Hebreea 5 - BII BILA

¹ Bolle vanaa-solia-lasálàà kɛ́-kɛ̀ hɛlin pɛ vanndacieea tɛɛn, baala ndɔɔ co le Hala ɲɔɔloo le vanndacieea kan ni. Mò va ɲɛm-kéan a sálàlan yɔngoo le hakilan.

² Ndu pila bolle vanaa-solia-lasálà kon, o nɔ biondɔnndo taw. Le hee o tiwba mò bii sɔvun vanaa co biondɔnndo o sina lepɛŋndo nin-nda bila.

³ Le mɛɛ ndu pila nɔ sɔwvon yɛ, mɛɛ mò soli sálàlan le hakila vannda kpow a le ndu pila.

⁴ Vana-vana kennun bɛɛlen mò siingun ndu pila bolle vanaa-solia-lasálàá le. Hala handu vana o fonda kon ni, mɛɛ o handu Aarɔn yɛ.

⁵ Krista bɛɛ, o co ndu pila le kennun bɛɛle len le siŋnɔnndo bolle vanaa-solia-lasálàá le, Hala o ba o sɔla dí kon ni, mó dimul ndu aa: «Nɔm co po nuu ni, kandɔɔ hau, i siŋnun Fuɲa nɔm.»

⁶ Mó dimi vɛlɛ nɛɛ celen aa: «A co va vana-solia-lasálàá le fɛɛn a fɛɛn maa Mɛlkisedɛk.»

⁷ Telen Krista va o ceendo coo-o, o va caŋndo kpélén a mɛmɛan tuisio Hala ndóò nɔla ndu baŋaa piɔ́mndo o ba-o o lani, mí Hala tuɛi ndu diom le tùú o lo o lediom coo-o.

⁸ Po Hala-o Krista co ni, kɛ a kon kpede, mó tuisin o sangala kei ndu coo lan nin kpow.

⁹ Nduyɛ, mó peelun o dɛnndan kpow nin. Sunsun, vana-vana bii pɛ sɔɛi ndɔɛi, o ke ndu cinda fɛɛn-fɛɛndo.

¹⁰ Kani Hala siinguu ndu bolle vanaa-solia-lasálàá maa Mɛlkisedɛk ni.

Dɛnɛ palaa vana sɔla-o te vana mal pɛ laalanndo

¹¹ N nɔ sɔɔn taw le dimio o sɔɛi hee coo, kɛ n kendu tɛɛsiaa, kani la keleŋa sɔɔn bila biyɔɔ le.

¹² Vana yiyan pɛ telen hiow nin-ndo, niáá bɛnda nin le caanda pɛɛkoo ni, kɛ niaa nda co vɔ sɔɔn kindu o sɔɛi Hala-e nin toon pɛɛkoo ni. La tiw vɔ ba ɲɛdiaa kàlà-kálàá dioo le, fɔ mɛɛyan.

¹³ Vana co vɔ vɔɛiyo-o ndu, cɛlɛkpɔɔ o co ni. O tiwba dɛnɛ sandaa bilaa biyɔɔ le, kani cɛlɛkpɔɔ o co ni.

¹⁴ Kɛ nduyɛ, le kaasonnda ɲɛdiaa kàlà-kálàá co ni. Nda sínà hiyan co dɛnɛ kɛndɔɔ a o vɔɔndo tɛɛn-ndo, kani a dɛli nin.