Kundalan 10 - BII BILA

Bulula hɔŋaala tiɔnnda cɔwnun a volii humbuei lan

¹ Mí Mɛlɛka soaa o Moise lo, mó dimul ndu aa:

² «Cɔw bulula hɔŋaalan tan tiɔn a volii humbui fɛtufɛtuei. Lan la vanin le sɛ́lɛ́ Israɛlla veeloo a le tɔɔmaseloo nda yɔngoo le dɔ́ɔ́ngɔ́ɔ̀ puusiaa le hiovɔɔ laci ni.

³ Te bulula hɔŋaala lan la soo dɔ́ɔ́ pɛ diom pilɛ tan tiɔn kpow, sɛ́lɛ́ Israɛlla kpow cuungian nɔm ikɛi o cɛi-kola-toandaa-labɔɔŋianndo sondoo.

⁴ Kɛ te buloo ndu pilɛ ko nda hɔŋ ni, mɛɛ simlacia, a co bolii lapangɛi o polama Israɛlla coo-a daama bɛnda ni mà cuungian nɔm ikɛi.

⁵ Te la hɔŋ ndan pɛ a diom bɛndu-bɛndoo, mɛɛ kundala co icali a ba paalen le del-lo lan la bɛnda le kɔlan ni.

⁶ Te la hɔŋ ndan vɛlɛ pɛ hɔŋ diinndɔɔ a diom bɛndu-bɛndoo, mɛɛ kundala co a ba too lan la bɛnda le kɔlan ni. Buloo hɔŋ bɛndu-bɛndoo vanin tɔɔmaseloo le kɔlan ni.

⁷ La bɛnda vɛlɛ mi la hɔŋ buloo le sɛ́lɔ́ɔ́ cuungiaa nɛɛ pilɛ, kɛ la bɛnda mì la hɔŋ ndu a diom bɛndu-bɛndu le ken te.

⁸ Vanaa-solia-lasálàá, a co polale Aarɔn-nden-nda kínɛí bɛnda le bulula lan hɔŋndo ni. Le fɛɛn a fɛɛn, tɔŋ kon co le niaa a le cuavaa niaa imamaa.

⁹ Te la tiiya pɛ o lɛŋnde niaalen nin, mì la kuel vanaa ciŋilannin niaa a cɔwvo-a, la bɛnda mì la hɔŋ bulula niaalan a diom bɛndu-bɛndoo haliko mi ya Mɛlɛka Hala niaa loonun a niaa, mì baŋa niaa yaamɔaa niaa o ba.

¹⁰ O palɛi niɛi kɔlkɛndɛi coo bɛɛ, la bɛnda mì la hɔŋ bululan ndan: o kafola niaala lekaanndan coo, o kafola paangun sɛnɛilan coo, telen niaa soli sálàla loamaalan-ndo a telen niaa soli sálàla kɔlɲululan-ndo. Nɛiyo vanin kon le ya Mɛlɛka Hala niaa loonɔnndo a niaa o kɔɔ ni.»

CƆNƆNNDO SINAI LE KƆLAN O DƐƐLALA VESƐILAN MOAB NIN (10—21) Mɛɛ kundala Israɛlla la va kɔlan yɛ

¹¹ O paale bidiinndɔlen coo, o paangii diinndɔɛi nin o vɔsi diinndɔɔ nin, mí kumnde faŋan o Calta Mɛlɛka la kesu kpemaa va nin-ndan coo.

¹² O kon, mí Israɛlla faŋan o lɛŋnde veselɛilen Sinai nin, má bii kɔlan o pɔm-pɔmbɔ. Mí kumnde kɔ sim o lɛŋnde veselɛilen Paran nin.

¹³ Kon yɔŋnun kandɔɔ tasoo le dɔ́ɔ́ngɔ́ɔ̀ puusiaa o vomɔɔ Mɛlɛka vem Moise mó tɛɛngul nda-o ni.

¹⁴ Polale Yuda len fɔlɔn le cɛn kɔlan a lɛfɛ ndaa ni a kundala va polale len kɔɔli lan. Kundala lan la yɔŋnun ndan ni: kundala Yuda lan, simlacinɔ ndaa va Naasɔn, po Aminadab-o ni,

¹⁵ kundala polale Isakar len-ndan, simlacinɔ ndaa va Netaneɛl, po Suar-o ni,

¹⁶ a kundala polale Sabulɔn-nden-ndan, simlacinɔ ndaa va Eliab, po Helɔn-ndo ni.

¹⁷ O kon kɔɔli, má bɛɛŋuu Calta Mɛlɛka lan, mí cuavaa-imamaa Kɛrsɔn-nda a cuavaa-imamaa Merari-a cua ɲɛm baalan Calta Mɛlɛka la lan, má siilun mun, má bii kɔlan.

