Hebreea 9 - BII BILA

Nɛi kpeekpeiyo

¹ Kpema tasoo ndóò nɔ tɔŋnda lekaanndan a fondaa le Hala biiloo o lɛŋnden coo.

² Lelan mí ndáà toandu cɛi kolaa. O fonda tase cɛi kon nin, o ndáà veelu aa fonda diandaa-o, lon ɲɛ kɛsiaa lafitinaa a tabali kɛsiaa bulu ndáà ke Hala-o va ni.

³ O kola landaa diinndɔɔ kɔɔli, fonda diinndɔɔ va ni. Ndu ndáà veelu ni aa: «Fonda diandaa-diandaa.»

⁴ Ndóò nɔ fonda solia lasálà ndáà toosiaa a sianion-ndo le sálàla ansan solio. Kesu kpemaa va vɛlɛ lon, o va o yikpaa kpede a sianion. Hɛngɛi nda toosiaa a sianion-ndo va o kesu kon nin, o va o pia cá a manne, sionnde Aarɔn-nde soli peengelan-nden bɛɛ le va lenin. O kon kɔɔli, powta sɔɔn kpeman va n sɛvaa lecoo lan la va lenin.

⁵ Tuuliala mɛlɛkaa kanda ɲɛm Hala-on-nda, a va tɔɔmasele biilu Hala-o-a va o kesu kalaa coo. Mí nangu hɔlla o kumbu kesoo coo nɛɛ láà malnun-nda. Kɛ o co telen vana luɛi o tɛɛsiala lan nin te co hoo le.

⁶ Nuaa ɲɔɔ va o toosiaa ni kpede. Lepalaa-lepala, vanaa-solia-lasálàá va luɛyɔɔ o fonda tase cɛi-kola-toandaa kalaa nin le vali ndaa tosaa Hala o hɔl.

⁷ Kɛ bolle vanaa-solia-lasálàá ndu pilɛ kpé ndóò luɛi lepilɛ o fonda diinndɔɔ nin, o vɔsio nin ni. Lon ndóò kɔa a kooma cɔlu ndóò solul Hala sálàá le ndu pila a le tɛɛmbuula lɛŋnden kpow ni.

⁸ Mí Hala Kɔl-Diandaa cɔm o kon maa te fonda tase cɛi-kola kon co vɔ pɛ, mɛɛ nɛi kɔɛ o fonda diandaa-diandaa-o co vɔ o kumbiaa le.

⁹ Dɛnɛ kon co macoaa tuulaa le telenndo ho. Kɔlɔ ndɔɔ co ni maa ɲɛm-kéan a sálàla n'cɔlula vannda solul Hala lan la nɔla kɔlta vanaa co o kaannde len-nda dindio le.

¹⁰ Tanala va le vanndacieea daama lan la va le ɲɛm dian, ɲɛm vana kol-lon a le faleŋun dindiaŋun yɛ́-yɛ́ɔn ni. Tanala lan kpow láà bɛnda háá o telen Hala va dɛnndan yɛlɛma-o.

¹¹ Kɛ Krista ndu hin maa bolle vanaa-solia-lasálà le naa dɛnnda kɛndɛla cuu nin tosan-ndan yɔngoo. Mó luɛi o cɛi-kola-toandaa hiow vaa o bɔɔ-o nin, cɛi kon nɔ isɔw le, o co vanaciee le toosiaa ndu le, o co bɛɛ ɲɛ vaa o ceen naa ho coo le.

¹² Luɛyɔɔ Krista luɛi kon lepilɛ kpé o fonda diandaa-diandaa nin-ndo, o yɔngu kooma cuinaa toovi le, o yɔngu kooma navaa téndé le, kɛ kooma ndɔma ndu pila-an o yɔngu ni, o kon mó baŋa naa le fɛɛn a fɛɛn.

¹³ Mɛɛ o dema tosan yɛ, a cua pɛ kooma cuinaa toovia a ma navaa tovaa, a cua vɛlɛ pulta naw nda lom-ndo, a cucu lan vanaa cua hakio-a coo. O kon dialun ndan dendu a dɛnɛ haki kon o kɔɔ.

