Hebreea 4 - BII BILA

¹ Hala cii naa dimul maa n luɛinin o pɛngi o toosial naa-o nin. Lelan n mandan taw, vana-vana o niaa tɛɛn bɛnda mò lo kɔɔli le luɛyɔɔ o pɛngi kon nin te.

² Kani mɛɛ sɔɛi Hala-e ndíì dimulun vanaa va o lɛŋnde veselɛilen nin-nda yɛ koni i dimulun naa ni. Kɛ sɔɛi nda tuei ken-nde nɛŋi nda mako kɛ́-kɛ̀ le. Kani ndáà tueyɔɔ sɔɛi kalɛi, a laalan ndi le.

³ Naa n laalan-nda, n co luɛyɔɔ o pɛngi Hala dimi kon sɔɛi ndɔɛi-yo nin, o Hala dimi-o aa: «Mí mɛnan a kɔltuwvo aa: ‹A lueinin o lɛŋnde ya toosial nda pɛngio nin-nden te few!›» Nduyɛ, Hala ndóò cii nin vali ndɔɔ kabi telen o cii ceendo cɔvɔɔ-o.

⁴ Kani o co o sɛvaa a paale ŋɔmmɛwndɔlen o kɔɔ aa: «Mí Hala pɛngi o paale ŋɔmmɛwndɔlen a vali kɛ́-kɛ̀ o tosa.»

⁵ O co vɛlɛ o sɛvaa o fondaa pum aa: «A lueinin o lɛŋnde ya toosial nda pɛngio nin-nden te few!»

⁶ Vanaa keleŋa sɔɛi Hala-e tueyɔɔ-a bii ndi le. Lelan a luei o pɛngi Hala dimi kon sɔɛi ndɔɛi-yo nin te. Le hee vanaa celen a nɔla vɔ mà luɛi.

⁷ Mí Hala hɛli vɛlɛ paale celen, mó veelu len aa «hau». Mí vɔsila bɔɔ-bɔɔ la hiaw o kon kɔɔli, mó dimi ndi vɛlɛ a sondo David-o, o bungɛi naa n dimi nihaw-ve nin aa: «Te la tuei pɛ hau diom Hala-o, la kìndì nilan te.»

⁸ Kani te Yosue ndóò yɛɛ pɛ vannda o pɛngi kon nin, Hala ndóò suu lɛnin o kon kɔɔli a paale celen o kɔɔ le.

⁹ Kon co dimio ni maa pɛngio co vɔ le vanaa Hala-a, o velan a pɛngi paale ŋɔmmɛwndɔlen-ndo.

¹⁰ Kani vana luɛi pɛ o pɛngi Hala-o nin, ndu bɛɛ pɛngi a vali ndɔɔ, mɛɛ Hala pɛngi a o ndɔɔ yɛ.

¹¹ Lelan n kindikindin le luɛyɔɔ o pɛngi kon nin, haliko vana-vana del mò bumba le luɛyɔɔ maa fuɲaa naa mamaa lɔ́ɔ́ kon te.

¹² Sɔɛi Hala-e co ikiyɛi, i nɔ kpaayaa. I hiow mɔɛi sondola tiɔn kɛ́-kɛ̀ luɛyɔɔ. Sɔɛi Hala-e tiwba mi i luɛi naa nin di, mì i tiiya naa o kɔllo nin, mì i tiiya o boondon, mì i luɛi o yooyooan nin di. Mì i sina tuulan a yiyannda co o kɔl vanacieo nin-ndan.

¹³ Ɲɛ-ɲɛ co o viannan Hala o hɔl te. Ɲɛm o toosiaa-on kpow n co ndu o hɔl vakpa. O kei dɔ́ɔ́ pɛ hɔlten, o ce kpede. Nduyɛ, o ndu lo naa n dɔawnun kona ni.

Yeesu co bolle vanaa-solia-lasálàá ni

¹⁴ Lelan n simnun yili o laalan naa n co sɔɛi ndɔɛi dimio-o coo. Kani n nɔ bolle vanaa-solia-lasálàá, o kɔɛ nin o halataala di-o, Yeesu po Hala-o pɛɛn.

¹⁵ Bolle vanaa-solia-lasálà naa n nɔ-o nɔ ɲíí nɛi. Kani fúú le, o sínà maa n nɔ kpaaya le. Kani ndu bɛɛ mó sɔla tɔɔndanndan o nɛi oo nɛi coo mɛɛ naa n co tɔɔndanndan sɔlaa yɛ, kɛ o tosa haki kɛ́-kɛ̀ le.

¹⁶ Lelan n sɔɔngun Hala kaola naa-o o ibuŋ a laalanndo mì n sɔla malɔɔ lahakio, mò tuinun naa iɲíí le naa malaa o telen bɛnda-o.