SƐBƐ YƆB-O 9 - BII BILA

Muli Yɔb muli-o: Hala co vana kpaayaa kpow ni

¹ Mí Yɔb cua sɔɛi, mó muli aa:

² «A toɲa, i sinà maa lende ken ndi co ni. Vanacieo tiwba mò sɔla dí a Hala le.

³ Vanndo yeema le kɔɔsɔɔ a Hala, vana kon soaa diomndan vàá pilɛ, Hala mulul ndu hali diomndo o pilɛ le.

⁴ Hala nɔ kɔlkaloo, kpaaya ndɔɔ co o bɔɔ, nɛ̀ɛ́-nɛ̀ nɔla yɛ mò heelun ndu sondo vana kon kondu dɛnɛ le?

⁵ O kɔl ndɔ tuwvo nin, mò faŋa pembon o fondala n va paandu coo lan, pembun mun sinà sɔɛi ken pɛɛngu le.

⁶ Mó hiŋ lɛŋnden yongban-yongban mí sungbuma le cal coo-an ma ɲiiya.

⁷ Te o dimi pɛ aa paalen le fula le, le ɲum pɔ́lì, loeon bɛɛ, o nɔla mun vonɔɔ kpiŋ.

⁸ Ndu pilɛ kpé tondu halataalaa ni, ndu nɛi o tindima mɛmma ihɛllan coo a labɛngu ni.

⁹ Ndu koni diw loeon kundalan ni, mò toosiaa tuuliaala kɛndɛ-kɛndɛlan a mun: Kɔ́lɔ́vúlu-Bɛndoo, mɔmtombolaa, nanga-nsiiyo, a ninaa kundaa co a ba too-a.

¹⁰ Ndu tosà dɛnnda bɛndulan a dɛnnda kɔndɔfiltan ni, kaamaala ndɔlan la cuu cɔm te.

¹¹ Mò kei ya ikɛi, mò hiow, i ci ndu le, o kɔannun vɛlɛ lende, i biinin ɲɛ-ɲɛ bila le.

¹² Te o bii pɛ ɲɛ, nɛ̀ɛ́-nɛ̀ nɔla yɛ ndu hiɔlɔɔ ndu o ba? Nɛ̀ɛ́-nɛ̀ tɔɔndan yɛ mò ɲuna ndu aa: ‹Yɛɛ n co yɛ kon tosaa?›

¹³ Te Hala tuulu pɛ kɔl, vana nɔla ndu kpaa le. Ndu o labɛngunin ɲɛm yooman kɔndɔfillon o mɛmma ihɛllan nin, a N'Yalɛiyo a ɲɛ-ɲɛ co N'Yalɛiyo kɔɔli a co ihini ni.

¹⁴ Vɛ̀ɛ̀ kpeekpei ya mulul-lɛnin ndu niko? A diomnda kuɛɛ kpeekpei ya soaa yɛnin le kɔɔsɔɔ a ndu?

¹⁵ O va bɛɛ maa o di nuu coo ni, i tiwba le ndu simullo le. Le hee, vana ni kialaa n'yamaa ya bɛnda ni mi tɛɛlun.

¹⁶ I veelu ndu bɛɛ mó cɛl, i laalan te te o yaŋnin nilan o diom nuu.

¹⁷ Le sɔɛi taaninnde o tuisi ya sanga bɛndoo coo nuaa ni, o co boolɔnndan kuiyo ya lekɔɔ fondo fúú.

¹⁸ O co bɛɛ ya malɔɔ mì yoomu le, mɔnɛi tuŋ o co ya pimio ni.

¹⁹ Bàà mì simul ndu a paa-kala? Ndu co vana kpaayaa kpow ni. Bàà mì kɔɛ a ndu o fonda kialaa n'yamaa? Nɛ̀ɛ́-nɛ̀ veelu yɛnin ya le kɔɔsɔ kon?

²⁰ Hali yáà nɔ bɛɛ di, sondo ni ya pilaa va ya yaala, hali mì yáà tɛɛmbuu bɛɛ isɔɔ le, sondo nuu va cɔm maa vana vɔɔndo ya co ni.

²¹ Vɛ̀ɛ̀ i tɛɛmbuu isɔɔ le? Ya pila sina lɛhau ken te! Kani yoomu nuu bɛɛ fula ya nihau iyeema.

²² Vana sandu, vana va vana vɔɔn, ɲɛ pilɔɔ kpé. Lelan ya co hee dimio ni: O va vana sandaa, o va vana kɔlvesɛi diwvo Hala diw nda ni kpede.

²³ Te kpundɛ piɔ́mndo pum del pɛ o lepilɔɔ, mó diw vanaa tɛɛmbuu isɔɔ le-a, mamɔɔ koni Hala mam tambii ndɛi ken ni.

²⁴ Te lɛŋnden le del pɛ vana kɔlvesɛiyo o ba, Hala yii vanaa kialaa n'yamaa hɔlla, kani te o co ndu le, nɛ̀ɛ́ nɔla yɛ ken tosa?

²⁵ Palɛi nii hiow bɛɛ keleŋaa cuunɔnndo a vana co kiltan-ndo, i cuu hiownɔn lende, i ci dɛnɛ kɛndɔɔ le.

²⁶ Ì keleŋa bɔɔ hiovɔɔ maa dɛ̀ndɛ̀ macɔ́ɔ́cɔ́ɔ̀, maa mɛɛ kovɔ́ɔ̀ toal a kiltan ɲɛ ndɔ diaa kɔɔli yɛ.

²⁷ I dimi pɛ aa i pɔɛɛnun-ndɔ cɛɛŋɔnnda nilan, mì pɛngi suumaa ho, mì cɔm maa i co a kɔlkɛndɔɔ,

²⁸ I muungu yingo-yingo a sangalan nilan. I sinà maa nɔm Hala, a bíìnin ya maa vana tɛɛmbuu isɔɔ loo le.

²⁹ A cii nin ya yaala, le yɛɛ niko mì kɔɛ saangian fondoo?

³⁰ Mɛ̀ɛ́-mɛ̀ɛ́ ya pulun bɛɛ a sɛnndan, mì pilu balan a sodaa,

³¹ a keleŋanin ya mingi yinɔɔ o loolio nin, mì volɔɔla nila cuɛinanndan bɛɛ la kɛɛ ya.

³² Kani ndu Hala, o co vanaciee maa ya le ndu ciŋilanndo a sɔngɔɔ le. I nɔla kɔlan nɛɛ kialaa n'yamaa naa ndu le kɔɔsɔɔ le.

³³ Te ndóò va vɛlɛ pɛ maa vana kialaa n'yamaa pum co, ó nɔla mò handu baa naa coo naa ŋiɔn kpow-vo!

³⁴ Vana kialaa n'yama kon va ya soli o sionnde Hala co ya len lɔɔ len bɛngu, mì siòòŋii bɛnduei he ndíì cuu ya nin kuee.

³⁵ Yáà nɔla mì yáà soo o ndu lo, siòòŋii ndíì biinin ya a ndu le. Kɛ nduyɛ, i co lende le, Ya pilɛ connun o ya pila nin ni.»