SƐBƐ YƆB-O 39 - BII BILA

¹ «A sina telen cuinaa bandilaa koam-ndo? A cenin kialla tula nda và komɔɔ-o?

² A cɔm nin mɛɛ kpɛ́ nda tosa paangon a yóltan yɛ? A sina pá telen nda koam-ndo?

³ Nangɔnndo nda nangun ni, mà kom, mà fula o sangaa nin.

⁴ O kon, mì cuawva sɔla yoomuan, mà sul o ba ndaa coo, mà faŋan kala nda kɔɔli, mà kɔɛnnun, a muungu lɛ le.

⁵ Nɛ̀ɛ́-nɛ̀ timbi yɛ sofɛlɛ yondoo mí ndu vannun o ba ndɔɔ coo? Nɛ̀ɛ́ timbi yɛ yoolen mó mal?

⁶ Ya kila calta ndɔlan o dɛɛlala vesɛilan nin ni, calta ndɔlan la co o lɛŋnde niŋ latɔlɔɔle len nin.

⁷ O co vɔkɔ-vɔkɔ co o kobilan nin-ndo mamɔɔ, o tui lɔ́ɔ́-lɔ́ɔ̀ mì vana bɛndu deŋul ndu le.

⁸ O co kelaa o pembon coo le ɲɛdiaa nuwviaa, o co bil puiyaa súú-súù ka nuwviaa.

⁹ Bàà mì cìíyo yɔngun nɔm mà tosa hɛnan nɔmndo a ndu? Vɛ̀ɛ̀ a lɔli ndu pá nɛɛ n baa cɔlua nɔmnda o hèéo nin-nda?

¹⁰ Vɛ̀ɛ̀ a nɔla ndu lovio háá mò vàá ciɛi nɔmnde? O nɔla pá mò va dɛndɛla koaŋaalan nanɔɔ nɔm kɔɔli o dɛngbɛlan nin?

¹¹ Vɛ̀ɛ̀ ma tiindan ndu le tùú o nɔ kpaaya bɛndoo-o? Vɛ̀ɛ̀ ma ɲindul niko ndu vali n nɔ le tosaa-o?

¹² Bàà ndu koni n tiindan vɛlɛ le ɲɛm n kow-von vilio o kpele lɔaa n'mallo coo ni?

¹³ Sooninkɔnɔɔ va pɛ kumbanndan lɔɔ, a ɲaaloo o lɔaa lan ni, vana ca ko bɛɛ ndu bɔɔlan a kumbanndan aa yow-yɔɔyaa cɔcɔɛi vilɛiyo ni.

¹⁴ Kɛ o mɛi pɛ pelta ndɔlan lɛŋ, mò mal tan tuuloo o puuloo bɛngu,

¹⁵ o pɔɛɛnun maa vanndo nɔla mò nɛi lan a bɛngu mì la piɔsi, maa visi yondoo bɛɛ nɔla mò ciimiaa lan a bɛngu.

¹⁶ O tosa lamamɔɔ a cuavaa ndɔa le, vana ca ko bɛɛ aa o co ndu le nɔ nda le. Kpeku co ndu le sanga o sanga kon-ndo siŋnɔnndo ɲɛ fondoo fúú le.

¹⁷ Kani ya Hala, i ke ndu kɔlkalu le, I ke ndu taasi le.

¹⁸ Kɛ te o cɛn pɛ mò kandu le kiltan, o mɛi vana co ɲaanɔnndo o sow coo-o kɔɔli polon.

¹⁹ Mò va maa nɔm yɔngu sow kpaayaa ni? Vɛ̀ɛ̀ nɔm báá ndu yɛki co ndu o labolo-o ni?

²⁰ Vɛ̀ɛ̀ nɔm ɲindu ndu tumndo mò huulu maa sóónɔ ni? Siòònde bii vana a caŋ ndɔɔ ni.

²¹ A yoomuma kɔlkɛndɛma ndɔan, mò nɛw lɛŋnden o bóltan nin, mò kuel ɲɛm cɔwvon a kiltan kpɛ́ɛ́nɛ̀nɛ̀.

²² O nɔ isiòòn te, ɲɛ-ɲɛ vueinun ndu le, hali mɔɛi cɔwve, o ɲeenun ndi le.

²³ Bɔlɔla vovaa n'kɔɔlan le co sɔɛi ndu o kɔɔ vɔkɔ-vɔkɔ, Bállo a mɔɛi cɔwve co ndu iŋɛlɛngi-ŋɛlɛngiei coo.

²⁴ O co cumndo le keleŋaa huuloo, te buloo soo dɔ́ɔ́ pɛ, o tiw lɛ ba simndan te.

²⁵ Te buloo soo dɔ́ɔ́ pɛ, o hul fúù! Cɔwvo lo lándán, mò tuei ndu cun, mò tuei kuubaa yondaa a vɔkɔ-vɔkɔ cɔwvo.

²⁶ Vɛ̀ɛ̀ a kɔlkalu nɔmndo kòòndóò can coocoo ni, mò pɛngɛla kumbanndan le kɔlan a ba too?

²⁷ Mò va maa nɔm ke kovɔ́ɔ̀ kɔlkaloo le helɔɔ coocoo, le vɛɛnnden tangullo ni?

²⁸ O powta kpovalan nin o cal ni, lon koni o lɔl ni, o tullo pɔ́-pɔ́ nɛɛ vana nɔla tiiya le-a.

²⁹ O lo lon, mò nuwviaa ɲɛ o co biyɔɔ-o, ɲɛ kon lo lándán, mò saalun ndu.

³⁰ Ɲaa kiɛyaa koovan ma toal puluaa-puluaa-a cuavaa ndɔa yeema ni, nɛɛ visia vílɛ́iya co-a vana saalun ndu ni.»