Hebreea 11 - BII BILA

Laalanndo

¹ Laalanndo co sinaa ni maa ɲɛm vana kɛsi kɔllo coo-on toɲaa lekɛ́ndɛi n co ni, nduyɛ maa vana co mun sɔla. Seile ɲɛm vana co cɔ a lehɔl te-on o co ni.

² Le laalanndo vannda sɔla seile kɛndɛlen sindɛ ni.

³ N laalàn Hala, lelan naa n bii bila ni maa a Sɔɛi Hala cɔw ceendo ni. O kon mí ɲɛm vana ca-on toosian a kpaaya ɲɛm vana ci le-on.

⁴ Mí Abɛl solul Hala sálà hiow naŋɔɔ a laalanndo, mó hiaw sálà Kaɛn-ndo naŋɔɔ. Le laalan ndɔɔ, mí Hala ca ndu vana sandaa, mó hini kɔl a ɲɛm o solul ndu sálàá-on. Abɛl co bɛɛ o vílɛ́iyo, kɛ nduyɛ le laalan ndɔɔ, o co vɔ sɔɛi.

⁵ A laalanndo, mí Enɔk hel o halataala, o ci piɔ́mndo le. Vana ci lɛ ndu le, mí Hala heelun ndu ikɛi. Sɛbɛ Hala-o dimi maa lɔ́ɔ́ pá mó hel, Enɔk ndóò hɛnan Hala.

⁶ Nduyɛ, te o co a laalanndo le, vana-vana nɔla Hala hɛnan te. Kani, vana va pɛ Hala sɔɔnguuo ikɛi, fɔ mò laalan maa Hala co, maa o salanin vanaa co ndu nuwviaa-a.

⁷ Le laalan Noe ndóò nɔ-o, mí Hala cɔm ndu dɛnnda vanaa ci vɔ le lan. Mí Noe luɛi sɔɛi Hala-e yii, mó toosiaa dɛ̀ndɛ̀ mamɛn bɛndoo le yungu ndɔɔ ciindiaa. Le hee, mí Noe cɔm maa dɛnnda vanndacieea o ceendo coo la niŋ te. O kon mí Hala ca ndu vana sandaa le laalan ndɔɔ.

⁸ A laalanndo Abraham cɛl veelu Hala-o ni, mó kɔa o lɛŋnde Hala yiilu ndu kpemaa le ndu len keo kɛ́ɔ len nin, ndóò sínà vɔ bɛɛ lon te, mó kɔa.

⁹ A laalanndo, mó kɔ cal o sumialle o lɛŋnde Hala ndóò dimul ndu le ndu keo len nin. Mó kɔ cal lon o cɛila-kolala-toandaalan nin nda Isaak a Yakɔb. Nda bɛɛ, kpema pilɛ kon ndóò yiinun le nda.

¹⁰ Kani Abraham va cumndo le kɔlan o kobi nda caa kila ɲɛkɛndɛi-yo nin, o Hala pila tuu mó tangul-lo.

¹¹ Le laalan Abraham ndóò laalan Hala-o o sɔla kpaayaa le hɔ́ɔ́ violɔɔ ni. O va nin bɛɛ o yuuvɛiyo taw-taw. Sara laa ndɔ ve vɛlɛ vana vialaa le, kɛ ndóò laalan maa vana lo o lediom coo-o Hala co ni.

¹² Lelan fuɲa-mama pilɔɔ, Abraham ndóò nɔla lɛ hoo hɔ́ɔ́ violɔɔ loo, mó vialu cuawva sɛ́lɛ́ bɛndoo maa loeon o halataala, te kon te maa siòònndon o mɛmma ihɛllan kɔngɔ, vana nɔla nda cɔm te.

¹³ Nda kpede o laalanndo nin nda lo ni má vu. A sɔla ɲɛm Hala dimi le yɔngoo-on te, telen kon vannun ndɔ lándán, kɛ mí ɲɔɔ tosan vanáà ca ko aa ndáà ce nin dɛnnda kalalan o peelɔnndo. Má dimul vannda kpendekele maa mialla a vanaa hiawnannda nda yɔŋnun o lɛŋnden nden coo ni.

¹⁴ Vanaa co sɔɛi lendea, mɛɛ nda co cɔmndo vakpa maa kɔltan la co nda o lɛŋnde celen, lɛŋnde co le nda len.

¹⁵ Te o lɛŋii nda cɛn nin-nde kɔltan láà va nda ni, a va nɛilan nuwviaa le muungoo lon.

¹⁶ Kɛ o kpeekpeiyo nin, a lɛŋnde hiow lɛŋnde len naŋɔɔ len o kɔɔ nda va sɔɛi ni, halataala pɛɛn. Lelan siɛmbula bii Hala le ndu veeloo aa Hala ndaa le, kani mó toosial nda kobio.

¹⁷ A laalanndo Abraham cɛ̀l sindɛ le Isaak sálàá solio ni, telen Hala tɔɔndan ndu-o. Mó cɛl le po ndɔ pilɔɔ sálàá solio, nduyɛ a ndu Hala yiilu Abraham kpemaa ni.

¹⁸ Mí Hala ndóò dimul ndu aa: «A Isaak n sɔlanin cuavaa-imamaa solinin diola nɔmndan tɔ́ɔ́-a ni.»

