SƐBƐ YƆB-O 3 - BII BILA

SUUKAN YƆB SUUKAN NDA CAAŊAA NDƆA-O Yɔb cɛɛŋun le sanga va ndu coo-o

¹ O kon kɔɔli, mí Yɔb kumbi sondoo le paale o velun coo len dangaa dɔvɔɔ.

² Mó soaa, mó dimi aa:

³ «Màá paale len léè sia le! Paale ya velun-nden pɛɛn. Màá ɲumma man máà toal te, ɲumma dimi man aa: ‹foli vanapɔnɔɔ cuannun›-ndan!

⁴ Màá paale kalalen léè siŋnun ɲumndan! Màá Hala, nɛɛ o connun coocoo-a ndóò loonun a paale len te! Màá ɲɛ-tengaa ndóò komal paale len te!

⁵ Màá ɲumma bɛnduan a vundule piɔ́mnden léè tol paale len coo vofu! Màá yumbuyumbo bɛndoo ndóò tol o paale len coo! Màá halataalaa va lɔ́ɔ́-lɔ́ɔ̀ o tiŋi kpilo o paale len coo, mì ɲɔɔ ndóò kumbu ɲɛ-tengaa paale len mì siòònde ndíì bii len!

⁶ Ɲumma man yɛ, màá máà hiow piimiaa o ɲumma tɔ̀an tɛɛn! Màá vanáà cɔm-ndɛ man o ɲumma tɔ̀ma vɔsio coo le! Màá ɲumma man máà cɔmnun-ndɛ o ipaangu oo ipangu coo le!

⁷ A toɲa, màá máà va ɲumma nɛŋi makoo-mako lean, haliko vana-vana óò yonda yonda a kɔlkɛndɛ lenin te!

⁸ Màá vanaa dɔaw palɛi danga-a ndáà dɔw ɲumma man danga, mì mandea tindi N'Yalɛ́iyo-a ndáà mɛna man!

⁹ Màá loeon co o ɲumma paale siaama man nin-ndon múm pɔ́lì! Ɲumma maa va bɛɛ ɲɛ-tengaa cumndo, màá ɲɛ-tengaa kon ndóò fula le! Màá máà ca ɲɛ-tengaa paale siaa le!

¹⁰ Kani ɲumma man kuuna ya violɔnndo le, má kɛɛlu ya dɛnɛ palaa ho cɔu la lehɔl te.

¹¹ Ko le yɛɛ nɛ kɛɛ yɛ vunnɔn kala nuu o dembe? Ko le yɛɛ nɛ ya kɛɛ yɛ vunnɔn mɛɛ yáà fula dɔ́ɔ́ kala nuu o dembe nuaa yɛ?

¹² Ko le yɛɛ ya komal-lɛ vulan tan tiɔn le ya biyɔɔ? Ko le yɛɛ mɛɛyan ma va yɛ man miɔn le ya vɔɛsio?

¹³ Àá! Màá yáà vannun nin hau o ɲululaa fɛɛ ciee-piɔ́m. Màá yáà vannun nin o lɔma ni, mì yáà vannun pɛngio

¹⁴ naa masaa a vanaa latɔ́ɔ́a kei o lelɛŋnden coo-a latulu, a ndáà cɔu fondala latɔ́ɔ́lan, mí lan la va hau latambɛilan-nda pɛɛn.

¹⁵ Maa yáà vannun nihau naa cuavaa lemasaa, áà nɔ sianion mí ndáà pei cɛila ndalan a volin latámán-nda.

¹⁶ Te kon te, mì yáà vilun bɛɛ le, yáà vannun bɛɛ maa hɔ́ɔ́ velun o vílɛ́iyo-o, o ci bɛɛ paalen too.

¹⁷ Ciee-piɔ́m ndu, vanaa kɔlvesɛiya biiŋun lon te. Lon vanaa sanga mí yoomuan ma cuu nda-a pɛngi ni.

¹⁸ Vanaa kaasoa bɛɛ, vana kpeeŋiaa nda lon te. A tui lɛ diom vana cumulaa vanaa kaasoa lon te.

¹⁹ Hiyan co cuaambɔ a kaasonɔ tɛɛn ndon te. Lon ndu, cɛɔ bɛɛ co lɛ o ba vana bɛngu le.

²⁰ Le yɛɛ nɛ vana co o sangaa nin-ndo ɲɛ-tengaa yɔngoo? Le yɛɛ nɛ vanaa co o dɛnɛ palaa nin-nda yoomoo yɔngoo?

²¹ Vanaa kan co piɔ́mndo cumndo, kɛ piɔ́mndo co hunɔɔ. A co piɔ́mndo nuwviaa hiovɔɔ bolofaa coo.

²² Te ndáà komal pɛ sɛiyo, ɲɔɔ ndóò hɛnan nin nda mì ndáà dɔwnun ɲaale taw.

²³ Kɛ ya, i co macoaa maa vana sinà nɛɛ o co kɔlan-nda loo, o Hala kinda o kungaa nin-ndo.

²⁴ Kuŋndan la co nin balo nuu ni, cɛɛŋɔnnda nilan la co fulaa maa mamɛn.

²⁵ Sɔɛi-sɔɛi ya yɔŋ pɛ siòònde, ndi kpeekpei tosalan ya ni. Dɛnɛ ya buulan-ndo, ndu komal-la ni.

²⁶ I nɔ lɛ nila ɲulu le, i nɔ lɛ kɔlɲulu le, pɛngio co lɛ le ya le. Kɔl yulan-yulanndo ko co nin le ya ni.»