Hebreea 8 - BII BILA

Yeesu, bolle vanaa-solia-lasálà naa

¹ O sɔɔn naa n co dimio-on kpow nin, i hiow va isɔvɛ-e co hee ni: n nɔ bolle vanaa-solia-lasálàá, o co icali o kpɛŋɛ lemasa Hala-o o ba kɛndɔɔ coo o halataala-o.

² O co vali ndɔɔ tosaa o fonda-diandaa nin, o cɛi-kola-toandaa kpeekpeiyo nin, o Mɛlɛka pila kila-o, o vanaciee tosa loo.

³ Vana-vana nda suili pɛ bolle vanaa-solia-lasálàá, baala ndɔɔ co ɲɛm-kéan yɔngoo a sálàlan solio ni. Lelan, o naa bɛɛ bɛnda mò nɔ ɲɛ o soli sálàá-o.

⁴ Te o ceendo coo Krista ndóò va ni, ndóò venin bɛɛ vana-solia-lasálà le. Kani vanaa-solia-lasálàá celen co nin, a co ɲɛm-kéan yɔngoo mɛɛ tɔŋ Moise-o co yɛ.

⁵ Vanaa-solia-lasálàà kan co vali kon tosaa o Cɛi-Hala-o nin. Kɛ vali nda co kon tosaa-o co macoaa maa vundule ɲɛ co tosanndo o halataala-o. Kani hali telen Moise va cɛi-kola-toandaa tangullo-o, mí Hala dimul ndu aa: «Toosiaa ndu ɲɛkɛndɛi mɛɛ ya tuulul nɔm ndu o pembei coo yɛ kpafii.»

⁶ Kɛ Yeesu ndu, vali ndɔɔ hiow kon, kani ndu co simtɛɛndo le kpema hiow naŋɔɔ-o ni, o yiinun a diomnda hiow naŋɔɔ lan-ndo.

⁷ Te kpema tasoo ndóò nɔ isɔw le, vanáà singa ndu a o diinndɔɔ le.

⁸ Kɛ sɔvun Hala ce o vanaa ndɔa lo-on co mun ni, mó dimi aa: «Mɛlɛka dimi aa: Paale vanin, mì yii kpema sɛnɛiyo a vannda Israɛl a á haa Yuda.

⁹ O venin maa o tase yáà yii a fuɲaa ndaa mamaa telen ya bii nda baa le nda solio o lɛŋnde Esipte len nin-ndo le. Kpema kon ndu, má tɛɛmbuu ndu, nduyɛ, ya va vana nda bɛndoo ni. Sɔɛi fula ya Mɛlɛka o sondo-e co ken ni.

¹⁰ Kani kpema va naa tɛɛn naa cuavaa Israɛlla-o va hoo ni aa: ‹Palɛi ken hiow pɛ, i vownin tɔŋnda nilan nda nin, mì sɛva vɛlɛ lan nda o lakɔl. I vanin Hala ndaa, mì nda va vanaa nia.

¹¹ Vana-vana o nda tɛɛn suu lɛnin o caan ndɔ le, te kon te o puapilɛ ndɔɔ lo le ndu ya cɔmndo le, kani nda kpede sinanin ya. Mɛɛ nda co kpede, cɔn o vana hiow dɔɔnanndo-o, kɔ tiiya o kaasonɔ hiow nda kpede-o lo,

¹² i malnin nda haki, i loonun ndɛnin a hakila ndalan te.›»

¹³ Te Hala soo pɛ a kpema sɛnɛiyo o kɔɔ, mɛɛ kon co dimio ni maa kpema tasoo muungu o paandoo. Nduyɛ ɲɔɔ muungu pɛ o paandoo, o siɔŋ, o kon o lo.