Yɔɛl 1 - BII BILA

¹ Sɔɛi Mɛlɛka dimul Yɔɛl, po Petuɛl-lo-e co hee ni:

Kpundɛ tɛɛmbua

² «Niaa kaasoŋaa kɔlkalua, la yaŋ nilan o sɔɛi he. Niaa co icali o lɛŋnden nden nin-nda, la tuei-yɔ! Vɛ̀ɛ̀ dɛnɛ vaa nuaa tosan nin o paale niaalen, te kon te o palɛi fuɲaa niaa?

³ La dimul poaa niaa sɔɛi ken, mì nda bɛɛ hun dimul poaa ndaa ndi, mì poaa ndaa bɛɛ a dimul a nda vialunin-nda.

⁴ Tɔlɔɔla paaleenda mɛi le tɛɛmbuuo lan, mí sóónɔa tɛɛmbuu lan. La sóónɔa mɛi le tɛɛmbuuo lan, mí selennda tɛɛmbuu lan. La selennda mɛi le tɛɛmbuuo lan, mí dɛlua tɛɛmbuu lan.

⁵ Niaa vanaa kolaa mamɔiya, la tiondu mì la caŋ. Niaa kol mɔiyan-nda, la ŋɔɔcian. Kani mɔima n'rɛsɛmma sɛnɛiyan ma puunun niaa o lasondo.

⁶ Vanaa-mangalaa-isɔɔa pum hinul lɛŋnde nilen. Vanaa kan nɔ kpaayaa taw, a co sɛ́lɛ́, vana cii nda cɔm te. Ciŋun ndan maa ciŋun yàlà piaandu n co ni, ciŋun nda sɛɛsiaa ɲɔɔn-ndon maa yaalela yàlà laandu n co ni.

⁷ À cii nakɔla n'rɛsɛnnda nilan tɛɛmbuu, a bɛɛsiaa voosui nii má yimi ndi. À peenguu ndi tumndan má sɔam ndi. Lɛɛndon muungu n'humbu fo-fo.

⁸ Lelan, niaa yungu nuu, la somisomin mɛɛ vanalanɔ felengoo vownun volɔɔla biisilan le pɔnɔ ndɔ ifelengiyaa caŋndo nuaa yɛ.

⁹ Sálà kpeyanndo a sálà mamɔiyo co lɛ solin o Cɛi-Mɛlɛka-o nin te. Lelan, vanaa nia baalaa, a co vanaa-solia-lasálàá-a co o mɔnɛi nin taw.

¹⁰ Ciɛɔn cuu itambu, lɛŋnden le luɛi kɔsɔ, kani maalon tambu, mɔima n'rɛsɛmma sɛnɛiyan ma co lɛ le. Hali cuɛilen tue bɛɛ le co lɛ le.

¹¹ Vanaa vàá co a mɔnɛi, vanaa tɔalaa n'rɛsɛnnda co ŋɔɔcianndo le maalon a le ɔrse, kani ɲɛ-ɲɛ va o ciɛɔn nin le kovɔɔ, o cuu itambu kpede.

¹² Nakɔla n'rɛsɛnndan la vesan sɛ́ɛ́n, voosoei ɲɔfɔliaa. Krenadiei, vawvan, pomiee a yɔmnde yondoo nin kpow i vesa. Kɔlkɛndɔɔ ɲum vanndacieea tɛɛn.»

Piɛilen a sumndo le Mɛlɛka tɛɛlɔnndo

¹³ «Niaa vanaa-solia-lasálàá, la vownun volɔɔla biisilan mì la caŋ taw. Niaa co sálàlan solio o fonda-loamaa-lasálàá coo-a, la hiiliaa hiko-hiko a caŋndo. Niaa co baalaa tosaa le Hala nuu-a, la hun lɔl a volɔɔla biisilan lekɔɔ. Kani sálà co lɛ hunɔɔ o Cɛi-Hala niaa nin te, sálà mamɔi co lɛ hunɔɔ lenin te.

¹⁴ Lelan, la yonda le sumndo biyɔɔ, la veelu vannda le bɔŋan lekaando tosaa. La cuungiaa kaasoŋaa kɔlkalua a vanaa co icali o lɛŋnden nden nin-nda kpow o Cɛi-Mɛlɛka Hala niaa nin, mì la koŋul Mɛlɛka o lani.»

Paale Mɛlɛka len

¹⁵ «Kpòkóó dɛnɛ! Má cè paale bɛndu dɛ! Paale Mɛlɛka len le co le tiiyaa. Maa mɛɛ Vana-Kpaayaa-Kpow tuisi kpundɛ tɛɛmbua bɛndoo vannda coo nuaa yɛ, lende paale len le hunnin ni.

¹⁶ Vɛ̀ɛ̀ o co naa o hɔl te nda puu baloo naa o ba le? Vɛ̀ɛ̀ a tɛɛmbuu kɔlkɛndɔɔ a ɲaale va o Cɛi-Hala naa nin-ndo le?

¹⁷ Kulun saŋnun-ndon co siɔu o puuloo bɛngu, kondalan la connun fondo fúú, bondonndan la koombiaa, kani malun co le vow lenin te.

¹⁸ La tuei-yɔ mɛɛ cɔlua co somisominndo yɛ. Nawva a visia velan a nawva-a a sina nɛɛ nda kɔ le. Kani a co lɛ bil puiyaa cɔ le. Saa a cuinnda bɛɛ a co o sanga pilɛ kon nin.

Piɛile Yɔɛl, vana-tɛɛngaa-diom Hala-o len

¹⁹ «Éé Mɛlɛka! Nɔm o lani ya co caŋndo nuaa ni. Kani yinnden le cii bil puiyaa lomɔɔ o dɛɛlala vesɛilan nin, le cii yɔmnde kpow lomɔɔ yondoo nin.

²⁰ Hali visia yondoa co mulinndo o nɔm ndo. Kani mɛnndan ma vela o peelan kpow, yinnden le cii bil puiyaa lomɔɔ o dɛɛlala vesɛilan nin.»