SƐBƐ YƆB-O 33 - BII BILA

Hala tuisi vana sangaa pum coo le vana silaa

¹ «Mɛɛ nihau, Yɔb yaŋ nilan o sɔɔn ya co nɔm dimul-lon, yaŋ nilan o sɔɔn nun kpede!

² Kani i hin sondoo kumbi mì diɛɛmule nilen le soo ya o sondo.

³ Sɔɔn co ya fula o sondo-on, o kɔl nuu nin sanaa n cɛn ni. Toɲaa kpeekpei co ya fula o sondo ni.

⁴ Kɔl Hala-o toosiaa ya ni, Hoiyii Ó-Hiow-Kpaayaa-Kpow-vo-e co tosaa ni mì va yoomu.

⁵ Taa tiw pɛ ba, mɛɛ mulul-la. Bɛɛndian ɲɛkɛndɛi, mà sim ya o hɔl.

⁶ Hala o hɔl, maa nɔm ya co ni, ya bɛɛ o puuloo nin ya fula ni.

⁷ Lelan, mɛ̀ɛ́-mɛ̀ɛ́ ya vueinun, siòòŋii biinin nɔm a ya le, i tuisinin kpaaya nuu nɔm coo a paa-kala le.

⁸ Kɛ nɔm yɛ, má soaa, mí sɔɛi nɔmii ken i del-la o lani.

⁹ Má dimi aa: ‹I tɛɛmbuu isɔɔ le, i del kasi le. I dendu, dɛnɛ vɔɔn co ya nin te.

¹⁰ Fúú ko Hala co sɔɔn hɛɛnduuo ya coo ni, mó siinguu ya yaamɔɔ ndɔ.

¹¹ O co ya pelon kayakayaa, o co heelu nuu a tuusu nuu mɛɛndanndo.›

¹² Mɛɛ mì mulul nɔm maa o nɛi kon coo ndu, a nɔ dí le. Kani Hala hiow vanacieo.

¹³ Le yɛɛ nɛ n co yɛ ndu ciŋilanndo? Mò va maa le tùú o múlì sɔɔn kpow loo ni?

¹⁴ Hala va pɛ sɔɛi, o keì o nɛiyo pum coo, o keì o vɛlɛ nɛi celen coo, kɛ vana dow nɛila lan taasi le.

¹⁵ O soaa o lɔma sɔlaan nin, o vundulen nin icɔl. Tuma vanndacieea hiawnun o lɔan cundun, mà vi diallon pɛ́ o kpelela ndalan coo-o.

¹⁶ Tuma kon, o cɔm nda sɔɔn pum, o sila nda ɲɛkɛndɛi a sɔɔn mun o kɔɔ,

¹⁷ le nda faŋaa o nɛila dɛnnda vɔɔnndan coo, a le nda kandaa a dɛnnda kuundianndan.

¹⁸ O kon, o kanda yoomula ndalan a soon piɔ́mndo, o faŋa nda o nɛi piɔ́mndo coo.

¹⁹ Kɛ Hala sila vɛlɛ vanacieo a ndu sangaa tuisio coo, mì sanga kon yɔl ndu o kpele, mì ɲɛ nɛyaa luɛi ndu o paalan nin di.

²⁰ O kon, ɲɛ-ɲɛ diaa hɛnan vana kon te, hali ɲɛdiaa óò hɛnan ndu taw-vo, mò nɛinun ndu.

²¹ Mò lo ɲawvo háá vana ci lɛ ivisi ndu lekɔɔ le. Mì paala ndɔla vanáà ci paandu le lan la fulan ceen kpendekele.

²² Lende o kɔa a sɔɔnguuo o sɛiyo hɔl-ndɔ ni, mì yoomu ndɔɔ del kpaayala piɔ́mndan o ba.

²³ Kɛ te vana kon nɔ pɛ mɛlɛkanɔ soaa le ndu-o, o va bɛɛ o pilɛ kpé sɔlan o mɛlɛkaa vàá pilɛ tɛɛn ni, mò cɔm ndu ɲɛ o bɛnda le tosaa-o,

²⁴ mɛlɛkanɔ kon tuinunnin ndu iɲíí, mò dimul Hala aa: ‹Baŋa ndu, mal ndu tolɔɔ ciee-piɔ́m te. I saalun ɲɛ le ndu baŋaa.›

²⁵ O kon, dialun ndɔn muungu maa dialun felengi, o muungu maa felenginɔ cɛn sɛnɛi-yo.

²⁶ O soo pɛ o Hala lo, Hala ce ndu ɲia, o fula Hala o hɔl a ɲaaloo. Kani Hala ke vanacieo dí ni, mò mal ndu haki.

²⁷ Mì vana kon soli condei vannda o hɔl, mò dimi aa: ‹I tosa hakio, mì laasiaa dɛnɛ sandaa, kɛ Hala bii mɛɛ kela nuu yɔŋnun yɛ le.

²⁸ Tuma ya tolɔɔ ciee-piɔ́m-ndo, mí Hala baŋa ya. I co yoomu mí va vɔ ɲɛ-tengaa cɔu.›

²⁹ Dɛnnda Hala co tosaa le vanndacieea lan la co lan kpow ni. O co lan miinguo lediin-diin, leyàá-yàá mɛɛ o bɛ́ndà yɛ,

³⁰ le nda faŋaa o nɛi soon piɔ́mndo coo, mò luei nda o ɲɛ-tengaa yoomaa nin.

³¹ Yɔb, yaŋ ya nilan ɲɛkɛndɛi, mei kpili, ya co sɔɛi ni.

³² Taa nɔ pɛ isɔɔ le ya dimullo, mɛɛ mulul-la. Kani i yeema mì ke nɔm dí.

³³ Taa nɔ yɛ isɔɔ le dimi le, mɛɛ yaŋ ya nilan. Mei, mì cɔm nɔm kɔlkaloo.»