SƐBƐ YƆB-O 16 - BII BILA

Yɔb mulul Elifas

¹ Mí Yɔb cua sɔɛi, mó dimi aa:

² «I tuei nin sɔɔn vaa nuaa taw-taw, niaa kpow, vanaa ɲɔɔlaa kpeendɛiya niaa co ni.

³ La co ya ɲunaa aa: ‹Vɛ̀ɛ̀ tombola fondo-fondoo ho nɔ lamɛɛlu le? Yɛɛ co yɛ nɔm kɔllo tuuloo má va mulilan ndan nuaa?›

⁴ Te niáà va pɛ o fonda nuu, ya bɛɛ, yáà nɔla mì yáà soo maa niaa. I va sɔɔn cuungiaa le mun cucɔɔ niaa coo, mì yáà hiiluu bollen niaa coo.

⁵ I va niaa yoomuan luei a sɔɔn va fula ya o sondo-on, Ɲɛ va fula ya o n'cɔcɔ-o va sanga niaa dɔɔniàà.

⁶ Kɛ i soo bɛɛ, sanga nuu pɔlulnin te, i mei vɛlɛ bɛɛ, sanga nuu kuenin ya levil te.

⁷ Nihau, Hala cii ya yoomuan o n'dial, o tuisi dɛnɛ palaa vanaa balu ya-a kpow tɛɛn.

⁸ Fungbula o soli ya lan la co seilen ni, ɲaw nuu co kɔɔsal-la mò yaala ya.

⁹ Hala ciŋilan ya a kɔltuw ndɔɔ mó va ya siɔŋio, o co ya ciŋndon kumbillo kpángàɲan. Yaamɔɔ nuu o co ya lɔvaa a lahɔl.

¹⁰ Vannda kumbil-la sondola ndalan váankpándán. A co ya kpaŋndon lɔɔ le ya siɛmbulan tuisio. Nda kpow a yiinan le ya ciŋilanndo.

¹¹ Hala mal-la poambɔa poopooa o ba, o mal-la vanaa kɔlvesɛiya o ba fɔ́!

¹² I vannun o kɔlɲuloo nin, mó ciŋilan ya, mó fula ya o mundu kɔɔli, mó yimi ya! Mó mingi ya simi le ya siinguuo ɲɛ o va mɛngɛlaa-o.

¹³ Kɔɔn ndɔn co fulaa nɛɛ-nɛɛ ka mí n va ya viɔw, o co ya niŋndo buuluuo a labɛɛla kpeekpei. O pɛl-la lólòó nin mó va ndu taaliaa lɛŋ.

¹⁴ O co ya hinullo maa kuubanɔ cɔw, O co ya lɔwviaa taw-taw.

¹⁵ I sɔndu bɔlɔɔ le yáw nuu kumbɔɔ a ndu. I co bollen yukpuliaa o cundoo nin.

¹⁶ Hɔltan la diw ya vaŋ a caŋ lambaa, vundule piɔ́mnden le co ya o hɔlta koongolan coo.

¹⁷ Nduyɛ, i nɔ laba o dɛnɛ vɔɔn nin te, piɛile nilen le co lediandaa.

¹⁸ Nɔm lɛŋnden, kúmbù kooma nian te, haliko mi koŋul nuu hel kpélén.

¹⁹ Kandɔɔ nihau, i nɔ seiyo o halataala, i nɔ vana sim le ya-o coocoo pɔ́.

²⁰ Caaŋaa nia co ya mamɔɔ tɛɛndanndo, kɛ Hala ya co mɛmɛma nian tuisio o hɔl ni.

²¹ Màá sei nuu kiolu yamɛi naa tɛɛn naa Hala mɛɛ vana kialu yamɛi vanacieo nda vanacieo tɛɛn yɛ!

²² Kani palɛi yoomu nuu i co nin i cɔmaa tɛ́kpɛ́-tɛ́kpɛ́, nɛi ya bii kɔlan coo-o, o co nɛi vana kɔɛ coo ma muungu a makɔɔ le.»