SƐBƐ YƆB-O 23 - BII BILA

Muli Yɔb yɔngu Elifas-o

¹ Mí Yɔb cua sɔɛi, mó dimi aa:

² «I sanga biuvɔnndo a cɛɛŋɔnndan, dɛnɛ palaa co ya coo-o hiow ya mayoomu.

³ Kpòkóó, te yáà sina pɛ nɛɛ vana saalun Hala-a! Te yáà nɔla pɛ tiiyaa o calta ndɔlan dí dɛ!

⁴ I va lakɔ dɛnɛ nuu ndu cɔm. Sɔɔn mun cuunin ya o sondo le ndu dimullo le.

⁵ O kon mì yáà sina mɛɛ o va ya mulul-lɛ, mì yáà tuei ɲɛ o va ya dimullo.

⁶ Bàà mɛɛ mò soli yoomuan kpede le ya cɔlɔbaa? Ɛ-ɛ, yaŋnɔnndo ndòó yaŋnunnin ya ni.

⁷ O kon vana sandaa va kɔɔsa a ndu, mì yáà hɛlun vana ni kialaa n'yamaa le lɔ́ɔ́-lɔ́ɔ̀.

⁸ Kɛ, te i kɔɛ pɛ kpengii paalen le can-nde, o co lon te, i kɔɛ pɛ a ba paalen le del-lo, i seelunnin ndu le.

⁹ Ko bahavɛiyo pum o co coo a ba luaŋ-ndo ni, kɛ lon bɛɛ, i co ndu cɔ le. Ko vionnɔndo o vennun a ba too ni, lon bɛɛ, i komalnin ndu le.

¹⁰ Kɛ nduyɛ, o sina nɛi ya co coo-o, o fula pɛ ya kɔɔli mò tɔɔndan ya, i vannunnin o diandaa few maa isiani.

¹¹ Lepilɛ bɛɛ pelii nii faŋan o foofola ndɔlan coo le, i kela o nɛi ndɔɔ coo kpafii, i seí le few.

¹² I kɛɛ tɔŋnda fula ndu o sondo lan te, i mal yeemɛi nii le sɔɔn fula ndu o sondo-on biyɔɔ.

¹³ Kɛ sɔɛi o kelu pɛ le tosaa, nɛ̀ɛ́ kuunà yɛ ndu ndi? Ɲɛ kɔl ndɔɔ yeema-o, ndu o tosa ni.

¹⁴ Le hee, sɔɔn o kelu le ya-on, o co mun peelu, n'celen co vɛlɛ ndu o ba n'mandaa.

¹⁵ Lelan siòònde bii ya taw ndu o hɔl ni, te i yiyan pɛ, i buulan taw a ndu.

¹⁶ Hala tɛɛmbuu dialun nin fulan, Ó-Hiow-Kpaayaa-Kpow-vo peí ya siòònde nin ca.

¹⁷ Kani o co ɲumndan te ma vem ya meiyo le, o co ɲumma kumbu ya-an te!»