SƐBƐ YƆB-O 22 - BII BILA

Sɔɛi Elifas soo-e

¹ Mí Elifas fula Teman-ndo cua sɔɛi, mó dimi aa:

² «Vanacieo nɔla pá mò solul Hala kpekoo? Vanaciee kendu kɔl-lo, ndu pila ka o nɛŋulun makoo ni.

³ Tɔnɔ yɛɛ Vana-Kpaayaa nɔ yɛ o sandii nɔmnde nin? Te nɔm va pɛ vana sandaa o kela nɔmndo nin, tɔnɔ yɛɛ ndu sɔla yɛ?

⁴ A yiyan maa le tùú n co sɔɛi ndɔɛi biyɔɔ-o o co nɔm dɛnɛ palaa tuisio coo nuaa ni? Lelan o co nɔm kɔɔsallo ni?

⁵ Vɛ̀ɛ̀ o co tɛɛmbuula nɔmndan te la co labɔɔ taw le? O co hakila nɔmndan te la cúù cɔm te le?

⁶ Kani a va puapilɛa nɔmnda landon biyɔɔ o ba o fondo fúúo coo, a va vannda ɲɛ cuɛinan ndaa hiɔlɔɔ nda o ba má va nda mɛiyo kɔɔle fondo.

⁷ A ve vana kolɔɔ bii-o mamɛn ke le kolɔɔ le, a va vana yiaan ma va nɛiyo-o ɲɛdiaa tuŋɔɔ.

⁸ Lɛŋnden le va vanaa mayoomua o ba bɛngu, mí vanaa yongaa kungulan lecoo.

⁹ Nɔm, a va vanlaandua piaandaa ndaa vi-a mingio bala fondo, má va vííya balan pesipesio.

¹⁰ Lelan n biinun nuaa ni, má haw o yaŋɔɔlen, mí siòònde mingi nɔm yulan-yulan.

¹¹ Ɲumndan ma tol nɔm coo, a co ɲɛ-ɲɛ cɔ le, o limii mɛmma bɛnduei nin n co lou nuaa ni.

¹² Vɛ̀ɛ̀ o co o halataala coocoo pɔ́-pɔ́ le Hala co le? Tofa vɔ nɛɛ loeon co-a, mɛɛ fonda kon co coocoo pɔ́ yɛ.

¹³ Nduyɛ, ma va ɲunaa aa: ‹Yɛɛ Hala nɔla yɛ sinaa? Vɛ̀ɛ̀ o nɔla pá mò kelu naa iyama o yumbuyumbu yifidiio kɔɔli?

¹⁴ Yumbuyumboo co ndu o hɔl, o co cɔ le, Halataalaa balɔɔ koni o kela ni.›

¹⁵ Vɛ̀ɛ̀ a yeema ma lo kelaa o nɛi paandoo coo, nɛi vanaa yɔŋnda vɔɔnda kela coo-o?

¹⁶ Vanaa yɔŋnda vɔɔŋaa kan, má basun lɔ́ɔ́ pá mí telen ndaa tiiya, má hiaw mɛɛ cii cɛiye hiaw o mɛmma hunan nin nuaa yɛ.

¹⁷ Vanaa kan va Hala dimullo aa: ‹Mɛi naa lon! N sina maa nɔm co Vana-Kpaayaa-Kpow ni, kɛ yɛɛ n nɔla yɛ tosa a naa?›

¹⁸ Nduyɛ, ndu Hala kon pei cɛila ndalan a dɛnɛ kɛndɔɔ ni, Màá ya i del kela vanaa kan kɔɔli le!

¹⁹ Vanaa sandaa naŋnin kɔl le tambii ndɛi cɔu, mì vanaa tɛɛmbuu isɔɔ le-a mam nda aa:

²⁰ ‹Má cè mɛɛ yaamɔaa naa cuu kpede yɛ! Yinnden le lom tɔnɔ nda cuungiaa-o kpúlúká.›

²¹ Le hee, muungu diom pilɛ a Hala, ma sɔla kɔlɲuloo. O kon, dɛnɛ kɛndɔɔ mingulun nɔm.

²² Cɛl pɛɛkuula co fula ndu o sondo lan, mandan sɔɔn ndɔn nɔm o kɔl.

²³ Taa muungu pɛ Vana-Kpaayaa-Kpow o ibuŋ, a muungunin o fonda nɔmndo, mà faŋan dɛnɛ sandaa lepɛŋndo levil polon o calta nɔmndan.

²⁴ Vuu sianii nɔmnde o cundoo nin, te kon te, mal ndi o powta pee pɔmbɔɔ tɛɛn,

²⁵ mí Vana-Kpaayaa-Kpow siŋnun sianii nɔmnde, mò siŋnun volii nɔmnde.

²⁶ O kon a siinguu dɔ́ɔ́ Vana-Kpaayaa-Kpow vana n dɔawnun ɲaale nin-ndo, ma tofa ndu Hala a kɔlkɛsiaa.

²⁷ A piɛinin ndu mò yaŋnun nɔm, o kon a timbi yoole n baa o ndu lo len.

²⁸ Ɲɛ-ɲɛ n tuu nin pɛ le tosaa, o biinun bila. Nɛi nɔmndo vanin nɛi diandaa válán.

²⁹ Vannda yeemanin le nɔm siɛmbulan tuisio, kɛ nɔm a diminin aa: ‹I co isisi!› Kani malaa Hala mala vana tuisianndo ni.

³⁰ O baŋanin vana tɛɛmbuu isɔɔ loo, mò soli ndu o dɛnɛ palaa nin. Nɔm, a sɔlanin baŋaa, taa manda pɛ balan ladiandaa.»