SƐBƐ YƆB-O 32 - BII BILA

SƆƐI ELIHU SOO-E (32—37)

¹ Mí langbaa yàá kan a mei kpili, a ve lɛ Yɔb mulul te. Kani o va laalanndo maa o sandu.

² O kon, mí Elihu, po Barakeɛl fula o polale Bus len nin, o yungu Ram-ndo nin-ndo tuulu kɔl. Mó tuulu kɔl a Yɔb le tùú ndu pila va cɔmndo maa o nɔ dí a Hala-o.

³ Mó tuulu vɛlɛ kɔllo a caaŋaa ndɔa yáá-a, kani a sɔla ɲɛ-ɲɛ nda mulul Yɔb le, kɛ má va Hala yaalaa.

⁴ Le tùú Elihu va cuaambɔɔ nda tɛɛn-ndo, mó cum le sɔɛi o Yɔb lo.

⁵ Kɛ, ndóò cɔu maa vanaa yàá kan ndáà nɔ lɛ ɲɛ-ɲɛ nda dimul Yɔb le, mó tambu kɔl.

Elihu cɔm le kɔlɔ o cua sɔɛi-yo

⁶ Mí Elihu, po Barakeɛl-lo, fulaa o polale Bus len nin cua sɔɛi, mó dimi aa: «Ya, felengoo ya co vɔ ni, kaasonnda niaa niaa co ni. Lelan siòònde bii ya ni, yáà tiwba niaa ɲɛ co ya o kɔl-lo cɔmndo le.

⁷ I va yiyanndo maa ‹Kaasonnda bɛnda mà dimi hee ni, nda kaasoŋaa nɔ nin vɔsilan taw-va bɛnda mà pɛɛku vannda dɛnɛ sinaa ni.›

⁸ Nduyɛ, o kpeekpeiyo nin, Kɔl co vanacieo nin-ndo, ndu kìndì ndu kɔl ni, mò ke ndu taasio.

⁹ O co le ikaasonya le vana kiandu kɔl te, o co le iyuuva le vanà sina dɛnɛ le.

¹⁰ Le hee ya bɛɛ dimi ni aa la yaŋ ya nilan, mì cɔm ɲɛ ya yiyan-ndo.

¹¹ I tuei ɲɛ niaa mɛɛlu dimi-o, mí yaŋnun mɛɛ niaa cɔm sɔɔn kɔlɔlan háá le yiyan Yɔb-o sinaa yɛ.

¹² Mí yaŋ niaa nilan ɲɛkɛndɛ-kɛndɛ, kɛ vana-vana, o niaa tɛɛn nɔla ndu biondɔnnda ndɔlan cɔmndo le, vana-vana mulul ndu o nɛi le.

¹³ Kɛ nduyɛ, la dimi le aa langbanɔɔ ho sina bɔɔ dɛnɛ, Hala pila kínɛí nɔla ndu hiovɔɔ ni, kɛ o co vanaciee le!

¹⁴ O co o ya lo sanaa le Yɔb soo le, i mululnin vɛlɛ ndu mɛɛ niaa yiyan yɛ le.

¹⁵ Siòònde bii niaa, mí la mei kpili, la nɔ lɛhau mɛɛ dimia le.

¹⁶ I cum háá mí la cii ɲɛ-ɲɛ niáà nɔ le dimio dimi, mí la mei, kani la nɔ lɛhau ɲɛ dimia le.

¹⁷ Ya bɛɛ, i yeema mì muli, i yeema mì dimi ɲɛ ya yiyan-ndo.

¹⁸ Kani i nɔ yiyanndan taw, kɔl nuu co ya suukoo le ɲɛ ya nɔ o kɔl-lo dimio.

¹⁹ Kɔllo pɛ ya mɛ̀ɛ́-mɛ̀ɛ́ mɔiyan ma kindun o hemndo nin, mì ma pɛl hem kon, hali o va bɛɛ o sɛnɛi yɛ.

²⁰ I co isɔɔ mì tiimbun kɔllo, i kumbinin sondoo mì muli.

²¹ I yeema mì sim vana-vana kɔɔli le, i lisanin vɛlɛ vana-vana le.

²² Kani i cee vanacieo lisaa le, te i tosa pɛ ken, vana cɔu ya-o faŋa ya o ceendo coo cɔ́-cɔ́.»