¹⁹ Kɛ mí Abraham yiyan o kɔl ndɔɔ nin maa Hala nɔ kpaaya o mingi Isaak yoomu-o. Lelan mí Hala mingul ndu po ndɔɔ, mí ken yɔŋnun tuulaa pum.

²⁰ A laalanndo Isaak dɔw Yakɔb nda Esau duaa le siɔdii ndaa ni.

²¹ A laalanndo Yakɔb dɔw poaa Yosɛf-a a pilɛn-pilɛnnda duaa ni lɔ́ɔ́ pá mó vu ni, mó tiindan o tindà ndɔɔ coo, mó biilu Hala.

²² A laalanndo Yosɛf soo a fula Israɛlla o lɛŋnde Esipte len nin o kɔɔ telen o va le vuo-o ni, mó cɔm nda mɛɛ ndáà bɛnda le tosaa a dialun ndɔn yɛ.

²³ A laalanndo vanaa velu Moise-a ven ndu le paangon mún yáá o violɔn ndɔɔ kɔɔli ni. Siòòŋii bii nda a tɔŋ masaa ndóò handu-o le, kani naŋɔɔ pila cɛlɛkpɔɔ ndóò naŋ ni.

²⁴ Moise ndóò laalan Hala, lelan telen o sul-lo, mó kɛɛ le vannda ndu veeloo aa po masaa Esipte-o.

²⁵ Mó hɛli le sangaa sɔlaa nda vanaa Hala-a latulu, hiovɔɔ kɔlkɛndɛ yɔŋ vɔɔndo coo, o co le telen bingi-o pɛɛn.

²⁶ Mó ca maa sangaa sɔlaa le Krista co fisa a bolofaa Esipte. Kani vɔ̀ngɔ́ va ndu laci-o caando va cɔu ni.

²⁷ A laalanndo, mí Moise faŋan Esipte, siòòŋii bii ndu le kɔl tambɛi masaa le. Mó sim yili, vanáà ca ko aa Hala vana ci loo o va cɔu ni.

²⁸ A laalanndo, mó tosa kafo-hiavaa-coo, mó dimul vannda le koovan suiyo o kèéden lacɛiyon coo. O kon mɛlɛkanɔ piɔ́mndo dii poaa tasea Israɛlla le.

²⁹ A laalanndo Israɛlla taŋ mɛmma ihɛlma makpɛ̀ndɛ̀an o lɛŋnde vesɛilen nin ni, kɛ Esiptea tɔɔndanndo le tolɔɔ, má miisuu o mɛnndan nin.

³⁰ Israɛlla ndáà laalan Hala. O kon ndáà balɔɔ Yeriko palɛi ndii ŋɔmmɛw, mí kpaki kobio komba.

³¹ A laalanndo, Rahab cua suundaa sɔla piɔ́mndo latulu nda vanaa simul Hala-a le, kani mó yiya suansuaŋaa Israɛlla ɲɛkɛndɛi.

³² Vɛɛ ya dimi yɛ vɛlɛ a hee? I nɔ telen bɔɔ mì tɛɛsial niaa a Sedeɔn, Barak, Samsɔn, Yɛfte, David, Samiɛl a vanaa-tɛɛngaa-diom Hala-a o kɔɔ le.

³³ Laalanndo yɔŋ ni mí vanaa kan a nɔla masɛi, má tosa dɛnɛ sandaa, má sɔla ɲɛm Hala ndóò dimul nda-on, má kinda yàlàá sondolan.

³⁴ Má ɲumi kpaaya leyinndo, má hialun mɔɛi cɔwve, má deli a nààlan, má siangu. Telen lacɔwvo, má yɔŋnun vanaa dialun kalaa, má toaw vanaa cɔvaa va nda hinullo-a.

³⁵ Mí vanlaandua pum a ca vanvílɛ́yaa ndaa muungoo yoomu, má can fulaa o piɔ́mndo nin. A saangiaa a pum saangiaa piɔ́mndo, kɛ a cɛl mì vana baŋa nda le, haliko mi ndáà sɔla yoomu hiow naŋɔɔ-o o piɔ́mndo kɔɔli.

³⁶ Má mam a tiŋ, má lɔaa nda, má baa a pum yɔlɔn, má vow nda o kaasoo.

³⁷ Má lo a pum viiyo a powtan háá má diw nda. A pum yɛ, má kialu nda tɛɛn a siiyo te kon te, má dii nda a mɔɛi cɔwve. A pum yɛ, a cɛn pɛ baa, a kɔɛ baa pilɔɔ a yáwla saa, te kon te yáwla cuinnda lekɔɔ. Mí pɛŋnde ɲɛ-ɲɛ fee le bii nda. A va nda sɔɔlɛmaa suiyo a nda saangiaa taw.

³⁸ O lɛŋnde veselɛilen nin a o pembon coo vannda ha ndáà kela ni, má kei luɛyɔɔ o powta kpovalan bɛngu a o buululan nin. Ndóò bɛnda bɛɛ mí vanaa kɛndɛa vaa lende ndáà hin o ceendo coo nanu le.

³⁹ Nda kpow, má sɔla seile kɛndɛlen le laalan ndaa, kɛ a sɔla ɲɛm Hala ndóò dimul nda-on te.

⁴⁰ Ksani Hala ndóò cii nin ɲɛm hiow naŋɔɔ le naa-on toosiaa. O yeema mi n kɔ sɔla mun latulu naa ndaa.