Kundalan 11 - BII BILA

Mɛlɛka soli yinnden mí le loam dɔ́ɔ́ngɔ́ɔ̀ o yondoo dangalaa

¹ Paale pilɛ, mí Israɛlla cɛɛŋun Mɛlɛka o lani. Mɛɛ Mɛlɛka tuei nda cɛɛŋɔn kon, mó tuulu kɔl a nda, mó tuisi yinnden nda coo, mí le loam dɔ́ɔ́ngɔ́ɔ̀ o yondoo dangalaa.

² Mí vannda koŋul o Moise lo. Mí Moise piɛi Mɛlɛka, mí yinnden le ɲum.

³ Má ke fonda kon diolan aa Tabeera (kon co dimio ni aa «Yinnde biyaalen»), kani lon yinnde Mɛlɛka len le sandu vannda tɛɛn ni.

Vannda ɲuna Mɛlɛka le vision

⁴ Paale pilɛ, mí hiluma bɛndu-bɛnduan ma bii vanaa súúla celeŋaa va Israɛlla tɛɛn-nda. O kon, mí Israɛlla bɛɛ kandu cɛɛŋɔnndo, má va dimio aa: «Àá! Nɛ̀ɛ́ yɔngu yɛnin naa vision le dioo?

⁵ Te n loonun pɛ a suvaa naa n va dioo fondo Esipte-a, a kɔkumbɛilan, a cai, a yaavan a á laiyon.

⁶ Kɛ sisa, n co ɲawvo pila, n co lɛ ɲɛdiaa kɛndɛ dio le, fɔ manneo ho, paalen a ɲumndan ndu túŋ.»

⁷ Velanndo pila manne kon ndóò velan a kulun koriandre ni, o humbu o va vɛlɛ ni maa bedeliɔm.

⁸ Vannda va sɛŋinndo le ndu cɔwviaa, mì ndáà cui ndu a pow cuiyaa ɲɔɔ, te kon te mì ndáà cu ndu o ciei nin. Ndáà cu pɛ lende, ndáà yaw ndu o kpɛɛnɛi nin le ndu siinguuo dɛɛ toaŋaa mò yeela maa o nda toŋ a cuɛiyan-ndo.

⁹ Icɔl ndóò toal latulu a mɔ́mndo o dɔ́ɔ́ngɔ́ɔ̀ nin ni.

¹⁰ Yungu oo yungu va a diinannda kundaa ma va cɛɛŋɔnndo o cɛila-kolala-toandaala ndalan sondoo. Mí Moise tuɛi nda caŋndo, mí Mɛlɛka tuulu kɔl a nda taw-taw. Mí mɔnɛi bii Moise taw.

¹¹ Mó dimul Mɛlɛka aa: «Le yɛɛ nɛ n tosal-lɛ vana nɔm baalaa dɛnɛ vaa nuaa? Vɛ ya kɛndɛi nɔmnde tuŋɔɔ? Vɛ má siiluu ya volɔɔla vannda ha kpow o lebol le nda simndan laci?

¹² Mò va maa ya solin vannda ha o ipulu ni? Ya velu nda ni? Le yɛɛ nɛ n dimul-lɛ ya aa: ‹Bii nda o ibuŋ mɛɛ komsaa bii cɛlɛkpɛ o co vɔɛsio-o o ibuŋ yɛ háá mì la tiiya o lɛŋnde ya yiilu fuɲaa ndaa mamaa kpemaa le nda len yɔngoo len nin?›

¹³ Kuɛɛ nɛ ya co yɛ vision sɔla mì piɔw vanaa co haa caŋndo ya ikɛi má va dimio aa: ‹Ke naa vision mì n de›-a kpow?

¹⁴ I nɔla le kpekula vannda ha dindio ya pilɛ le. Sɔɛi he lusul bɔɔ le ya!

¹⁵ Te nuaa n co ya biyɔɔ ni, mɛɛ o co fisa ma cua yoomu nuu. Taa tuinun ya pɛ iɲíí ma tosa lende, i ci lɛnin mɔnɛi ya luɛyɔɔ le.»

¹⁶ Mí Mɛlɛka mulul Moise aa: «Cuungial-la n'van belaŋɔmmɛw o kaasoŋaa kɔlkalua Israɛlla tɛɛn, a n sina maa vanaa kɔlkalua a simlacia nda co ni-a, ma hin a nda o cɛi-kola-toandaa-labɔɔŋianndo sondoo, mì la sim lon niaa ndaa.

¹⁷ I toalnin ndon mì soo o nɔm ndo, mì cua kɔl ya yɔngu nɔm nin-ndo o tiŋ, mì yɔngu nda ndu, haliko ma mala nɔm sɔɔn vannda ha toosiaa. O kon, vallo ve lɛnin le nɔm pilɛ kínɛí le.

¹⁸ Vanaa tɔ̀a nda, mì nɔm Moise dimul nda aa: ‹La dindin Mɛlɛka o hɔl le siɔdii, la dianin vision. Kani la koŋul Mɛlɛka o lani mí la dimi aa: Àá! Nɛ̀ɛ́ co yɛ naa vision yɔngu le dioo! N vannun o tɔnɔ naa coo Esipte! Le hee, Mɛlɛka co niaa vision ke, mì la de.

¹⁹ La co va visin mun dioo o venin le paale pilɛ le, o venin le palɛi ŋiin te, o venin le palɛi ŋuɛɛnu le, o venin le palɛi tɔ́ le, o venin vɛlɛ bɛɛ le palɛi bidiin te.

