SƐBƐ YƆB-O 10 - BII BILA

Yɔb kelun ndu pila yii le violɔn ndɔɔ

¹ «Yoomu nuu cunulun ya. Le hee, cɛɛŋɔnndo tuŋ ya co nin va ni. Mɛɛ kɔl nuu co o mɔnɛi nin yɛ, i vanin sɔɛi tuŋ.

² I co Hala dimul aa: ‹Yaala vɔ ya le. Cɔm-ndɔ ya dɛnɛ ya tɛɛmbuu-o.

³ Bàà a ce ken dɛnɛ kɛndɛ le ya sangaa tuisio coo? Vɛ̀ɛ̀ ma kɛɛ ɲɛ nɔm pila cɔw-vo, mì vanaa kɔlvesɛiya peelu tuula ndalan o ken nin?

⁴ Bàà hɔlta n'falulan koni n nɔ ni? Mò va maa mɛɛ vanndacieea ca sɔɔn yɛ koni nɔm bɛɛ ca mun ni?

⁵ Bàà mì yoomu nɔmndo bɛɛ va o bingi maa yoomu vanaciee? Vɛ̀ɛ̀ mɛɛ palɛi vanacieo i dɔɔnan yɛ koni vɔsila nɔmndan bɛɛ la dɔɔnan ni?

⁶ Le yɛɛ niko kindinndo le pɔwla nilan sinaa? Le yɛɛ n co yɛ nɛilan nuwviaa le haki nuu cɔu?

⁷ Nɔm yɛ a sinà maa i tɛɛmbuu isɔɔ oo isɔɔ le, ya yɛ vana-vana nɔla vɛlɛ mò soli ya nɔm o ba le!

⁸ Bala nɔmndan la toosiaa ya ni, lan la cɔw ya ni, Bala lan la balu ya ba-ba fee ni, kɛ a lan n yeema le ya vɔɔciaa ni.

⁹ Loonun maa a bɔ́wvo n toosiaa ya ni, nduyɛ o cundoo nin n minginin ya vɛlɛ ni.

¹⁰ O co nɔm te cɔw ya kala nuu o dembe maa nɔnɔ le? O co nɔm te toosiaa ya lon hilihili maa cuɛima nɔnɔ le?

¹¹ O dembe lon, má vow ya vision a yáwvo maa volɔɔ cuɛinan, má toosiaa ya paalan a ɲɛsuan.

¹² A kɛndɛi nɔmnde, má ke ya yoomoo a yoomuan, má manda yoomoo ya o milin ɲɛkɛndɛi.

¹³ Kɛ a va ɲɛ pum mandanndo o kɔl, i sinà ɲɛ n va vionɔɔ o kɔl-lo:

¹⁴ Te i tosa pɛ dɔ́ɔ́ hakio, a bii ya o ken coo, te i bendun pɛ dɔ́ɔ́ a bii ya maa vana tɛɛmbua tɔŋ.

¹⁵ Kpòkóó ya! Mò va maa isɔɔ ya tɛɛmbuu ni? Kɛ, hali mì tɛɛmbuu bɛɛ isɔɔ le, i tɔɔndan mì heelu bollen te. Siɛmbulan la bii ya bɔɔ, Sangaa bii ya maa mamɔi.

¹⁶ Te i cɛn dɔ́ɔ́ pɛ, a hinul-la maa tambili, a kpuva ya a yoomuma nɔmndan kpow.

¹⁷ A co ya ciŋilanndo tuŋ, a co hiovɔɔ laci a kɔllo tuuloo a ya tuŋ. A co vanaa nɔmaa cɔwva singafilaa le nda tuisio ya coo.

¹⁸ Le yɛɛ n soli yɛ ya kala nuu o dembe? Te yáà vinnun pɛ lon, hɔlte kɛ́-kɛ̀ léè cinin ya le.

¹⁹ O kon, yáà fula pɛ kala nuu o dembe, ndáà kɔɛ a ya sanaa o sɛiyo nin, vanáà canin ko aa yáà vilun bɛɛ le.

²⁰ Bàà palɛi bɔɔ ya nɔ lɛ ni? Lelan, pɛngi ya ciŋilanndo ho nuaa. Mel-lɔ ya nin fondaa mì dɔwnun ɲaale ɲɛ-pɔmbɔ,

²¹ tuma pá mì kɔɛnnun o lɛŋnde maɲumnden a lɛŋnde vunduma piɔ́mnden nin, kɔla ya co lɛ muungu nanu le lan.

²² Lɛŋnde ya co len kɔlan nin-nden, ɲumma bɛndu-bɛnduma laasi-laasian kínɛí ma co lon ni, ɲɛ-tengaa paale siaa, maa ɲumma n'kpungba o co lon ni.›»