SƐBƐ YƆB-O 2 - BII BILA

Dɛnɛ palaa diinndɔ tol Yɔb coo-o

¹ Paale pilɛ, mí poaa Hala-a hun sim Mɛlɛka o hɔl, mí Setana bɛɛ hun sim nda tɛɛn le Mɛlɛka cɔmnɔnndo.

² Mí Mɛlɛka ɲuna Setana aa: «Kuɛɛ nɛ n co yɛ fulaa ho?» Mí Setana mulul ndu aa: «Lɛŋnden ya va balɔɔ a kelaa lenin ni.»

³ Mí Mɛlɛka dimul ndu aa: «Vɛ̀ɛ̀ a dɔw pá Yɔb, vana ni baalaa, taasi? Vana-vana co maa ndu o lɛŋnden coo le, vana sakpoo a vana sandaa o co ni. O nɔ siòòŋii Hala-e o kpakpalà dɛnɛ vɔɔndo. Vana sim yili o dɛnɛ sandaa coo-o o co ni. Fondo fúú koni n ɲindu ya le ndu saangiaa ni.»

⁴ Mí Setana dimul Mɛlɛka aa: «Le sɔlaa vana yɔngu ni. Ɲɛ-ɲɛ vanacieo nɔ, o nɔla mò pisi ndu le kɛndia ndɔɔ.

⁵ Siɛndi vɔ hau baa, mà dɔw paala ndɔlan a dialun ndɔn yɛɛvɛ. Lekɛndɛ, o co diomnde tanalen dimi a nɔm.»

⁶ Mí Mɛlɛka dimul Setana aa: «Ava, mɛɛ ndu pila co o kpaaya nɔmndo bɛngu. Kɛ yaa baa o yoomu ndɔɔ le dɛ!»

⁷ Mí Setana faŋan Mɛlɛka o hɔl. Mó kɔ cuiŋi Yɔb nàà vɔɔndo pum coo, mí kɔɔlen le luaaluaa ndu kpede, kandɔɔ o bɛngula kɔltan kɔlan biyɔɔ háá ndu o lebol.

⁸ Mí Yɔb cua tɛndula kpɛɛnɛi puululan le ɲɛɛsɔnndo a lan, mó cal o pultan nin.

⁹ Mí laa ndɔ dimul ndu aa: «Vɛ̀ɛ̀ ma lo vɔ o sakpoyɛi nɔmnde coo tuŋ? Dimi diomnde tanalen a Hala haliko ma vi.»

¹⁰ Kɛ mí Yɔb mulul ndu aa: «A soaa ko maa diɔm! O co ka dɛnɛ kɛndɔɔ kínɛí le naa n sɔ̀là Hala o ba le. Te n cɛl pɛ dɛnɛ kɛndɔɔ maa ɲɛ-kéa fula Hala o ba-o, vɛ n cɛl niko vɛlɛ dɛnɛ palaa lende le?» O kon nin kpow, Yɔb dimi diomnde tana le.

Caaŋaa Yɔb-a hin ndu Yɔb yilɔɔ

¹¹ Lɔ́ɔ́ caaŋaa yáá-aa Yɔb-a tuei maa dɛnɛ palaa tol ndu Yɔb coo-o, mí vana-vana can o lɛŋnde ndɔ nin, má cɛlan le kɔlan ndu yilɔɔ a le ndu ɲɔɔloo. Caaŋaa ndɔa kan yɔŋnun haa ni: Elifas fula Teman-ndo, Bildad fula Suha-o a Sofar fula Naama-o.

¹² A lo lándán má tofa ndu, kɛ a nɔla ndu sinaa le. Má caŋ fúkpàà-fùkpàà, má sɛɛsian domala ndala bɛndulan lekɔɔ, má dɔawnun loolio o lebol.

¹³ Má lo icali o cundoo nin ndon nda Yɔb-aa latulu háá le palɛi dii ŋɔmmɛw a malɔ leŋɔmmɛw, vana-vana suu o ndu lo le, kani sanga o va nin-ndo va o bɔɔ.