¹⁸ O nda kɔɔli, mí polale Rubɛn-nden le bii nɛiyo a kundala va nda kɔɔli lan, lɛfɛ landaa ndaa va nda laci. Kundala va nda kɔɔli lan la va lan ni: kundala polale Rubɛn-nden-ndan, simlacinɔ ndaa va Elisur, po Sedeur-o ni,

¹⁹ kundala va o polale Simeɔn-nden nin-ndan, simlacinɔ ndaa va Selumiɛl, po Surisadai-yo ni,

²⁰ kundala va o polale Kad len nin-ndan, simlacinɔ ndaa va Eliasaf, po Deuɛl-lo ni.

²¹ O kon kɔɔli, mí cuavaa-imamaa Kehat-a a can kɔlan a ɲɛm diandan o ba. Calta Mɛlɛka lan láà bɛnda mì láà tondun telen pá mì cuavaa-imamaa Kehat-a ndáà tiiya nɛɛ dɔ́ɔ́ngɔ́ɔ̀ ndóò kilan-nda.

²² O nda kɔɔli, mí polale Efraim-nden le bii nɛiyo a kundala va nda kɔɔli lan, lɛfɛ landaa ndaa va nda laci. Kundala va nda kɔɔli lan la va lan ni: kundala polale Efraim-nden-ndan, simlacinɔ ndaa va Elisama, po Amihud-o ni,

²³ kundala polale Manase len-ndan, simlacinɔ ndaa va Kamliɛl, po Pedasur-o ni,

²⁴ a kundala polale Bɛnyamɛn-nden-ndan, simlacinɔ ndaa va Abidan, po Kideoni-o ni.

²⁵ Kundala mɛɛlu tum kumbɔɔ kpɔ́ŋ-ndan la yɔŋnun kundala polale Dan-nden-ndan a kundala va lan kɔɔli lan ni, lɛfɛ ndaa va nda laci. Kundala va nda kɔɔli lan la va làn ni: kundala polale Dan-nden-ndan, simlacinɔ ndaa va Ahiesɛr, po Amisadai-yo ni,

²⁶ kundala polale Asɛr len-ndan, simlacinɔ ndaa va Pakiɛl, po Okran-ndo ni,

²⁷ a kundala polale Nɛftali len-ndan, simlacinɔ ndaa va Ahira, po Enan-ndo ni.

²⁸ Nuaa Israɛlla ndáà kɔa a kundala ndala cɔwlan telen ndáà puusiàà dɔ́ɔ́ngɔ́lan-ndo ni.

Israɛlla faŋan o lɛŋnde veselɛilen Sinai nin

²⁹ Mí Moise dimul Hobab, po Reuɛl lefu ndɔ Madiannɔ-o aa: «O lɛŋnde Mɛlɛka yiilu naa kpemaa le naa yɔngoo len nin naa n co kɔlan ni. Lelan, hun n kɔnnun naa niaa, a co lakɔ dɛnɛ kɛndɔɔ sɔla lon, kani Mɛlɛka dimi le Israɛl dɛnɛ kɛndɔɔ tosallo.»

³⁰ Mí Hobab mulul ndu aa: «I co lakɔ le. O lɛŋnde nilen nin a o calta nilan ya co muungu ni.»

³¹ Mí Moise cɔɔlu isɔɔ o ndu lo aa: «Faŋan naa ikɛi le yandi. Kani nɔm sina lɛŋnde veselɛilen nden taw, a sina fondala naa n bɛnda le dɔ́ɔ́ngɔ́lan kilaa lan, a nɔla ma sim naa laci.

³² Taa cɛl pɛ mì n kɔɛ naa niaa latulu, n tosanin mì nɔm bɛɛ sɔla dɛnɛ kɛndɛ Mɛlɛka co naa tuisi coo-o.»

³³ O kon mí Israɛlla faŋan o pembii Mɛlɛka-e, má kɔa palɛi ndii yáá yɛngɛsɛɛ. O palɛi yaii ken bɛngu, kesu kpemaa va kɔlan nda laci le fonda ndáà bɛnda le dɔ́ɔ́ngɔ́ɔ̀ kilaa-o nuwviaa.

³⁴ Kumii Mɛlɛka-e va nda kumbɔɔ ipala telen nda va faŋanndo o dɔ́ɔ́ngɔ́ nda va nin-ndo-o.

³⁵ Telen oo telen ndáà cɛn pɛ a kesu kpemaa le kɔlan, Moise ndóò piɛi Mɛlɛka aa: «Cɔn, Mɛlɛka, haliko mi yaamɔaa nɔmnda sɔɔndian, mì vanaa nɔ nɛyɔn nɔmndo-a ɲaanun nɔm polon.»

³⁶ Te ndáà kɛsi pɛ kesu kalaa, ndóò dimi aa: «Mɛlɛka muungu kundala bɛndula Israɛlla ikɛi.»