SƐBƐ YƆB-O 30 - BII BILA

¹ «Nihau yɛ, i siŋnun ɲɛ lapisullo cuaambɔa ya cúú o kɔɔ-a o ba. Nduyɛ, paandu fuɲaa ndaa ve ɲɛ-ɲɛ ya o hɔl te, ndáà bɛnda hali le nda lueiyo tunaa nia tɛɛn te.

² Yɛɛ kpeekpei yáà sɔ́là yɛnin nda o ba, à yoomuma ndan máà cuu kan-nda?

³ Yiaan a kuɛi ndíì cii nda ɲɛvi, má va ɲɛdiaa nuwviaa o dɛɛlala vesɛilan nin, o tàndà yililio nin.

⁴ A va bil yeela maa ihɛl-lo kiɔndɔɔ o bɔɔla yɔmii pɔmbɔlan tɛɛn. Ndáà nɔ ɲɛ celen diaa le fɔ puundun iyɔmndon.

⁵ Vannda va nda tovɔɔ le nda faŋaa vanndacieea tɛɛn, má va nda yondaa kɔɔli mɛɛ vana yonda vuiyo kɔɔli nuaa yɛ.

⁶ O kon, má kɔ kila caltan o pembon lɛɛndonndo, o soonndan nin a o buuluula powta kpovalan nin, o peela pɔmbɔlan holnɔnndo.

⁷ Má diinun kundalan o bɔɔla n'yɔlan bɛngu, má va yoondiaa, má va sɔɔŋiaa o bɔɔlan bɛngu.

⁸ Diɔmaa nɔ ladio le-a súúo pum nda va ni, á va nda lɔɔ a yɔmnde le nda tovɔɔ o lɛŋnden nin.

⁹ Nihau, vanaa kan co condon solio a ya cuunduuo nuaa ni, á diola nilan o lasondo kínɛí nda co nin ni.

¹⁰ I kusulan nda, má va ya kpakpalaa. Lɔluan tufɔɔ ya o hɔl, a ci ken ɲɛ-ɲɛ le.

¹¹ Le tùú Hala yɔnyɔla yoole kpaasiaa nuu mó yɔl-la-o, a nɔ lɛ maɲulu o sondo a ya le,

¹² Vanaa co cɔnɔnndo o ba ni kɛndɔɔ coo le ya pelon cuaa-a co sɛ́lɛ́, à co nɛilan nuwviaa le ya tɛɛmbuuo.

¹³ A co nɛila nilan kiolɔɔ ya laci, mà va kindinndo le ya laasiaa, a nɔ mako le mala sɔla le ken te.

¹⁴ Vana ce nda pɛ hunɔɔ aa o tɛɛngii bɛnduei nda co keiyo ni, a co keiyo o bémbélan coo mà va ya hinullo a kiltan.

¹⁵ Dɛnɛ yulan-yulan súú-súù ka ciŋilan ya, vana sɔvɛyɛi nii kɔɛnnun mɛɛ ɲɔɔ kɔannun o hoeiye nin yɛ. Dɛnɛ ni kɛndɔɔ mɔɲa-mɔɲa maa yumbuyumbu.

¹⁶ Nihau, yoomu nuu co cuunɔnndo, palɛi dɛnɛ palai kpuva ya.

¹⁷ Icɔl, ɲɛ nɛyaa luɛi ya háá o paalan nin, ò lò ya yɛɛvɔɔ dɔvɔɔ háá i nɔla lɔan te.

¹⁸ Hala saa ya domaa a paa-kala, o ŋɔw ya bololan maa doma bɛndu nɔ bolola bɔɔ loo.

¹⁹ O yɔl-la o loolioo nin, mí siŋnun maa cundu a lapul.

²⁰ Nɔm Hala nuu, i co koŋullo nɔm o lani, kɛ a co ya mulul te. I co isisi nɔm o hɔl, kɛ tofa nɔmndo co ya buuluuo.

²¹ A siŋnun vana kɔlvesɛiyo le ya, a co ya ciŋilanndo a yoomuma nɔmndan kpow.

²² A cua ya o hoeyii felenfelennde nin, má va ya hiiloo voŋa-voŋa. Hoeyii fùkù-fùkùei co ya muuluuo fulaa-fulaa.

²³ I sina maa ciee-piɔ́m n co ya yɔ̀ɔ́ ni, nɛɛ ɲaa yoomaa kpede kɔa bɔɔŋianndo-a pɛɛn.

²⁴ Vɛ̀ɛ̀ vana co vuo-o siɛ́ndì balan te? Mò va maa vana vanin pɛ o dɛnɛ palaa nin ndu koŋul-lɛ le mala sɔla le?

²⁵ Vɛ̀ɛ̀ o co caŋndo le yáà caŋ le vanaa co o sangaa nin-nda le? Yáà ce pɛ vana dɛnɛ palaa co coo-o o co ɲííye le ndíì bii ya a vana kon te?

²⁶ I va dɛnɛ kɛndɔɔ cumndo, kɛ mí dɛnɛ palaa komal-la, i va ɲɛ-tengaa cumndo, kɛ mí ɲumndan ma tul-la.

²⁷ Ninndo co ya kalaŋanndo tuŋ, palɛi dɛnɛ palai komal-la.

²⁸ I co kela o ŋɔalɛi kpuluká, kɛ o co lepala le le lom ya le. Hali o sɛ́lɔ́ɔ́ tɛɛn, mì sim mì yonda le malaa sɔlaa.

²⁹ I siŋnun puapilɛ tivolla, mí siŋnun vɛlɛ vanayɛi hua.

³⁰ Yáw nuu co ya piimiaa lekɔɔ tuŋ, diallon co ya luɛyɔɔ tuwvo o paalan nin di.

³¹ Le condun dɛnɛ palan kínɛí bondoma nuu co nin ni, Le diomnda vanaa caŋnda daama sɛ̀ŋnde nilen le caa nin hɔŋnɔnndo ni.»