SƐBƐ YƆB-O 13 - BII BILA

¹ «Sɔɔn mun kpede, ya pila i ce nin mun. Nile nilen le tuei nin mun mí bii bila.

² Ɲɛ-ɲɛ niaa sina, ya bɛɛ i sina, o co ya le hiow va diɔm a niaa le.

³ Kɛ, o Ó-Hiow-Kpaayaa-Kpow-vo lo ya yeema le sɔɛi ni, O Hala lo ya yeema cɛɛŋɔnndo ni.

⁴ Kani niaa niaa, còòlan a sɔɔn lacòòvan koni niaa tuu ni. Mandea lacòòvaa niaa co ni.

⁵ Kpòkóó! Nɛ̀ɛ́ kinda yɛnin niaa sondolan kpáŋ? Ken óò tosanin ni mì niáà siŋnun vanaa kɔlkalua.

⁶ Lelan te i va pɛ sɔɛi, la yáŋ nilan ɲɛkɛndɛi, mì la tuei ɲɛ co fulaa ya o sondo le kɔɔsɔ nuu-o.

⁷ Bàà a sɔɔn co toɲa le-on niaa simnin Hala kɔɔli ni? La yiyan maa a sɔɔn lacòòvan niaa kenin Hala dí ni?

⁸ Mò va maa niaa soaa le ndu ni? Niaa sim le ndu Hala ni?

⁹ Te o yaasiaa pɛ niaa, vɛ̀ɛ̀ ɲɔɔ naŋnin pá le niaa? Kani vana nɔla Hala pala mɛɛ vana pala vanacieo yɛ le!

¹⁰ La tosa pɛ sìmkɔɔlio o vionnɔnndo nin, o soaanin niaa lekɛ́ndɛi.

¹¹ Mò va maa bɔɔbɔɔyɛi ndɔɛi dòw niaa isiòòn te? Siòòŋii co niaa biyɔɔ a ndu le?

¹² Maa lapul sɔɔn niaan caan co ni, maa looli tombola niaa ho co ni.

¹³ La meilul-la mbɔ̀, ya pila co isɔɔ ni! Mɛ̀ɛ́-mɛ̀ɛ́ la va pɛ, la vá!

¹⁴ I bɛɛndian le dialun nun vɔngullo, I cɛl le yoomu nuu pisio.

¹⁵ Hala yeema pɛ o dii ya, i nɔ lɛ dɔ́ɔ́ tiindan te. Kɛ fɔ mì kɔɔsa le kela nuu.

¹⁶ Ken yɔŋnunnin cinda nuu ni, bau vana muuluan kɛ́-kɛ̀ nɔla mò fula ndu Hala o hɔl te.

¹⁷ La yaŋnun sɔɔn ya co dimi-on ɲɛkɛndɛi, la kumbi nilan mì la tuei mun válán.

¹⁸ I ɲuna le yamɛi kiolɔɔ naa tɛɛn, ya yɛ, i laalan maa ya nɔ dí ni.

¹⁹ Ɔ́ɔ̀ vana yeema mò yaala ya-o? Te o va yɛ pɛ maa i nɔ dí lekɛ́ndɛi le, mɛɛ o co fisa mì mei, mì vinnun.

²⁰ Éé Hala, ke ya ɲɔɔn mún miun kpé, o kon i vinnun ndɛnin nɔm te:

²¹ Faŋa ya fɔlɔn ba nɔm co ya dɛnɛ palaa tuisio coo-o coo, mà pɛngi ya siòònde lueiyo.

²² O kon kɔɔli, taa nɔ pɛ isɔɔ le ya ɲuna, i mulul nɔm. Te kon te, ya i ɲuna nɔm, nɔm mulul-la.

²³ Cɔm ndɔ ya mɛɛ kpɛɛ ya tosa hakilan, mí biandun a nɔm yɛ. Cɔm ndɔ ya ɲɛ ya tɛɛmbuu-o.

²⁴ Le yɛɛ nɛ n co yɛ ya hɔlaa nɔmnda faŋallo? Bàà nuaa n co ya cɔu ni maa yaamɔɔ nɔm?

²⁵ Nɛ̀ɛ́ n co yɛ tovɔɔ ho? Mò va maa peele hoeiye cuà len coocoo len ni? Yéè bilte vesɛilen n co kiltan-ndan kɔɔli ni?

²⁶ A co yaman kálà-kálàn sɛvaa ya coo, má va tɛɛmbuula nila icuaambɔyalan ya handɔɔ coo.

²⁷ A vow ya pelon o kpɛ́ɔ. A co kpeeŋiannda nilan fɛfɛlaa, má va foofola bɛngula nilan mɛɛndanndo.

²⁸ Nduyɛ, mɛɛ dɛlua dia tɔlɔɔ mò sɛ nuaa yɛ, mɛɛ kaangoa dia volɔɔ cuɛinanndo mò siɔŋ nuaa yɛ, lende kɔɔle vanacieo bɛɛ le sia ni.»