu Moise nda Aarɔn, má dimul nda aa: «N sanga a dɛnɛ niaa few! Israɛlla kpow a diandaa naa n co le Mɛlɛka ni, nduyɛ Mɛlɛka co naa kpede tɛɛn. Le kɔlɔ yɛɛ niaa niaa co yɛ cɔnnɔnndo maa niaa co vanaa bɛndua o kunda Mɛlɛka-o coo ni?»

⁴ Mɛɛ Moise tuei sɔɛi ken, mó del lɛŋ o kuumbuan o kɔl coo.

⁵ O kon, mó dimul Kore a vanaa o hin-nda aa: «Siɔdii, Mɛlɛka co naa vana co vana ndɔɔ-o cɔm, o co naa vana co o diandaa le simndan ndu o hɔl-lo cɔm. O sɔɔngunnin vana o hɛlinin-ndo ndu ikɛi.

⁶ Ɲɛ niaa bɛnda mì la tosa-o co hoo ni: nɔm Kore a vanaa nɔmnda ha, la cua bonyun fuusan o laba,

⁷ mì la pei siɔdii yinnde ladɛngulten lenin cá-cá, mì la vow ansan lecoo Mɛlɛka o hɔl. Vana Mɛlɛka hɛlinin-ndo mɛɛ ndu co o diandaa le ndu ni. La hiow ba dɛ, niaa fula haa o polale Levii len nin-nda!»

⁸ Mí Moise cɔɔlu handɔɔ o ɲɛ o dimul Kore-o coo aa: «La yaŋ ya nilan ɲɛkɛndɛi, niaa fula o polale Levii len nin-nda.

⁹ Vɛ̀ɛ̀ hɛli Hala Israɛlla hɛli niaa Israɛlaa sɛ́lɛ́a tɛɛn, mó kɛsi niaa ikɛi le ndu sɔɔnguuo o hɔl o Calta Mɛlɛka lan nin a le vallo tosaa o diola ndalan-ndo, la hini kɔl a kon te?

¹⁰ Nɔm Kore a puapilɛa nɔmaa fula haa o polale Levii len nin-nda, Hala cɛl niaa le ndu sɔɔnguuo ikɛi, mí niaa va vali celen yeemaa o vali solia lasálàá kɔɔli.

¹¹ Lelan niaa liiman kpungbɛi le Mɛlɛka simullo niaa kunda nɔmndo ho ni. Kani yɛɛ nɛ Aarɔn co yɛ kpeekpei le ndu simullo a sɛɛngianndo?»

¹² O kon, mí Moise viam vanndo le Datan a Abiram po Eliab-o veeloo. Kɛ má mulul Moise aa: «N co lakɔ le!

¹³ A faŋa naa o lɛŋnde cɔlua a tɔlɔɔlan la naŋ nin taw-taw len nin le naa hunɔɔ diwvo o lɛŋnde veselɛilen nden nin, yee a hini vɔ kɔl a ken te? Bàà a yeema vɛlɛ ma siŋnun masaa naa coo a paa-kala?

¹⁴ Handɔɔ o kon coo, o co o lɛŋnde cɔlua a tɔlɔɔlan la naŋ nin taw-taw len nin te n cuu naa le. O co n'ciɛɛ a nakɔla n'rɛsɛn te n yɔngu naa le. A ca ko aa vanaa sumɛiya naa kpede n co ni? N co lakɔ veelu nɔmndo le few.»

¹⁵ Mí Moise tuulu kɔl taw-taw, mó dimul Mɛlɛka aa: «Cɛl sálà ndaa le. Kabi bɛɛ i bii ɲɛ-ɲɛ nda le, hali sofɛlɛ taaninndo i bii ndu vana pilɛ o ba o nda tɛɛn te. I tosal vɛlɛ vana dɛnɛ vɔɔn o nda tɛɛn te.»

Dɛnɛ palaa tol Kore coo

¹⁶ Mí Moise dimul Kore aa: «Nɔm a kunda nɔmndo, la kɔ siɔdii Mɛlɛka o hɔl niaa Aarɔŋ-aa.

¹⁷ Vana-vana cua bonyii ndɔɛi fuusɛi, mì la vow ansan lenin, mì la kɔ sim Mɛlɛka o hɔl a bonyun niaan fuusan kɛmɛ lediin a beleŋuɛɛnu-on o laba. Nɔm bɛɛ ma cua i nɔmnde o ba, mì Aarɔn bɛɛ cua i ndɔɛi o ba.»

