Habakuk 3 - BII BILA

Piɛile Habakuk len a ɲɛ Hala tosa-o

¹ Cɛɛŋɔn Habakuk cɛɛŋun o piɛilen nin-ndo yɔŋnun hoo ni aa:

² «Mɛlɛka, i tuei a nɔm o kɔɔ. Siòònde bii ya dɛnnda nɔmndan, Mɛlɛka. O vɔsilan ndan bɛngu, peelu dɛnnda kalalan. O vɔsilan ndan bɛngu, cɔm vannda dɛnnda vakpa. Kɛ o kɔl nɔm tuwvo nin, loonun, a ɲíí nɔmnde o kɔɔ.

³ Hala co fulaa Teman mò va hunɔɔ. O-Diandaa co fulaa o pembei Paran coo mò va hunɔɔ. Bɔɔbɔɔyɛi ndɔɛi tiw o halataala sɔ́ mí lɛŋnden le pia a biilu ndɔɔ.

⁴ O co tengaa maa ɲɛ-tengaa, pangeloo co fulaa ndu o ba, tofa vɔ kpaaya ndɔ viannanndo.

⁵ Nàà n'kɔnyaa co kɔlan ndu laci, nàà dialun tuwvo co fulaa o foofola bɛngula ndɔlan.

⁶ O sim pɛ lɛŋnden le ɲiiya. O tofa pɛ vanaa-mangalaa-isɔɔa, kan yɔŋ siòònde a ndu. Pembun masindɛ-sindɔn co piɔsio, pembu pɔmbɔn sindɛ, n va mun nɛila ndɔlan paandu-on co tolɔɔ mɔlɔ-mɔlɔ,

⁷ I co cɛila-kolala-toandaalan Kusan cɔu tambei, fondala lɔlaalan Madian la co ɲiiyaa.

⁸ Vɛ̀ɛ̀ mò va maa a peela bɛndulan Mɛlɛka tambu kɔl nuaa ni? Mò va maa a peelan n tuulu kɔl ni? Vɛ̀ɛ̀ a mɛmma a ihɛllan n dɔwnun tumbé ni má va helɔɔ o soa nɔmnda coo a o ɲɛla ɲaanannda nɔmnda kpaayala soa nan-ndan coo-o?

⁹ A cii kpaasiaa nɔmndo kindɔɔ. Kɔɔn nɔmndon co mɛɛniannda n mɛɛnian o kɔltuw nɔmndo nin-ndan ni. A co lɛŋnden tɛɛndiaa a peela n co solio lenin-ndan.

¹⁰ Pembon co nɔm cɔu mì n va ɲiiyaa, Piɔɔ bɛndu-bɛndoo hin súlùlù mò va siaa. Mɛmma bɛnduma nɔ lamɛɛlu lean ma co kuŋndo, ma co tindian heeloo háá o halataala.

¹¹ Le tùú kɔɔn nɔmndon o helɔɔ coocoo a volio-o, le tùú bál nɔmndo co kɔlan a pangeloo-o, paalen a paangei sim kpɛ́.

¹² Nɔm Mɛlɛka, a co lɛŋnden balɔɔ a hiilɛi, a co vanaa-mangalaa-isɔɔa pesio a labɛngu a kɔltuwvo.

¹³ A fula le vanaa nɔmnda ciindiaa, le vana n pɔla-o baŋaa. A yɔl masa yungu vanaa kɔlvesɛiya, má tɛɛmbuu ndu few-few.

¹⁴ A buli simlacia yaamɔaa ndaa bolle a kɔɔn ndan nda pila-on. Vanaa kan, à va hunɔɔ ikpɛ́ɛ́nɛ̀nɛ̀i maa hoeyii fùkù-fùkù le naa sɛŋio fásàn. À va yoondiaala kɔlkɛndɛlan mɛɛ vanndo viannun o bɛ̀mɛ́lta ndɔlan le vana bala fondoo tolɔɔ coo nuaa yɛ.

¹⁵ Nɔm Mɛlɛka, a buli nɛiyo o mɛmma ihɛllan nin a soa nɔmnda, o mɛmma ihɛlma co biiŋɔnndo yongban-yongban-ndan nin pɛɛn.

¹⁶ Ya, i tuei vooko-vooko kon mí yɔŋnun yoloma-yoloma. Cɔcɔn ɲiiya ya kpà-kpà, mí paalan la sia ya o n'dial, I co ɲiiyaa tuŋ, i co nɔla kpeŋanndo le. I co cumndo háá mì ce paale dɛnɛ palaalen, paale naa n kɔ delnin vanaa co naa delɔɔ coo-a coo len.

¹⁷ Vooson yendu lɛnin te few, rɛsɛnnda tumndan la kum ndɛnin rɛsɛnndon te. Olivieela tumndan la ve lɛnin komɔɔ le, ɲɛ-ɲɛ ve lɛnin naŋɔɔ o yondola valtan nin te. Saa cuunin o hèélan nin, mì nawva cuu o vɔ̀lɛ́lan nin.

¹⁸ Kɛ ya ya, i dɔawnunnin ɲaale o Mɛlɛka nin, mì viow kponyoo o Hala vana ciindiaa nuu nin.

¹⁹ Mɛlɛka, o co Maalii nuu-o co yoomuma nian ni. O siinguu pelun maa pelun kial, mò tosa mí va kelaa o pembon coo. Condei he fula o sɛbɛ simlacinɔ vanaa n'condua nin. A ɲɛ-caa iyoo nda soli ndi ni.