¹⁴ Nɛɛ ken tosan-ndɔ lende, vɛ̀ɛ̀ kooma Yeesu-an man ma hiw kpaayaa lende le? Kani a kpaaya Hala Kɔl-Diandaa ndu pila yɔngun Hala ni, maa cɔlu sálà nɔ lenamta loo. Lelan, o dindinin kɔlta naalan le dɛnnda naala vɔɔnndan haliko mi n tosal Hala yoomaa vallo.

¹⁵ Lelan Krista co vana tɛɛlanndo le kpema sɛnɛiyo ni. O sɔla piɔ́mndo le vanndacieea baŋaa le tɛɛmbuula ndalan telen nda va o kpema tasoo bɛngu-o. Vanaa sɔla veeloo-a nda tiwba ma sɔla kɛ́ fɛɛn-fɛɛn Hala yiilu nda kpemaa-o.

¹⁶ Kani nɛɛ-nɛɛ vana co piɔ́mndo-o congun pɛ sɔɔn o sɛbɔɔ nin, mɛɛ mì vana kon vi fɔlɔn, kani te o vi-yɔ le, sɛbɛ kon nɛŋi ɲɛ-ɲɛ le.

¹⁷ Sɔɔn o congun mun-ndon nɔla mì n tosan te, te vana kon co vɔ pɛ yoomu. Kɛ te vana congun kon-ndo vi dɔ́ɔ́ pɛ, sɔɔn o congun-ndon tosan.

¹⁸ Lelan kpeekpei kpema tasoo kandun a koovan ni.

¹⁹ Mɛɛ mì Moise ndóò dimi fɔlɔn tɔŋndan mɛɛ la co kpede vannda kpow o hɔl. O kon mí ndóò cua kooma navaa téndéa a ma cuinaa toovia, a mɛnndan, mó fasaŋa man o sɛbɛ latɔŋndo coo a vannda kpow coo a lɛvii hisɔp a á kola keese siaŋa vólotótoo.

²⁰ O kon o dimi aa: «Koovan man ma co kooma kpema Hala yiilu niaa-o ni.»

²¹ Lende koni o fasaŋa koovan o cɛi-kola-toandaa a o ɲɛm-laandun lekaanndon coo ni.

²² Maa mɛɛ tɔŋndo dimi yɛ maa a koovan vana nɔla ɲɛm bɔɔ-bɔɔ dindio ni. Nduyɛ, te koovan ma fula le, malɔɔ lahaki co le.

Sálà Krista-o faŋa hakilan ni

²³ Lende ɲɛm co o halataala-on kpede n bɛnda le dindinndo ni. Kɛ ɲɛm co o halataala-on nɔ makoo a sálàla hiow naŋɔɔ lan.

²⁴ Kani Krista luei o fonda diandaa toosian a bala vanacieo vo nin te, velan fonda diandaa co o halataala-o daama co kon ni. Kɛ o halataala kpeekpei o luɛi ni, lon o co sunsun Hala o hɔl le naa ni.

²⁵ Vɔsi oo vɔsi, mɛɛ mì bolle vanaa-solia-lasálàá ndóò luɛi o fonda diandaa-diandaa nin a kooma ve kooma ndɔ ndu pila le-an. Kɛ Krista luei o halataala le ndu pila sálà solin bɛmbɛ lediin-leyaa le.

²⁶ Te o co kon te, mɛɛ mì ndóò sanga bɛmbɛla bɔɔ-bɔɔ kabi ceendo cɔwnun. O telen mɛɛlaa ho, lepilɛ kpé o fula ni, mí ndu pila solin sálàá le hakio faŋaa few-few.

²⁷ Lepilɛ kpé vanndacieea bɛnda le piɔ́mndo sɔlaa ni, o kon kɔɔli Hala kelu yamɛi ndɛi.

²⁸ Lende koni, lepilɛ kpé Krista solin sálà le hakila vanaa bɔɔ-bɔɔ faŋaa ni. O hun cɔmnunnin vɛlɛ o diinndɔɔ le vanaa co ndu cumndo-a hunɔɔ ciindiaa, kɛ o ve lɛnin le lahaki faŋa le.