SƐBƐ YƆB-O 1 - BII BILA

¹ Langbanɔ pilɛ va o lɛŋnde Us len nin diolan aa Yɔb. Vana sandaa o va ni, ndóò yeema dɛnɛ sandaa taw. Ndóò nɔ siòòŋii Hala-e, o va dɛnɛ vɔɔndo kpakpalaa.

² Mó vialu hɔ́aa piaandua nda ŋɔmmɛw a hɔ́aa laandua nda yáá.

³ Ndóò nɔ saa vàálan tan ŋɔmmɛw (7 000), ɲɔɔmɛɛa vàálan tan yáá (3 000), nawva vàá pilɛ (1 000) a sofɛlɛa laandua kɛmɛ leŋuɛɛnu (500). Ndóò nɔ vɛlɛ buɛiya taw-taw. Ndu vannda ndáà hiow bɛɛlen ke o tàndá va a ba paalen le can-ndo-o nin ni.

⁴ Poaa ndɔa ndáà dema kafolan tosa o la nda lo cɛinin vellaa-velle. Ndáà cii pɛ kafoo tosa o ò pilɛ lo ndáà kɔ tosa vɛlɛ o ò celen ndo. Ndáà cɛn pɛ kɔlan, ndáà yoongu yemaa ndaa yáá-a le kɔlan dioo a kolɔɔ latulu.

⁵ Te ndáà balu pɛ diolan lende pindo, Yɔb ndóò veelu cuavaa ndɔa kalaa, ndóò dindi nda. Idii púŋ, ndóò pena cɔnɔn, ndóò soli sálà loamaa le nda a pilɛn-pilɛnnda Kani nuaa ndóò dimi ni aa: «Bɔɔle poaa nia tosa hakio pum. Bɔɔle a dimi diomnde tanalen a Hala o kɔlta ndalan nin.» Lende Yɔb ndóò tosa lɔ́ɔ́-lɔ́ɔ̀ ni.

⁶ Paale pilɛ, mí poaa Hala-a hun sim Mɛlɛka o hɔl, mí Setana bɛɛ hun sim nda tɛɛn.

⁷ Mí Mɛlɛka ɲuna Setana aa: «Kuɛɛ nɛ n co yɛ fulaa ho?» Mí Setana mulul Mɛlɛka aa: «Lɛŋnden ya va balɔɔ a kelaa lenin ni.»

⁸ Mí Mɛlɛka ɲuna ndu aa: «Vɛ̀ɛ̀ a dɔw pá Yɔb, vana ni baalaa, taasi? Vana-vana co maa ndu o lɛŋnden coo le, vana sakpoo a vana sandaa o co ni. O nɔ siòòŋii Hala-e o kpakpalà dɛnɛ vɔɔndo.»

⁹ Mí Setana mulul Mɛlɛka, mó dimi aa: «Mò va maa fúú Yɔb nɔ siòòŋii nɔm Hala-e ni?

¹⁰ O co nɔm te co ndu pila, cɛi ndɔɔ a ɲɛ-ɲɛ co ndu o ba kandaa ba-ba fee le? A dɔw kɛvalta ndɔlan duaa, cɔlua ndɔa co kuiyo vɛɛlɛ̀-vɛɛlɛ̀ o lɛŋnde len nin.

¹¹ Kɛ siɛndi vɔ hau baa, mà tɛɛmbuu ɲɛ-ɲɛ o nɔ. Lekɛndɛ, o co diomnde tanalen dimi a nɔm.»

¹² Mí Mɛlɛka dimul Setana aa: «Ava, mɛɛ ɲɛm ndɔn kpow n co o kpaaya nɔmndo bɛngu. Kɛ hol ndu pila baa le dɛ!» O kon, mí Setana faŋan Mɛlɛka o hɔl.

¹³ Paale pilɛ niko, poaa a cuavaa Yɔb-a va ɲɛdiaa dioo a mɔiyan kolɔɔ o bɛnda tasoo lo cɛinin,

¹⁴ mí kiilanɔɔ pum hun o Yɔb lo, mó dimul ndu aa: «Nawva va vàá, mí sofɛlɛa laandua va diolan nda ikɛi,

¹⁵ mí vannda Saba hun del nda coo, má diw buɛyaa nɔmnda kpede, má kɔannun a cɔlua. Ya pilɛ kpé hɛlun ni, mí sɔndan le hunɔɔ nɔm yoongoo ho dimullo.»

¹⁶ O va vɔ kona kon dɔwnɔnndo, mí kiilanɔ celen hun dimul vɛlɛ Yɔb aa: «Yinnde Hala len le fula coocoo mí le del saa nɔmnda a buɛyaa nɔmnda coo, má cuulu mungén! Ya pilɛ kpé hɛlun ni, mí sɔndan le nɔm hunɔɔ yoongoo ho dimullo.»

¹⁷ O cii ken dimi le, mí kiilanɔ celen hun dimul ndu vɛlɛ aa: «Yungu fula Babilɔn-ndo hin kundalan tan yáá, má del ɲɔɔmɛɛa coo, má diw buɛyaa nɔmnda a mɔɔn cɔwvon, ya pilɛ kpé hɛlun ni, mí sɔndan le nɔm hunɔɔ yoongoo ho dimullo.»

¹⁸ Kiilanɔ kon ndu cii bɛɛ vɛlɛ ken dimi le, mí kiilanɔ celen hun dimul Yɔb aa: «Poaa nɔmnda va ɲɛdiaa dioo a mɔiyan kolɔɔ nda yemaa ndaa latulu o bɛ nda tasoo lo cɛinin,

¹⁹ mí hoeyii bɛndu-bɛnduei can a kpengii lɛŋnde veselɛilen, mí i lɔaa cɛiyo o kpengun hiɔɔlon, mó komba nda coo, má vu kpede. Ya pilɛ kpé hɛlun ni, mí sɔndan le nɔm hunɔɔ yoongoo ho dimullo.»

²⁰ Yɔb ciiyo sɔɔn mun tueyɔɔ kpede, mó can tangban, mó sɛɛsiaa doma ndɔ bɛndoo ndu lekɔɔ, mó sendi tembello. O kon kɔɔli, mó del lɛŋ, mó baŋ vulan,

²¹ mó dimi aa: «Fondo ya hin fulaa kala nuu o ipulu ni, fondo koni ya muungunin vɛlɛ lɛŋ ni. Mɛlɛka yɔngu ni, Mɛlɛka poonda vɛlɛ ni, màá biiloo va le ndu Mɛlɛka!»

²² O dɛnnda lan nin kpow, Yɔb tosa haki le, o dimi vɛlɛ diomnde tana a Mɛlɛka le.