SƐBƐ YƆB-O 19 - BII BILA

Muli Yɔb-o

¹ Mí Yɔb cua sɔɛi, mó muli aa:

² «Háá lɔ́ɔ́ kuɛɛ niaa pɛngi yɛnin ya saangiaa ho? Háá lɔ́ɔ́ kuɛɛ niaa pɛngi yɛnin ya tiaamoo a sɔɛi niɛi sondoei?

³ Bɛmbɛ tɔ́ co nin hoo ni la co ya yeowlan. Vɛ̀ɛ̀ siɛmbula co niaa biyɔɔ le ya mɔnɛi lueiyo le?

⁴ Ndóò va bɛɛ toɲa maa pɔwlan lekɛ́ndɛi yáà pɔw ni, ya pilɛ kpé sɔɛi kalɛi ndíì vanin o lebol ni.

⁵ La co kuundianndo ya coo, mì la va ya dɔɔniaa, la co ya sɔɛi le siɛmbula bɛndula bii ya lan.

⁶ Kɛ la sìná pɛɛngu maa Hala co ya yɛɛvɔɔ ho dɔvɔɔ ni, ndu kayakaya ya a yala ndɔɔ ni.

⁷ Te i yonda pɛ le dɛnɛ vɔɔndo cɔɔmuuo, vana-vana mulul-la le. I veelu pɛ le hunɔɔ ya malaa, vana-vana sɔ́làn le dí nuu cɔmndo le.

⁸ Hala kindal-la nɛiyo le ya kuunaa hiovɔɔ, O mal-la nɛilan nuwviaa o ɲumndan nin.

⁹ O hɛlu bɛɛle vannda ndáà ke ya len ya o ba, o puu mɔsil lemasa va ya o lebol-lo.

¹⁰ O ciŋilan ya ba-ba fee, mó pesi ya vɔ́-vɔ́. I co kɔnndan ciee-piɔ́m. O sungu tiindan nuu maa yɔm.

¹¹ O beenguu yinnde kɔl ndɔ tuwvo a ya, o co ya ko cɔu maa yaamɔɔ ndɔ.

¹² Vanaa ndɔa cɔwva kpow a co hunɔɔ diom pilɛ. A pɛl pemalen má tiiya háá nɛɛ ya co-a, má kila dɔ́ɔ́ngɔ́ ndaa o cɛi-kola-toandaa nuu balɔɔ sɔ́.

¹³ Puapilɛa nia nda, Hala yɛɛ nda ya levil polon. Vanaa sina ya-a bɛɛ, a co kindinndo le ya kpakpalaa.

¹⁴ Vanaa nia kpeeŋian ya, caaŋaa nia bɛɛ a pɔɛɛnun ya.

¹⁵ Mialaa hin sumialle o ya lo cɛinin-nda a buɛyaa nia laandua co ya cɔu maa mial. Maa vana hiawnan koni ya co nin nda o hɔl ni.

¹⁶ I veelu nin bɛɛ vana ni baalaa, o mulul-lɛ ya le, hali i veelu ndu háá mì ɲɔɔlu ndu, o cɛl te.

¹⁷ Laa nuu yulu lɛ cun hoeyii co ya fulaa niŋ-nde le, Poaa ya velu-a bɛɛ, i fula nin nda iyeema.

¹⁸ Hali cuaambɔa pɔmbɔa co ya tɛɛndanndo, i kandu pɛ sɔɛi, a saan ya còngulan.

¹⁹ Caaŋaa nia kpeekpeiya co ya pɛɛsaa, vanaa yáà kaola taw-va mululun ya.

²⁰ Paala nilan la bɛlin yáw nuu a visin nun, maa vana vílɛ́i koni ya connun nin ni.

²¹ La tuinun ya iɲíí, niaa co caaŋaa nia-a, la tuinun ya iɲíí yandi! Kani ba Hala-o soŋ ya.

²² Le yɛɛ niaa co yɛ ya mɔnɛi lueiyo mɛɛ Hala co ya mɔnɛi lueiyo yɛ? La sanga vɔ a ya yɛɛvɔɔ dɔvɔɔ le?

²³ Àá, te sɔɔn nun mun mún sɛvan pɛ! Te mún mandan pɛ o sɛbɛ pum nin!

²⁴ Aá, te mún nɔla pɛ sɛvanndo o pow bandíláà coo a tuɛndɔɔ a á ciliŋii kala-kalɛi, mì mún va n'sialaa lon le fɛɛn a fɛɛn!»

Vana ni baŋaa co yoomu

²⁵ «Ya ya, i sina maa vana ni baŋaa co yoomu, o mɛɛlulan, ndu cannin ni mò sim o lɛŋnden nden coo.

²⁶ Lɔ́ɔ́ yáw nuu cuunin itambu-o, i canin Hala a dialun nun yungɛiyon.

²⁷ I canin ndu ciŋ a lehɔl, o co a hɔlta vana le, a hɔlta nila ya pila lan. Kɔl nuu ya nin o co nin telen kon cumndo pila.

²⁸ La co ɲunanndo aa: ‹Vɛ̀ɛ̀ naa n keí yɛ mì n bii Yɔb? Tàmá kuɛɛ naa n sɔla yɛnin le ndu kɔɔsallo?›

²⁹ Kɛ siòònde bìí niaa pila a mɔɛi cɔwve, kani mɔɛi cɔwve bɛnda mi i tol niaa coo le ciŋilan niaa ciŋilan ya-o. Nduyɛ, la siná maa yamɛi co hunɔɔ kiolɔn.»