SƐBƐ YƆB-O 41 - BII BILA

¹ «Lelan vana yiyan pɛ maa o co N'Yalɛ́iyo nɔla, ndu pila palan, kani cɔu kínɛí o co ndu ni, mò del lɛŋ.

² Seema kon bii vanndo le ndu tiŋɔɔ le, o co vɔ bɛɛ le vanndo ya Hala pila simullo le.

³ Nɛ̀ɛ́-nɛ̀ dɔnda yɛ ya ɲɛ pum le ndu ɲɛ kon mingullo? Ɲɛ-ɲɛ co o halataalaa bɛngu, ya nɔ ni.

⁴ Fɔ mì soo a N'Yalɛ́iyo o kɔɔ, mì cɔm kpaaya ndɔɔ a falun ndɔn sɔvɛɔn.

⁵ Nɛ̀ɛ́-nɛ̀ soli yɛnin ndu doma ndɔɔ lekɔɔ? Nɛ̀ɛ́ luɛi yɛnin ndu o yaalelan tɛɛn mò sina lavàà lon?

⁶ Ɔ́ɔ̀ vana kumbi nin sondoo le luɛyɔɔ ndu o sondo-o? Vana-vana ce ndu pɛ ciŋndon a ɲiiya a siòònde.

⁷ Kɛkɛwlan polan taw la co labaalianndan ndu o kɔɔ ni, vana ca lan ko aa kɔ̀ɔ̀la cɔwlan ni.

⁸ Kɛkɛwla lan la co lasɔandaalan kpiliki, hoeye bɛɛ i keì lan tɛɛn te.

⁹ La co labaalianndan bádó-bádó lan pila tɛɛn, La nɔ́là tiimbɔndo le.

¹⁰ O kpisiŋa pɛ, pangeloo fula. Maa ɲɛ-tengaa paale siaa hɔlta ndɔlan la co ni.

¹¹ Maa piɔɔ-volia yinnde fulà ndu o sondo len le co ni, tɛ́ngɛ́-tɛ́ngɛ́la leyinndan la fulà ndu o sondo ni.

¹² Mɛ̀ɛ́-mɛ̀ɛ́ hangullo fula o kpɛɛnɛi co ŋolɔɔ o yin-nde nin yɛ, lende hangulu fula ndu o milin-ndo co ni.

¹³ Hoeyii fula ndu o milin o yoomoo-e nɔlà mì i mɛndul suɛɛnde. O kumbi pɛ sondoo, yinnden le sandu vum.

¹⁴ Ndu o ikɛsu kpaaya ndɔɔ co ni, vana-vana ce ndu pɛ, vana kon ɲaanun.

¹⁵ Kpɔlikpɔlin co o yáw ndɔɔ coo-on co n'kàlà poŋ, vana kindila bɛɛ mun, n biŋin te.

¹⁶ Duo ndu o kàlà poŋ maa pow, o kálà-kálà maa pow yɛ́ndɛ́.

¹⁷ Te N'Yalɛ́iyo cɛn pɛ, hali vanaa hiow bɛmɛi-ya, à ɲiiya a siòònde, à sɔɔndian.

¹⁸ Vana kuel ndu bɛɛ a mɔɛi cɔwve, a nɔla ndu ɲɛ yɔŋ te, vana nɔla ndu ɲɛ yɔŋ a bál te. Vana nɔla ndu ɲɛ yɔŋ a n'kɔɔ le o co vɔ le ndu simullo a bɛ̀lɛ̀nnden te.

¹⁹ Ndu o hɔl, cilinnde co ko maa tɛ̀w, daɲɛi ndi co ndu o hɔl maa yɔm siovɛi.

²⁰ O ɲeenun kɔɔn kpaasiaa le, pow fáàndaa ndu co ndu o hɔl maa bil vesɛi.

²¹ Kpélénkpélénndo ndu co ko le ndu maa lesùsú. O tuei pɛ bɛ̀lɛ̀nnden ndu hinullo, o mam.

²² Kuiision a ɲɛm siɛɛmbian co ndu o demboo bɛngu ni, nɛɛ o kei pɛ, tɛɛndiaalan la koma hini o loolio coo maa tɛɛndiaala dɛndɛla nawva koaŋ-ndan.

²³ O tol pɛ o mɛnndan nin, ma ŋól mɛɛ ma ŋòl o kpɛɛnɛi nin nuaa yɛ. O tol pɛ o dalaa nin, hangullo a kumnde hel túkpɛ̀-tùkpɛ̀.

²⁴ Foofo o kei pɛ, kaŋ kon koma lo volio ŋɛlɛngi-ŋɛlɛngi, Hiiyo koma lo o mɛnndan nin maa yuluŋii bɛndu yuuvɛi.

²⁵ Ɲɛ-ɲɛ sulan a N'Yalɛ́iyo o lɛŋnden coo le. Toosian o toosian-ndo, ɲɛ-ɲɛ nɔla ndu isiòòn luei le.

²⁶ Yaamɔaa ndɔa kpow, tofaa o tofa nda ni. Ndu co masa visia mayoomua co o lɛŋnden kpow coo-a ni.»