SƐBƐ YƆB-O 24 - BII BILA

¹ «Ko le yɛɛ Ó-Hiow-Kpaayaa-Kpow-vo kɛɛ yɛ lɔ́ɔ́ mɛi le yaman ndɔn kiolɔɔ? Le kɔlɔ yɛɛ vanaa sina ndu-a kɛɛ yɛ palɛi ndɔɛi cɔ?

² Vannda co pɛɛngula lelɛŋndan faŋaa o foofola ndɔlan, vanaa pum a co cɔlua ciimbua mandaa.

³ A co vííyo sofɛlɛ ndɔɔ poondaa o ba, mà va naw vanalanɔ pɔnɔ ndɔ vi-o biyɔɔ o landei nin.

⁴ A co vanaa ikɔɔa ɲiinduuo o nɛilan coo, mà va tosaa mí vanaa bala fondoa o lɛŋnden nin kpow a va vininndo.

⁵ Idii púŋ, a fula le kɔlan baalaa le kela ɲɛdiaa vana ca ko bɛɛ aa sofɛlɛa yondoa co o lɛŋnde vesɛilen nda ni. O dɛɛlala vesɛilan nin koni nda kɔa ɲɛdiaa nuwviaa le cuavaa ndaa keo ni.

⁶ A co bil co o hòólan nin-ndo kiolɔɔ, mà va rɛsɛnndon keenduuo o nakɔ vana kɔlvesɛiyo nin.

⁷ A co lɔan kɔɔle fondo, volɔɔ vownanndo bɛɛ co nda lekɔɔ le, a nɔ kola le kuumbɔnndo le hoeiye le.

⁸ Piɔɔ co fulaa o pembon coo-o co nda liviaa yɔ́-yɔ́, mà va kɔlan powta kpovalan holiholinndo, kani nɛɛ celen viannan co le.

⁹ A co vííyo mɛɛlen sungɔɔ o sondo, mà va vana bala fondoo landon biyɔɔ o ba.

¹⁰ Vanaa kan kpow a co kɔlan kɔɔle fondo, volɔɔla co bɛɛ nda lekɔɔ le, A co tumbula n'maltan vilio dembela fondo.

¹¹ A co cuɛiyan toosiaa o pila lo, a co mɔiyan toosiaa o doolaa nin a bolola vesɛilan.

¹² Vannda co cɛɛŋɔnndo o kobio nin, kɔlta vanaa boolun-nda la co koŋullo, nduyɛ Hala co ɲɛ-ɲɛ tosa a dɛnnda vɔɔnnda lan o kɔɔ le.

¹³ Vanaa co kon tosaa-a siŋnun yaamɔaa ɲɛ-tengaa, a sina nɛila ndɔlan te, a co kela o nɛila ndɔlan coo le.

¹⁴ Ɲɔɔ và vɔ yifidii, mì vana diyaa n'vanndo cɛn, mò dii vana bala fondoo a vana ikɔɔ, o kon ɲumndan ma tol pɛ, o kɔɛ vuilen.

¹⁵ Vana suundɛiyo bɛɛ, ɲumndan koni o cal cumullo ni, o cɛn pɛ kɔlan, o dimi aa: ‹Vana cinin ya le.› O kon, o kuumbun kola vaan-vaando o hɔl.

¹⁶ O ɲumndan nin koni vuiyo buuluu cɛilan ni, ipala, o kindan dio ndɔɔ kɔɔli. O sina sɔɛi ɲɛ-tengaa le.

¹⁷ Le nda kpow, ditɛɛn paale siaa co vunduma piɔ́mndan nin, kani a hiw nin dɛlio a yɔŋ vɔɔn maɲumndo.

¹⁸ Kɛ niaa niaa, la co dimio aa: ‹Vanaa yɔŋ vɔɔnda lusul te, a co hiovɔɔ o mɛnndan coo. Fondala nda sɔla o lɛŋnden coo lan la dɔwnun danga, a kue lɛnin o nakɔla ndalan nin te.

¹⁹ Mɛ̀ɛ́-mɛ̀ɛ́ vɔɔlen a hangullo veesiaa mɛmma n'kpungban nuaa yɛ, lende koni ciee-piɔ́m misimisi vana lahakio ni.

²⁰ Yɛɛ kɛndɛ! Mɛɛle vɔɛsi ndu len bɛɛ le pɔɛɛnun ndu, mì dɛlua siinguu ndu ɲɛdiaa nda yeelɛi. Vana yiyan ndɛ bɛɛ a ndu le! Dɛnɛ vɔɔndo kelun maa yɔm.

²¹ Ndu tɛɛmbuu vanalanɔ vilu loo, o nɔ n'cuaw loo labɛɛ ni, o yɔŋnun vana kɛndɛ a vanalanɔ pɔnɔ ndɔ vi-o le.›

²² Kɛ Hala nɔla ni mò nan vanaa kɔlvesɛiya a kpaaya ndɔɔ, mò viow nda. O cɛn pɛ, vanaa kan a nɔ̀ lɛ tiindan kɛ-kɛ le yoomu ndaa le.

²³ O ke nda kɔlkɛsiaa a nda pila o kɔɔ, kɛ, o nɔ hɔlten o nɛila ndalan coo.

²⁴ Vanaa kan, mà cuannun nda pila le telen bingi, o kon kɔɔli a siŋnun ɲɛ fondoo, a cɛɛlun maa tumbula n'malta nda koaw lan, a kelun maa yasa n'malu.

²⁵ Te o co dɔ́ɔ́ lende le i co le, mɛɛ vanndo sɛɛngiaa vɔ ya, mò siinguu sɔɔn nun sɔɔn fondo.»