SƐBƐ YƆB-O 29 - BII BILA

Sɔɛi Yɔb soo vɛlɛ le sanga ndɔɔ cɔmndo-e

¹ Mí Yɔb cua vɛlɛ sɔɛi, mó dimi aa:

² «Àá! Te yáà muungunin pɛ maa paandu, maa o telen Hala ndóò nɔ ya hɔlten coo-o!

³ Telen fitina ndɔɔ va sandei ya o bolten coo, mí ɲɛ-tengaa ndɔɔ va ya nɛiyo cɔmndo-o pɛɛn.

⁴ Kpòkóó! Te yáà nɔla pɛ muungoo maa lɔ́ɔ́ ya va o dimio coo-o! Telen canyɛi Hala-e va o cɛi nuu coo-o pɛɛn.

⁵ Tuma Ó-Hiow-Kpaayaa-Kpow-vo va vɔ ya ikɛi-yo, boondii cuavaa nia ndáà va ya a balaa pindo-e.

⁶ Telen kon, i va pelon pulɔɔ a cuɛima manɔnɔan, cuɛima oliviean ma va fulaa o doola nuu nin maa mɛmma pee pɔmbɔ.

⁷ Te yáà fula pɛ le kɔlan o dio luɛyaa kobio, te yáà cii pɛ fonda calaa toosiaa le calle lon,

⁸ langbaa felengia ndáà ce ya dɔ́ɔ́ pɛ, ndáà cɛn ndáà vinin, bɛndua yuuvɛiya ndáà cɛn ndáà sim,

⁹ vanaa bɛndua ndáà mei sɔɛi kpili, ndáà handun balan o lasondo,

¹⁰ simlacia ndáà lo diomndan tuisio a sɔɛi mì ndáà mɛɛlu mei kpili.

¹¹ Vanaa va ya yaŋnɔndo-a kpow va ya candɔɔ, vanaa va ya cɔu-va, nda va ya sangalaa.

¹² Kani i va vanaa bala fondoa va ya ɲunaa le nda malaa-a malaa, i va víyaa nɔ vanaa malaa le-a malaa.

¹³ Vanaa va piɔ́mndo-a va duaa ndaa mɛiyo ya coo, i va vanlaandu piaandaa ndaa vi-a kɔllo nɛŋio.

¹⁴ Dɛnɛ sandaa yáà cuɛinun ni maa lavolɔɔ, sandei yáà vownun ni maa doma bɛndu, mì yáà vownun ndi vɛlɛ maa mɔsil.

¹⁵ Ya va hɔlta vana sumɛiyo ni, ya va pelun vana bɛvɛiyo ni.

¹⁶ Ya va fuɲaa vanaa ikɔɔa ni, I va vɛlɛ dɛnɛ mialla toosiaa ɲɛkɛndɛi.

¹⁷ Kɛ yáà bii pɛ vana sandaa lepɛŋndo, yáà yimiyimi ndu ciŋndon, yáà kala ɲɛ o mɛɛnun-ndo ndu o sondo.

¹⁸ Lelan ya va dimio ni aa: ‹I vunin o vɛɛnnde nilen nin, palɛi nii bandunin maa yow nɔ diolan aa Fenikse-o.

¹⁹ Puundun nun luɛinin o mɛnndan nin, kɛmndan ma lɔlnin o lɛvun nun coo pii.

²⁰ Biilu nuu muungunin o sɛnɛi ya nin, kpaasiaa nuu sɔlanin yoomuan ya o ba.

²¹ Telen kon, te yáà va pɛ sɔɛi, vannda ndáà mei kpili le yiyan nuu sinaa.

²² Te yáà cii pɛ sɔɛi, vana-vana óò híílùù diom nuu le, sɔɔn nun va delio nda coo maa matoŋtoŋ.

²³ Cumndo ndáà cum ya ni, mɛ̀ɛ́-mɛ̀ɛ́ vana cum piɔɔ le siaa nuaa yɛ, A va sondolan kumbio le cumndo mɛɛ vana cum piɔɔ sialte tasoo nuaa yɛ.

²⁴ I va nda mɛmullo tɛ́fɛ̀lɛkɛlɛɛ, kɛ a ve laalan maa yáà mɛmulnin nda le. Ndáà yeema mì ɲɛ-tengaa va ya o hɔl-lo ndóò hɛlun nda hali ɲɛ-pɔmbɔ le.

²⁵ Ya va nda simndan laci le nda nɛiyo cɔmndo ni, maa masa ya va vanaa ndaa cɔwva tɛɛn ni, maa vana ɲɔɔlu vanaa va o kɔltambɛiyo nin-nda ya va nda tɛɛn ni.›»