¹⁸ O kon, mí vana-vana cua bonyii ndɔɛi fuusɛi o ba, mó vow yinnde ladɛngulten lenin, mó cucu ansan lecoo. Nda kpow, má kɔ sim o cɛi-kola-toandaa-labɔɔŋianndo sondoo, mí Moise nda Aarɔn bɛɛ a kɔa.

¹⁹ Mí Kore cuungiaa sɛ́lɔ́ɔ́ kpow o cɛi-kola-toandaa-labɔɔŋianndo sondoo, mó vow nda sɔɔn nin le Moise nda Aarɔn simullo. Mí biilu Mɛlɛka-o fula dɔ́ɔ́ sɛ́lɔ́ɔ́ kpow o hɔl.

²⁰ Mí Mɛlɛka soaa o Moise nda Aarɔn ndo, mó dimul nda aa:

²¹ «La faŋan o sɛ́lɔ́ɔ́ ho tɛɛn, kani i co nda tɛɛmbuu sisa»

²² Kɛ má del lɛŋ a kuumbuannda o kɔl coo, má piɛi Hala aa: «Éé Hala! Nɔm co Hala nɔ yoomu ɲaa yoomaa kpow o ba-o, vɛ̀ɛ̀ ma tuulu kɔl a sɛ́lɔ́ɔ́ ho kpow le vana pilɛ cua hakio-o?»

²³ Mí Mɛlɛka soaa o Moise lo, mó dimul ndu aa:

²⁴ «Soo o sɛ́lɔ́ɔ́ ho lo, ma dimul nda le faŋanndo o cɛila-kolala-toandaala Kore, Datan a Abiram-ndan ikɛi.»

²⁵ Mí Moise can, mó kɔa o Datan nda Abiram ndo, kaasoŋaa kɔlkalua Israɛlla va ndu kɔɔli.

²⁶ Mó dimul vannda aa: «La faŋan o cɛila-kolala-toandaala vanaa kɔlvesɛiya ha ikɛi, la pilan ɲɛ-ɲɛ nda le, yɔŋii niaa bɛɛ sɔla piɔ́mndo le yɔŋnda vɔɔnnda ndalan kpow.»

²⁷ O kon mí vannda faŋan o cɛila-kolala-toandaala Kore, Datan a Abiram-ndan ikɛi. Mí Datan nda Abiram fula, má sim o cɛila-kolala-toandaala ndalan sondoo a laandaa ndaa, a hɔ́aa ndaa a á vanayan ndan pum.

²⁸ Mí Moise dimi aa: «Mɛɛ niaa sinanin lekɛ́ndɛi maa Mɛlɛka vem ya le vali ya co tosaa-o tosaa ni yɛ, maa i co ɲɛ-ɲɛ tosa a ba ni le yɛ co hoo ni:

²⁹ Te vannda ha vi pɛ mɛɛ vanndacieaa tɔ̀a vu yɛ, ma vi o ba ndaa coo maa caaŋaa tɔ̀a, mɛɛ o co Mɛlɛka le vem ya le.

³⁰ Kɛ te Mɛlɛka tosa pɛ dɛnɛ kaamaa, te lɛŋnden le kumbin pɛ mì le mel nda a ɲɛ-ɲɛ nda nɔ, ma tol a kiyɛiya ciee-piɔ́m, mɛɛ la sinanin maa Mɛlɛka nda tɛɛmbuu kɔl ni.»

³¹ Ndóò ciiyo dɔ́ɔ́ sɔɛi ken dimio, mí lɛŋnden le piɔl Datan nda Abiram o labɛngunin.

³² Mí le kumbin, mí le mial nda a vanaa ndaa kpow, a vanaa va Kore kɔɔli-a a ɲɛm ndan kpede.

³³ Mí vanaa kan toal a kiyɛiya ciee-piɔ́m a vanaa ndaa kpow, mí lɛŋnden le kindan nda coo. Lende nda faŋan vanaa tɔ̀a tɛɛn ni.

³⁴ A lo yeelan, mí Israɛlla kpow a ɲaanun a dimio aa: «N ɲaanun, yɔŋii naa bɛɛ lɛŋnden le miol naa kpow!»

³⁵ Mí yinnden le fula nɛɛ Mɛlɛka va-a, mí le loam n'van kɛmɛ lediin a beleŋuɛɛnua va ansan lomɔɔ-a.