SƐBƐ YƆB-O 21 - BII BILA

Muli Yɔb mulul Sofar-o

¹ Mí Yɔb cua sɔɛi, mó dimi aa:

² «La yaŋ ndɔ nilan, la yaŋ nilan o sɔɔn nun, ɲɔɔlu ya ɲuna niaa-o co kon ni.

³ La biwnun ya, la cɛl-la mì soo. Te i cii pɛ ɲɛ co ya o kɔl-lo dimi, la mam niko.

⁴ Ya ya, mò va maa a vanacieo ya cɛɛŋunnin ni? Vɛ̀ɛ̀ i nɔ dí le kɛɔ bivɔnndo le?

⁵ La mulin-ndɔ mì la tofa ya: La dɔawnunnin kɔndɔfili mì la handun balan o sondo.

⁶ Te ya pila yiyan pɛ á ɲɛ-ɲɛ co ya yɔŋnɔnndo, siòònde bii ya, diallon ɲiiya ya nákà-nàkà.

⁷ Le yɛɛ vanaa kɔlvesɛiya co yɛ yoomu? Le yɛɛ nda sɔ̀la yɛ yoomuan mɛɛ nda kɔa a yuuvaa yɛ?

⁸ Kani mà ce cuavaa ndaa o sulɔɔ, mà ce vɛlɛ cuavaa ndaa imamaa.

⁹ Kɔlɲuloo kínɛí co o la nda lo cɛinin ni, siòòŋii bii nda le. Siondoole Hala len le pílàn nda le.

¹⁰ Navaa tovaa ndaa hel navaa ndaa laandua mà kɛɛ yoltan yɔngu le, navaa ndaa laandua vííkù o kɔmnden te.

¹¹ A co poambɔa ndaa piaandua malɔɔ kiltan maa n'saa, poaa ndaa imamaa connun pisulta súú-súù ka tosaa.

¹² A co condon solio a dundulan a á bangalan lɔɔ, a co ɲaaloo dɔwnɔnndo a sɛ̀ŋnden hɔŋndo.

¹³ O dɛnɛ kɛndɔɔ nin nda co ceen ndaa kpede tosaa ni, o kon a kɔɛnnun vɛlɛ ciee-piɔ́m a kɔlɲuloo.

¹⁴ Nda yɛ nda va Hala dimullo ni aa: ‹Faŋan naa kɔɔli! N yeema mì n sina nɛila nɔmndan te!

¹⁵ Yɛɛ Ó-Hiow-Kpaayaa-Kpow-vo co yɛ mì n siŋnun cɛa ndɔa? Yɛɛ naa n sɔ̀là yɛnin o ndu piɛiyo nin?›

¹⁶ Lende ni, dɛnɛ kɛndɛ vanaa kan fula nda pila o ba le. Màá ya i del kela vanaa kan kɔɔli le!

¹⁷ Kɛ vɛ̀ɛ̀ n ca pa telennda bɔɔ-bɔɔ ɲɛ-tengaa ndaa ɲumndo puɛ́ɛ̀? Dɛnɛ tambɛiyo toal pá nda coo, mì Hala cuiŋi kɔltuw ndɔɔ da coo?

¹⁸ Vɛ̀ɛ̀ a sìŋnùn pá maa foeŋii hoeiye kɔandu-e, maa kefun hoeyii felenfelennde sàŋ-ndon?

¹⁹ Vana dimi maa mì Hala màndá dɛnɛ palaa le ndu tuisio poaa vanaa kɔlvesɛiya coo. Vɛ̀ɛ̀ o co vanaa kɔlta vesɛyaa kan pila le ndòó bɛnda le soŋɔɔ haliko mi ndàá sina ken te?

²⁰ Vana kɔlvesɛiyo pila bɛnda ni mò ce tambii ndɔɛi a lehɔl, o kon mò kol kɔltuw Vana-Kpaayaa-Kpow.

²¹ Kani ɔ́ɔ̀ mako ndɔɔ le yungu ndɔɔ ndu kɔɔli lɔ́ɔ́ paangun ndɔn cuunin mò vi-o?

²² Mò va maa Hala vana pɛɛku sɔɔn mun ni? Vɛ̀ɛ̀ o co ndu Hala le kialu hali yamɛi mɛlɛkaa le?

²³ Vannda pum co, ɲɛ-ɲɛ vé nda lepɛŋ te, buulan vé nda le, kɛ mà vi a yoomuma man kpow.

²⁴ Vanaa vaa lende mà vannun a celulaa, a ningilaa ningili, mì cuɛiyan ma vannun nda o paalan nin ɲɛkɛndɛi.

²⁵ Vannda pum yɛ, mà lo o mɔnɛi nin haa mà vi. Hali ɲɛ-pɔmbɔ a dombi dɛnɛ kɛndɔɔ le.

²⁶ Nduyɛ, nda kpede o cundoo nin nda co ihini ni, mì càá kumbu nda mɔku-mɔku.

²⁷ Sei! I sinà yiyannda niaalan válán, i sinà yiyannda co niaa a ya o kɔɔ lan.

²⁸ La co dimio aa: ‹Ɔ́ɔ̀ cɛi vana latɔ́ɔ́-tɔ́ɔ́ ho? Ɔ́ɔ̀ cɛi-kola-toandaa vanaa tosaa dɛnnda vɔɔnda va nin-ndo?›

²⁹ Vɛ̀ɛ̀ kabi la ɲuna vanaa hiawnannda le? Bàà la co lɛ seile ndalen cɛlɔɔ le?

³⁰ O paale dɛnɛ palaalen, vana dɛnɛ vɔɔndo sɔla dɛnɛ palaa le. O paale kɔltuwlen coo, ɲɛ-ɲɛ yɔŋnun ndu le.

³¹ Nɛ̀ɛ́-nɛ̀ nɔla yɛ simndan mò cɔm ndu kela ndɔ vɔɔndo? Ɔ́ɔ̀ vana nɔla ndu ɲɛ o tosa-o mingullo-o?

³² Vana kon vi pɛ, a kɔ kumbu ndu nɛɛ nda kumbu vannda-a, a cumul sɛi ndɔɔ.

³³ Puulu bóllo kindila ndu le. Vannda taw a và kɔlan dialun ndɔn vílɛ́iyon laci, mì sɛ́lɛ́ bɛndoo và kɔlan mun kɔɔli.

³⁴ Ɲɔɔlu yɛɛ niaa co yɛ ya niko? Ɲɔɔlu fondoo fúú! Mulila niaalan-ndan kpow còòlan fúú!»