SƐBƐ YƆB-O 5 - BII BILA

¹ «Veelu vɔ hau. Vɛ̀ɛ̀ vana pum co lon o mululnin nɔm-ndo? Ɔ́ɔ̀ mɛlɛkanɔ diandaa n soaanin o ndu lo-o?

² Toɲaa, kɔltuwvo dii diɔm sondo vesɛiyo ni, paŋalaa dii vana nɔ taasi loo ni.

³ Ya, i ce nin diɔmndo siŋnɔnndo ɲɛ, kɛ fɔ́ɔ́fɔ̀, mí dɔaw cɛi ndɔɔ danga aa:

⁴ ‹Màá poaa ndɔa sɔla mala oo mala le! Màá a yaala nda nɛɛ kialaa n'yamaa! Màá vana soaa le nda le!

⁵ Ɲɛ-ɲɛ nda kow pɛ, o va bɛɛ aa o kunga n'yɔɔ tɛɛn ɲɛ koavaa kon co ni, màá vanaa yiaan ma co nɛiyo-a dio ndu tɔnɔ! Màá vanaa kolɔɔ bii-a hiɔlu ɲɛm ndan kɛndɔn!›

⁶ Dɛnɛ vɔɔndo fula o cundoo nin te, kuɛi vil mì i fula lɛŋ te.

⁷ Mɛ̀ɛ́-mɛ̀ɛ́ tɛ́ngɛ-tɛ́ngɛla leyinndan la helnun coocoo nuaa yɛ, Lende vanacieo velun le sangaa ni.

⁸ Te ndóò va pɛ aa ya co nɔm ni, i va isɔɔ o Hala lo. Ndu Hala pila ya va sanga nuu cɔm ni.

⁹ Kani ndu, o tosà dɛnnda bɛndulan a sɔɔn vana bii bila lon, kaamaala ndɔlan la cuu cɔm te.

¹⁰ Ndu tuisì piɔɔ o lɛŋnden coo ni, ndu koni tuisì vɛlɛ mɛnndan le ciɛɔn pɔɔliaa ni.

¹¹ Ndu heelu vanaa vannda kelun yii-a ni, ndu yɔngu vanaa co a mɔnɛi-ya dɛnɛ kɛndɔɔ ni.

¹² Ndu tɛɛmbuu tuula vanaa kɔlkalu vɔɔnda ni, mì kɛɛsuula ndalan la laasian nda o ba.

¹³ Ndu bii vanaa kɔlkalua o yaŋɔɔle kɔlkalu ndaa ni, mì silala ndala tuundɛilan la siŋnun fúú.

¹⁴ I pala déŋ nda boŋ o ɲumndan ni, a paale kalalen kpéŋ-kpéŋ nda kɔa ni yuumu-yuumu maa o maɲum nin.

¹⁵ Kɛ mí Hala soli vana dɛnɛ palaa-o o ciŋun ndan maa mɔɔn cɔw-von bɛngu, mó hɛlu vana bala fondoo nda o ba.

¹⁶ O kon, mì vanaa nɔ mayoomu le-a sɔla kɔlkɛsiaa, mì dɛnɛ sandaa lepɛŋndo kinda sondoo.

¹⁷ A toɲa, dɛnɛ kɛndɔɔ co le vana kon, vana Hala cɔm tɛɛmbuu ndɔɔ-o, Lelan, pɛɛsa sila Hala Vana-Kpaayaa-Kpow le.

¹⁸ Kani ndu soaŋ vana ni, kɛ ndu pila koni cɛw vɛlɛ vana ni. Ndu yɔŋùl vana ni, ndu koni cɛw vana a ba ndɔɔ ni.

¹⁹ O solinin nɔm o mɔnɛi nin háá bɛmbɛ leŋɔmpum, o bɛmbɛ ŋɔmmɛwndɔɔ, dɛnɛ palaa ve lɛnin nɔm kuee le.

²⁰ Telen yima fofolan ma delnin-ndo, o ciindiaanin nɔm mò hɛlu nɔm piɔ́mndo o ba. Lɔ́ɔ́ cɔwvo luɛinin-ndo, o baŋanin nɔm o mɔɛi cɔwve bɛngu.

²¹ A vanaa o kandaa bɛngu le vanaa sondola vɔɔnda, siòòŋii biinin nɔm le dɛnɛ palaa co hunɔ̀ɔ̀-o le.

²² A mamnin dɛnɛ palaa a yima fofolan, siòòŋii venin nɔm a visia biyaa le.

²³ Kani kpemaa vanin niaa tɛɛn niaa powtan o yondoo nin. Kɔlɲuloo vanin niaa tɛɛn niaa visia yondoa.

²⁴ A sinanin kɔlɲuloo o nɔm ndo cɛinin, A mɛɛndiannin ɲɛm nɔmndon, a komalnin mì ɲɛ-ɲɛ faŋan lecoo le.

²⁵ A canin cuavaa nɔmnda kuiyo, mì cuavaa nɔmaa imamaa vil maa billo yondoo nin.

²⁶ A toalnin o sɛiyo nin a yoomuan o n'dial ɲɛkɛndɛi, mɛɛ vana dii malun latumbun vesa ɲɛkɛndɛi-yon kundaa nuaa yɛ.

²⁷ Sɔɔn mun naa n yaasiaa ɲɛkɛndɛi ni: Nduyɛ lende i co ni, yiyan a mun ɲɛkɛndɛi, Tuei mún válán, ma soli tɔnɔɔ lenin.»