Kundalan 12 - BII BILA

Miriam nda Aarɔn a soo sɔɔn pɔmbɔn a Moise

¹ Mí Moise ndóò cua lanɔɔ pum fulaa o lɛŋnde Kus len nin. Mí Miriam nda Aarɔn a soaa sɔɔn pɔmbɔn le lanɔ ndóò cua kon-ndo.

² Má dimi aa: «Mò va maa o Moise lo koni Mɛlɛka soo ni? Naa bɛɛ o suu ma soaa o naa lo le?» Mí Mɛlɛka tuɛi sɔɔn pɔmbɔn ndan mún.

³ Nduyɛ vana tuisian bɛndoo pila Moise va ni, ndóò hiow tuisinndo a vana-vana o lɛŋnden coo.

⁴ O kon, mí Mɛlɛka dimul Moise, Aarɔn a Miriam aa: «Niaa yaa kpow, la kɔ cɔ́-cɔ́ o cɛi-kola-toandaa-labɔɔŋianndo nin.» Má kɔa lon.

⁵ Mí Mɛlɛka toal o tindile ikumnden nin, mó sim o cɛi-kola-toandaa kon sondoo. Mo veelu Aarɔn nda Miriam, mí nda ŋiɔn kpede a sɔɔnguu.

⁶ Mó dimul nda aa: «La yaŋ-ndɔ nilan o sɔɛi ya co niaa dimul-le. Te vana-tɛɛngaa-diom Hala-o va pɛ niaa tɛɛn, o vundulen nin ya cɔmnun ndu ni, o lɔma sɔlaan nin ya soaa o ndu lo ni.

⁷ Kɛ o co ɲɛ pilɛ le o co a vana ni baalaa Moise le. Ndu ndu, vana lo o lediom coo-o o co o ya lo cɛinin kpow ni.

⁸ Kpendekele ya soaa o ndu lo ni, vakpa o ca ya ni. I suu o ndu lo o levundu nin te. Le yɛɛ nɛ mí la vesa hɔlla mí la soaa sɔɔn pɔmbɔn a vana ni baalaa Moise?»

⁹ Mí Mɛlɛka tuulu kɔl a nda, mó faŋan nda ikɛi, mó kɔannun.

¹⁰ Mɛɛ kumnde faŋan dɔ́ɔ́ o cɛi-kola-toandaa-labɔɔŋianndo coo, mí pongan humbon fula Miriam kɔɔlen kpow maa nàà siaŋa, mí Aarɔn ca ndu a nàà vɔɔn kon.

¹¹ Mó dimul Moise aa: «Vana ni bɛndoo, i sina maa n siŋnun vanaa vɔɔnda. Kɛ o va bɛɛ lende, tuísì naa sanga coo le haki naa n cua o diɔmii nɛi nin-ndo le, yandi.

¹² I tɛɛlun nɔm. Yema naa bɛnda mò va maa cɛlɛkpɛ velun o vílɛ́iyo, mí kɔɔle ndɔlen kpengei pilɛi le va nin tilanndo telen nda velu ndu-o le.»

¹³ Mí Moise tɛɛlun Mɛlɛka aa: «Éé Hala! I tɛɛlun nɔm, singi ndu yandi.»

¹⁴ Kɛ mí Mɛlɛka mulul ndu aa: «Te fuɲa ndɔ ndóò tufu pɛ ndu lɔlɔan o hɔl, ndóò venin a siɛmbula lan le palɛi ndii ŋɔmmɛw le? Te o co pɛ lende, mɛɛ o bɛnda mò faŋan o dɔ́ɔ́ngɔ́ɔ̀ nin le palɛi ndii ŋɔmmɛw. Te palɛi ken cuu pɛ, o muungu niko niaa tɛɛn.»

¹⁵ Le hee, má faŋa Miriam o dɔ́ɔ́ngɔ́ɔ̀ nin le palɛi ndii ŋɔmmɛw. Fɔ mó muungu nda tɛɛn malan nda puusiaa dɔ́ɔ́ngɔ́ kon le hiovɔɔ laci.

¹⁶ O kon kɔɔli, má faŋan o fonda kon Haserɔt lon, má kɔ kila dɔ́ɔ́ngɔ́ɔ̀ o lɛŋnde veselɛilen Paran nin.