²⁰ Kɛ la co va mun dioo háá paangei ipilɛ. La lonin mun dioo háá mì n fula niaa o lamilin, mì kuisio bii niaa. Kani la ci Mɛlɛka co niaa tɛɛn-ndo ɲɛ-ɲɛ le, la cɛɛŋun ndu o lani mí la dimi aa: Le yɛɛ naa n faŋan yɛ Esipte?›»

²¹ Mí Moise muli aa: «Vanaa ya co tɛɛn-nda, vanpiaandua nɔla cɔwvo tosaa-a co le vaalan kɛmɛ leŋɔmpum, mò va maa nda nɔm co dimio ho ni maa a co va nda vision yɔngoo háá paangei yɛngɛsɛɛ?

²² Mò va maa saa a nawva nda diilulnin nda le vision nda tiwvo kpow ni? Nduyɛ vana yɔɔya bɛɛ suvaa co o mɛmma ihɛllan nin-nda kpow, a tiw nda le.»

²³ Mí Mɛlɛka ɲuna ndu aa: «Mò va maa hiwvo ba Mɛlɛka-o hiw bingilen ni? Nɔm pila co cɔ sisa te sɔɛi nii co peelɔn, te i co peelɔn te.»

Kɔl Hala-o tol kaasoŋaa kɔlkalua belaŋɔmmɛwva coo

²⁴ Mí Moise fula, mó tɛɛngul vannda sɔɔn Mɛlɛka soo-on. O kon kɔɔli, mó cuungiaa kaasoŋaa kɔlkalua n'van belaŋɔmmɛw fulaa o Israɛlla tɛɛn, mó simi nda o cɛi-kola-toandaa-labɔɔŋianndo balɔɔ sɔ́.

²⁵ Mí Mɛlɛka toal o kumnde nin, mó soaa o ndu Moise lo, mó cua kɔl va ndu nin-ndo o tiŋ, mó yɔngu kaasoŋaa kɔlkalua belaŋɔmmɛvaa kan ndu. Mɛɛ kɔl Hala-o tol nda coo, má soaa o kpaaya ndɔɔ bɛngu maa vanaa-tɛɛngaa-diom Hala. Bɛmbɛ lepilɛ kon kínɛí ken tosalan nda ni.

²⁶ Vanpiaandua pum va nda ŋiɔn, Ɛldad nda Medad. A va o vanaa ndáà hɛli-a tɛɛn, kɛ ndáà kue o cɛi-kola-toandaa-labɔɔŋianndo sondoo le, má lo o dɔ́ɔ́ngɔ́ɔ̀ nin, mí kɔl Hala-o hun toal nda coo nɛɛ nda va kan o dɔ́ɔ́ngɔ́ɔ̀ nin-nda, má can sɔɛi o kpaaya Hala-o bɛngu maa vanaa-tɛɛngaa-diom Hala.

²⁷ Mí langbanɔ felengoo pum ɲaanun, mó kɔ dimul Moise aa: «Ɛldad nda Medad co diom Hala-o tɛɛnguuo o dɔ́ɔ́ngɔ́ɔ̀ nin.»

²⁸ O kon, mí Yosue, po Nun-ndo, ó va vana malaa Moise-o kabi o felengiyɛi nin-ndo dimi aa: «Vana ni bɛndoo Moise, kɔ kuuna nda.»

²⁹ Mí Moise mulul ndu aa: «Paŋalaa n co le ya ni? Màá Mɛlɛka tuisi kɔl ndɔɔ vanaa ndɔa kpow coo, haliko ma siŋnun vanaa-tɛɛngaa-diom Hala-a!»

³⁰ O kon kɔɔli, mí Moise muungu o dɔ́ɔ́ngɔ́ɔ̀ nin nda kaasoŋaa kɔlkalua Israɛlla.

³¹ Mí Mɛlɛka yɔngu hoeiye fulaa o mɛmma ihɛllan coo, mí hoeyii ken hun a siasoa, mí i hun sɛŋi nda o dɔ́ɔ́ngɔ́ɔ̀ balɔɔ le kɔla paale pilɛ. A va a dengelannda coo. Cɔnɔnndo lɛŋ, helɔɔ nɛɛ nda mɛɛlu coocoo-a, ɲɔɔ va le dunndo lediin.

³² Mí vannda niinu isisi siasoa kan cɔwviaa, ma lɔl isisi, má niinu vɛlɛ diimandɔɔ kpɛŋ isisi nda cɔwviaa. Mí vana cɔwviaa nda taw loo sɔla le kilolan vàála tiɔn. Ma tɛ̀i nda o dɔ́ɔ́ngɔ́ɔ̀ balɔɔ.

³³ Israɛlla vownɔnndo dɔ́ɔ́ visin mun o lasondo, mí Mɛlɛka tuulu kɔl a nda, mó tuisi nda nàà halima vɔɔndo pum coo.

³⁴ Má ke fonda kon diolan aa Kibrɔt-Hataava (kon co dimio ni aa «Sɛila yeemɛi vɔɔnndan»). Kani lon nda kumbu vanaa yeemɛi vɔɔnde nɔla-a ni.

³⁵ Mɛɛ nda cɛn Kibrɔt-Hataava, má bii nɛiyo le kɔlan Haserɔt, má kɔ kila dɔ́ɔ́ngɔ́ɔ̀ lon.