SƐBƐ YƆB-O 18 - BII BILA

Sɔɛi diinndɔɛi Bildad dimul Yɔb-e

¹ Mí Bildad fula Suha-o cua sɔɛi, mó ɲuna aa:

² «Telen kuɛɛ kpeekpei niaa mei yɛnin diom? La sɔ̀lá vɔ kɔlkaloo, o kon kɔɔli n soonun.

³ Le yɛɛ niaa co yɛ naa cɔu maa n'diɔm? Bàà la co yiyanndo maa diɔmaa sondo vesɛiya naa n co ni?

⁴ Nɔm Yɔb yɛ, nɔm pila co siɔŋinndo a kɔltuw nɔmndo ni! Mò va maa mì vanndacieea cuu o lɛŋnden nden coo le nɔm? Bàà mì pow kpovaa faŋan o fonda ndɔɔ?

⁵ Ken co toɲa, ɲɛ-tengaa vana kɔlvesɛiyo ɲumnin, yinnde co biyɔɔ o ndu lo cɛinin-nden le pɛnginin biyɔɔ.

⁶ Ɲɛ-tengaa siŋnunnin ɲumndan o cɛi-kola-toandaa ndɔɔ bɛngu ni, fitina o kɛsin o bollen coo-o ɲumnin.

⁷ Kɔla o va paandu a yoomuan-ndan la muungunin tángàn-tángàn, mì tuula ndɔlan la laasiaa ndu.

⁸ O co lo kɔlan, mò kɔ vow pelei o yaŋɔɔlen nin, mò kayakayan, mò haw o yalaa nin.

⁹ Yaŋɔɔlen le biinin ndu pelei o bɛngu tííndííyo, mì yoei yalaa i simbulu ndu.

¹⁰ Yoole o co hunɔɔ haw len le co levianaalen o puuloo bɛngu, yaŋɔɔlen le co lemiinguaalen o nɛi ndɔɔ coo.

¹¹ Nɛɛ-nɛɛ fee a vanin vooloo taw a siòònde, siòònde vanin kelaa ndu kɔɔli.

¹² Yiaan ma ciinin ndu yoomuan kpede, dɛnɛ palaa vanin ndu diomɔɔ kpɛɛlun.

¹³ Nàà vɔɔndo pum buuluunin ndu yáwvo pokili-pokili, mì nàà n'kɔnyaa pum tɛɛmbuu ndu falon.

¹⁴ A solinin ndu o ndu lo cɛinin, cɛi o cal nin a kɔlkɛsiaa-o pɛɛn, mà yɛɛ ndu o masa ciee-piɔ́mndo lo.

¹⁵ Cɛi ndɔɔ ve lɛnin le ndu le, vana celen nɔla mò koma luɛinun lenin. A saŋnin fungoo o yondola ndɔlan coo.

¹⁶ O vanin maa yɔm co vuo-o, puundon và vesaa lebɛngu, mì pei ndi ɲɔfɔliaa lecoo.

¹⁷ O lɛŋnden nin, vana-vana co pɔɛɛnɔn a dɛnɛ ndɔɔ, diola ndɔlan la pelnun ndɛnin nɛɛ-nɛɛ le.

¹⁸ A faŋanin ndu o ɲɛ-tengaa, mà ɲindu ndu o ɲumndan nin. À toawnin ndu mà faŋa ndu o ceendo coo.

¹⁹ Hɔ́ɔ́ ndɔ pilɛ bɛɛ lonin le polale ndɔlen hivio laci le, vana-vana lonin o yungu ndɔɔ nin te.

²⁰ Ba paalen le del-lo a ba paalen le can-ndo, vannda tuɛinin ɲɛ yɔŋnun ndu-o, mì siòònde bii nda, mà ɲiiya.

²¹ O kon, a diminin aa: ‹La tofa vɔ ɲɛ lo o ɲɛm vana vɔɔndo a yungu ndɔɔ nin-ndon! Nanu fonda vana sina Hala loo va ni.›»