Hebreea 6 - BII BILA

¹ Lelan n mɛinun sɔɔn kindu o pɛɛkuula Krista lan nin toon a makɔɔ, mì n mulin hɔlla o sɔɔn kaasonnda. N muungun ndɛ o pɛɛkoo ho tumndo di le, maa mɛɛ dɛnnda yɔngu vana piɔ́mndo sɔlaa lan malɔɔ co nuaa yɛ, Hala laalanndo,

² pɛɛkoo a yinɔɔ o kɔɔ, vannda balan handɔɔ coo le piɛilen, tendul vanvílɛ́iya a yamɛi mɛɛlɛi.

³ Te Hala cɛl pɛ, o naa n co tosa-o co kon ni.

⁴ N tofan ndɔ sɔɛi vanaa muungu mà del o ceen nda paandoo nin-nda. A sɔla ɲɛ-tengaa Hala-o, má sɔla ke Hala-o, má sɔla Hala Kɔl-Diandaa,

⁵ má tuɛi sɔɛi Hala-i kɛndɛi yeela, má sinan kpaaya ceen co naa laci-o nɔnin-ndo,

⁶ kɛ a kon kpow, má muungu o ceen nda paandoo nin. Vanaa vaa lende, vana tiw lɛ ba nda tolɔɔ kɔɔli le ceen ndaa mingio o sɛnɛi le. Kani nda co Po Hala-o mingio baŋɔɔ o yɔm singafilaa coo ni, mì vannda va ndu mamɔɔ kpendekele.

⁷ Kani te piɔɔ va pɛ siaa cuɛi-cuɛi o yondoo pum coo, mì yondo kon va vanaa co ndu vaa-a tɔlɔɔla kɛndɛlan yɔngoo, Hala dɔw ndu duaa.

⁸ Kɛ te o soli pɛ bɔɔla n'yɔɔlan a booson, mɛɛ o nɔ tɔnɔ le. O kon Hala kɛɛ ndu, o mɛɛlulan, a mal ndu yin.

⁹ Kɛ nduyɛ puapilɛa nia, n co bɛɛ dimio lende, kɛ n laalan maa la co o nɛi kɛndɔɔ coo, nɛi cindaa pɛɛn.

¹⁰ Hala co vana kɛɛ isandu le. O pɔɛɛnun ɲɛ niaa co tosaa-o a kaola niaa cɔm le ndu le, o pɔɛɛnun kpekula niaa co vanaa Hala-a solio lan te.

¹¹ Kɛ nduyɛ, o naa n yeema-o co ho ni, mì vana-vana o niaa tɛɛn lo lecoo háá o mɛɛlulan. O kon mí ɲɛ niaa kɛsi kɔllo coo-o tosan.

¹² La vá vanaa dialun vílɛ́i le, kɛ la vá velan vanaa laalaŋaa kindin má lo lecoo-a, a sɔlá ɲɛm Hala yii kpemaa-on kɛ́ɔ-va pɛɛn.

Kpema Hala cii yii-yo yɛlɛman te

¹³ Lɔ́ɔ́ Hala yiilu Abraham kpemaa-o, mó mɛnalan ndu o diola ndɔla ndu pila lan, kani vana celen co le, o hiow ndu Hala-o, haliko mi ndóò mɛnan o diola vana kon.

¹⁴ Mó dimi aa: «I mɛnan maa i dɔawnin nɔm duaa taw, mí kuil cuavaa-imamaa nɔmnda.»

¹⁵ Mí Abraham biwnun, mó cum, o kon mó sɔla ɲɛ Hala ndóò dimul ndu le ndu yɔngoo-o.

¹⁶ Kani vanndacieea va pɛ mɛnanndo, a mɛnan o diola vana hiow nda-o. Mɛnan kon tosà ni mì vannda laalan sɔɛi ndɔɛi, mì sɛɛngianndo cuu.

¹⁷ Lende koni o tosan a Abraham ni. Cuavaa ndɔa imamaa ndáà bɛnda mì ndáà sɔla ɲɛm Hala ndóò yiilu ndu kpemaa-on. Ndóò yeema le nda cɔmndo vakpa maa o mangalanin diom ndɔɔ lɔ́ɔ́-lɔ́ɔ̀ le, lelan o mɛnan o kpemaa yiiyo ni.

¹⁸ Kpemaa a mɛnanndo, sɔɔn miuŋun mun, vana nɔla ikɛ́-kɛ̀ yɛlɛma le. O kpema o yiiyo nin a o mɛnan ndɔɔ nin, Hala co vana dimi lacòò le few, nduyɛ kon luèi naa yoomuan taw. Lelan naa n mal dɛnndan kpow ni, le ɲɛ naa kɛsi kɔllo coo mó kennun naa-o sɔlaa.

¹⁹ N nɔ laalan kon le yoomu naa maa ciliŋii nda mal o mɛnndan nin le dɛ̀ndɛ̀la bɛndulan simio-e. Laalan kpekpeiyo o co ni, o naa sim coo yilio, o luɛi haa o kola landaa co o Cɛi-Hala-o nin-ndo kɔɔli.

²⁰ Lon Yeesu luɛi naa tase ni, le dɛnɛ naa. Mó siŋnun bolle vanaa-solia-lasálàá le fɛɛn a fɛɛn maa Mɛlkisedɛk.