SƐBƐ YƆB-O 27 - BII BILA

Muli mɛɛlaa Yɔb mulul caaŋaa ndɔ-a o

¹ O kon mí Yɔb cua vɛlɛ sɔɛi, mó dimi aa:

² «I co mɛnan o diola Hala yoomaa lan, Hala kon pɛɛn, ó kɛɛ le ya dio keo-vo, Vana-Kpaaya-Kpow, ó pei mɔnɛi o kɔl nuu nin-ndo,

³ maa te yoomoo co vɔ pɛ ya o n'dial, mì hoeyii Hala-e co vɔ ya fulaa o milin,

⁴ cɔcɔn nun mun diminin lacòò le, diɛɛmule nilen le mɛinin toɲaa dimio le còòlan dimio le.

⁵ Kɛ háá mì vi, i pɛnginin tɛɛmbuu ni lepɛŋndo cɔmndo le. Kɛ̀i-kɛ̀í bɛɛ, Le niaa dio keo!

⁶ I co ndi dimi, mì tiinda vɛlɛ maa kela nuu nɔ isɔw le. Ken ndi-ndi, lende i co ni, i mangalanin diom kon te. Kani paale pilɛ bɛɛ kɔl nuu cɔm ya biondɔn oo biondɔn te.

⁷ Màá dɛnɛ palaa toal vanaa vɔɔnda coo-o tol yaamɔɔ nuu coo, mì yamɛi kílùn vanaa sendu le-a-e i kílun vanaa co ya cɔlɔbaa-a!

⁸ Tiindan yɛɛ kpeekpei vana kɔlvesɛiyo nɔ yɛ lɛ, te o cuu nin pɛ kpeeŋa, mì Hala cii yoomu ndɔɔ cua?

⁹ Te dɛnɛ pala tol pɛ ndu coo, vɛ̀ɛ̀ Hala tuɛi pá koŋul ndɔɔ?

¹⁰ O dɔawnun pá ɲaale Ó-Hiow-Kpaayaa-Kpow-vo o ba? O piɛi pá ndu telen oo telen?

¹¹ I co niaa pɛɛkoo yɔngu a kpaaya Hala-o o kɔɔ, yiyannda Ó-Hiow-Kpaayaa-Kpow-o lan, i vinnin niaa o kɛ́-kɛ̀ le.

¹² Niaa yɛ, la sìná ken ɲɛkɛndɛi, kɛ le yɛɛ niaa co yɛ niko sɔɔn fondon dimio?

¹³ Kɛ́ Hala manda le vana kɔlvesɛiyo-o co hoo ni, kunda Ó-Hiow-Kpaayaa-Kpow-vo mel vana vɔɔndo-o pɛɛn:

¹⁴ Te cuavaa ndɔa kui pɛ, o mɔɛi cɔwve bɛngu nda cuunin vu ni, cuavaa ndɔa imamaa yɛ, a sanganin a yima fofolan.

¹⁵ Nàà halimaa ciinin vanaa lonin yoomu-a, laandaa nda co mɛi-ya ceŋnin nda le.

¹⁶ O cuungiaa bɛɛ volion maa mɛɛ cundoo co yɛ, mò dengela volola vownanndan maa looli,

¹⁷ vanaa sandaa cuɛinunnin ndan ni, mì vanaa tɛɛmbuu isɔɔ le-a piɔvan volin ndɔn mun.

¹⁸ Cɛi vana kon tangullo nɔ mayoomu le, vana ca ko aa kùùle kpalilnɔ cumulaa nakɔɔ ni.

¹⁹ O bolofaa nin o co hinilan ni, kɛ o sɔlanin kumbɔɔ vaa lende le. Telen o kumbinin hɔltan-ndo, o cinin ɲɛ-ɲɛ le.

²⁰ Buulanndan la co ndu hinullo maa mɛmma hunaa. Felen-felenndo co ndu cuaa o icɔl.

²¹ Hoeyii fula a ba paalen le can-ndo-e hiow a ndu mò lo pɛ, hoiyii ken faŋa ndu a yoomuan o fonda ndɔɔ.

²² A co ndu viiyo a kɔɔn, a co iɲíí tosa a ndu le, o co ɲaanɔnndo mò va kɔɔn mun kpakpalaa.

²³ Vannda tueyɔɔ tambii ndɔɛi tɔ́ɔ́, ma va balan tiɔmɔɔ, a co huiyon hɔŋndo a ɲaaloo nɛɛ o va icali-a.»