SƐBƐ YƆB-O 14 - BII BILA

Muli mɛɛlaa Yɔb-o

¹ Vanacieo, o vanalanɔɔ velu-o, palɛi ndɔɛi bendu le, palɛi kɔl tambɛiye i co vɛlɛ ni.

² Maa peenge o co ni, o fula pɛ, o kon kɔɔli o ɲɔfɔla. Kɔnndan o kɔannun ni maa levundu, o viw le

³ Ndu nɔm co fɛfɛlaa ho ni. Vɛ̀ɛ̀ ya vanaciee kon n co kɔɔsallo ni?

⁴ Nɛ̀ɛ́ nɔla yɛ mò soli ɲɛ diandaa o ɲɛ nɔɔlɛiyo nin? Vana-vana nɔla ken tosa le.

⁵ Yoomu vanacieo nɔ pɛɛngulan, nɔm Hala koni kelu paangun ndɔn ni, má hendul ndu pɛɛngula o nɔla hiovɔɔ le lan.

⁶ Pɛngi vɔ ndu fɛfɛlaa, o kon mò mɛɛlu ɲaale dɔwnɔn mɛɛ vana baala bɛnda le sala ndɔɔ sɔlaa-o dɔawnun ɲaale a paale delaa len yɛ.

⁷ Yɔmndo nɔ kɔlkɛsiaa. Vana kelu ndu pɛ, o muungu vɛlɛ o pui, o pɛ́ngì kuumiaa le pei lendei solio le.

⁸ O va bɛɛ aa puundun ndɔn co nin n'paandu-paandu, mì cii ndɔɛi co nin le vuo,

⁹ mɛnndan ma del ndu dɔ́ɔ́ pɛ, o muungu o pui, o soli vɛlɛ lɛwvon maa tɔlɔɔ sɛnɛi.

¹⁰ Kɛ vanacieo ndu, o vi pɛ yoomuma ndɔan ma cuu. O malnun pɛ kɔl, yɛɛ o siŋnun yɛ lɛ̀?

¹¹ Paale co va, mì mɛmma ihɛllan ma vela, mì peela bɛndulan la vesa kókóló.

¹² Vanacieo bɛɛ hini pɛ mó malnun kɔl, o cen-ndɛ le, o tindu lɛ le, fɔ mì halataalaa hun hiow fɛɛn, o tindu lɛnin o lɔma ndɔma mɛɛlan te.

¹³ Éé Hala! Te ciee-piɔ́m koni nɔm óò ven ya nuaa ni, mì yáà lo lon háá telen nɔm óò ɲululnin kɔl-lo. Te nɔm óò kilul-la pɛ telen bingi, o kon kɔɔli mí nɔm óò yiyan ya coo!

¹⁴ Vɛ̀ɛ̀ vanaciee vi nin-ndo nɔla pá mó muungu vɛlɛ yoomu? Te lende ni, yáà nɔlanin biuvɔnndo o palɛi baalɛi nii nin kpow, háá tuma ndáà hun tindinin ya-o.

¹⁵ O kon te nɔm óò veelu ya pɛ, yáà mululnin nɔm. Te nɔm óò yeema pɛ le ya vana n cɔw-vo cɔu, nɔm óò canin ya.

¹⁶ Nduyɛ a co nihau foofola pelun nun cɔmndo tɛ́kpɛ́-tɛ́kpɛ́. Vɛ̀ɛ̀ a co hakila nilan mɛɛndanndo le?

¹⁷ A vownin dɛnnda nila vɔɔnndan o bɔlɔɔ nin, mà kumbu lan, mà yii lan sondoo, mà ven ndan kpíŋ.

¹⁸ Kɛ mɛɛ pembon puusian nuaa, mì powta kpovalan la pimbul, mì la faŋan o foofola ndala paandulan nuaa yɛ,

¹⁹ mɛɛ mɛnndan ma salu powtan nuaa, mì piɔɔ bɛndoo basu cundoo lɛŋ nuaa yɛ, lende koni n tɛɛmbuu tiindan vanacieo ni.

²⁰ A yɔl ndu pɛ lɛŋ, o kɔɛnnun ciee-piɔ́m, piɔ́mndo tɛɛmbuu ndu hɔlla. Lende n toaw vanacieo polon ni.

²¹ Cuavaa ndɔa koma va nin bɛɛ dɛnɛ kɛndɛ sɔla kɔɔli, ndu sina lɛ ken te, a koma va nin bɛɛ nda lasiɛmbu tuisi, ndu bii lɛ ken bila le.

²² Ndu pilɛ kpé sanga ndɔɔ co nin va o n'dial ni, ndu pilɛ kpé mɔnɛi ndɔɛi co nin va o kɔl ni.