SƐBƐ YƆB-O 12 - BII BILA

¹ Mí Yɔb cua sɔɛi, mó dimi aa:

² «I co toɲa maa niaa o ba dɛnɛ sinaa kpede co ni, lɔ́ɔ́ niaa vunin-ndo, kɔlkaloo bɛɛ ndu vi ɲinkon.

³ Kɛ ya bɛɛ, i kendu kɔl maa niaa, o nɛi kon coo ndu la hiw ya le. Nɛ̀ɛ́ pɔw yɛ sɔɔn niaa dimi mun-ndon?

⁴ Kpòkóó, i co koŋullo o Hala lo le mulio sɔlaa ndu o ba, kɛ o koŋul kon nin, i siŋnun ɲɛ mamaa caaŋaa nia o sondo fɔ́! Ya vana sandaa, ya tɛɛmbuu hoo isɔɔ loo kɛi dɛ!

⁵ Vanaa dɛnɛ palaa co coo le-a co dimio aa: ‹Pɛɛsaa co le vana dɛnɛ palaa co coo-o.› Vanaa boŋ má va delɔɔ-a nda dimul lende ni.

⁶ Kɛ nduyɛ, kɔlɲuloo connun o cɛila vanaa del vannda coo-a nin. Vanaa tɛɛndan Hala-a bɛɛ a connun nila ɲulu vili, hali vanaa co Hala biyɔɔ o ba-a bɛɛ a connun a ɲulu fɛɛ.

⁷ Kɛ ɲuna vɔ visia mà kindi nɔm kɔl, Ɲuna vɔ yowva coocoo mà pɛɛku nɔm isɔɔ.

⁸ Dɔw-vɔ baltan a lɛŋnden, mì le kindinin nɔm kɔl, ɲuna vɔ suvaa co o mɛmma ihɛllan nin-nda mì nda bɛɛ a tombolal nɔm sɔɔn taw.

⁹ Kani o nda kpow tɛɛn, ɔ́ɔ̀ o pɔw maa ba Hala-o cɔw ɲɛm mun ni-o?

¹⁰ Ndu bii yoomu ɲaa yoomaa kpow o ba ni, ndu bii hoeyii yoomuɛi vanndacieea kpow o ba ni.

¹¹ Mɛɛ sondoo tuɛi ɲɛm dian yeela yɛ, lende koni nilen bɛɛ le sina diomnda yɛ́-yɛ́lan ni.

¹² Vanaa yuuvɛiya nɔ kɔlkaloo ni, vanaa viaw si-a nɔ sinapɛngoo ni.

¹³ Kɛ o Hala nin kɔlkaloo a kpaayaa co tum ni, ndu nɔ silaa a sinapɛngoo o ba ni.

¹⁴ Ɲɛ o puusiaa pɛ, vana nɔla ndu mingi tangul te, o mal pɛ vanndo o kaasoo, vana nɔla ndu soli lon te.

¹⁵ O bii pɛ piɔɔ, vaaloo luɛi, o mal pɛ mɛnndan, ma tɛɛmbuu ɲɛ-ɲɛ o lɛŋnden coo.

¹⁶ Ndu nɔ kpaayaa a taasio ni, ndu o ba vanaa laasiannda, a vanaa laasiaa vannda-a co ni.

¹⁷ Ndu tosà ni mì simlacia lelɛŋnda kela pelun fondo, ndu koni tosà vɛlɛ ni mì kɔlkalu kialaa n'yamaa laasian vanaa kialaa n'yamaa o ba.

¹⁸ Ndu tiimbuu yavii lemasɛi masaa o caŋ ni, mò mingi yoei lecɛe bayiaa nda o caŋ.

¹⁹ Ndu koni tosà ni mì vanaa-solia-lasálàá kela pelun fondo, mò faŋa vɛlɛ masaa simi masalen ndalen yili-a o masalen.

²⁰ Ndu hialu vanaa caa isɔɔa sɔɛi o sondo ni, mò poondaa sinapɛngoo vanaa yuuvɛiya o ba.

²¹ Ndu tosa ni mì vannda kelun vanaa co o fondala bɛndulan-nda yii, ndu hialu kpaayaa masaa mayoomua o ba ni.

²² Ndu solì ɲɛm co n'viannandon o ɲumndan nin di-di-on ceen ni, mò tuisi ɲɛ-tengaa le vunduma piɔ́mndan teengiaa.

²³ Ndu tosà ni mì vanaa-mangalaa-isɔɔa kui, o kon kɔɔli o cii nda tɛɛmbuu. O cum fɔlɔn mà kui taw, o kon kɔɔli o sɛŋi nda.

²⁴ Ndu hialu sinapɛngoo simlacia lelɛŋnda ni, mò sɔɔndiaa nda, nɛiyo bɛɛ a ci le.

²⁵ Mì nda cɛn niko iyuumu-yuumuei o ɲumma nɔ ɲɛ-tengaa lean ni. Lende ò laasiaa nda ni maa vanaa kolaa mamɔi.»