Hebreea 1 - BII BILA

Hala soo a sondo po ndɔɔ

¹ Sindɛ Hala va sɔɛi a sondo vanaa-tɛɛngaa-diom Hala-a o fuɲaa naa mamaa lo le telennda bɔɔ-bɔɔ a o nɛila yɛ́-yɛ́ coo.

² Kɛ sunsun, o palɛi mɛɛlɛi he nin, mó soaa o naa lo a sondo po ndɔɔ. A po ndɔ kon o cɔw ceendo ni, ndu Hala koni hɛli vɛlɛ ni mí ɲɔɔn kpow n va le ndu.

³ Po kon co ɲɛ-tengaa biilu Hala-o ni, ndu co vundule Hala len ni. Kpaaya fula o sɔɛi ndɔɛi nin-ndo co ceendo mandaa ni. Ndóò ciiyo vanndacieea dindio le hakila ndalan, mó hel o halataala, o co Hala vana kpaayaa kpow icali o ba kɛndɔɔ coo.

Po Hala-o hiow mɛlɛkaa

⁴ Po Hala-o co fisa a mɛlɛkaa, lelan Hala ke ndu diola hiow diola mɛlɛkaa lan ni.

⁵ Lepilɛ bɛɛ o dimul mɛlɛkanɔ kɛ́-kɛ̀ le aa: «Nɔm co po nuu ni, kandɔɔ hau, i siŋnun Fuɲa nɔm.» Nduyɛ, lepilɛ bɛɛ vɛlɛ o dimul lɔ mɛlɛkanɔɔ pum te aa: «Ya co va fuɲaa le nɔm ni, mì nɔm va po nuu.»

⁶ O kon kɔɔli, telen o cuu po ndɔ tasoo o ceendo coo-o, mó dimi aa: «Mɛlɛkaa Hala-a kpow a bɛnda mà biilu ndu.»

⁷ Ɲɛ Hala dimi le mɛlɛkaa-o co hoo ni aa: «Mɛɛ ya tosa a hoeiye yɛ koni ya tosa a mɛlɛkaa ni, kpeku piɔɔ-volia soli ya-o koni nda solul-la ni.»

⁸ Kɛ le po ndɔɔ mó dimi aa: «Àá Hala! Masale nɔmnden le co le lɔ́ɔ́-lɔ́ɔ̀. O sandei nin n co vanaa nɔmnda masalen tosaa coo ni.

⁹ Dɛnɛ sandaa n yeema ni, mì dɛnɛ vɔɔndo nɛinun nɔm. Àá Hala! Lelan Hala nɔmndo hɛli nɔm ni, mó tala nɔm cuɛima kafoan o lebol. Mó hɛli nɔm caaŋaa nɔmnda tɛɛn.»

¹⁰ Mó dimi vɛlɛ aa: «Mɛlɛka, nɔm cɔw sindɛ lɛŋnden ni, nɔm koni toosiaa halataalaa a bala nɔmndan ni.

¹¹ Ɲɛm n toosiaa mun-ndon tambunin, kɛ nɔm a co va le fɛɛn a fɛɛn. Lɛŋnden a halataalaa siŋnunnin maa volɔɔla cuɛinan.

¹² A tui-tuinin ndan maa doma bɛndu, mì la mangalan maa volɔɔ cuɛinan, kɛ nɔm ɲɛ pilɔɔ kpé n co ni, yoomu nɔmndo nɔ lamɛɛlu le.»

¹³ Lepilɛ bɛɛ Hala dimul-lɔ mɛlɛkanɔ pilɛ le aa: «Cal-la o ba kɛndɔɔ coo, mì tosa mà nɛw yaamɔaa nɔmnda a n'pelu.»

¹⁴ Mɛlɛkaa nda co macoaa maa kiilaa Hala-a, nda Hala viam le kɔlan vanaa sɔlanin cindaa-a sɔɔn dimullo ni.