Habakuk 2 - BII BILA

¹ Ya, i vanin o fonda ni cumulaa, mì sim cumullo o kpakio coo le sinaa ɲɛ Hala dimulnin ya-o, a le sinaa mɛɛ o mululnin ya a cɛɛŋɔnnda nilan o kɔɔ yɛ.

Muli Hala yɔngu-o: vana yongaa tiwnin ba le

² Mì Mɛlɛka mulul-la aa: «Sɛva o ya co nɔm cɔmndo-o, sɛva ndu o pɛngɔn coo le mɛɛ vana tiwba ndu dimio vakpa yɛ.

³ Kani telen vundulen nden le peelunnin-ndo co nin o tuaa, o co nin kpɛɛlun le tiiyaa, o venin sɔɛi yom lɔ́ɔ́ le. Hali, ɲɔɔ viow bɛɛ mɛ̀ɛ́-mɛ̀ɛ́, nɔm calnun ka sii, ma cum. Kani fɔ mì sɔɛi ken hun peelun kangalan.

⁴ Vana nɔ tuula vɔɔnndan-ndo pɛ a yongaa ca, yiyannda ndɔlan la sendu le, kɛ vana sandaa vanin yoomu le laalan ndɔɔ.

⁵ A toɲa, mɔiyan ma pala vana: vanaa yongaa nɔ pɛngi le, yeemɛi ndɛi cuu lɔ́ɔ́-lɔ́ɔ̀ le. Te ciee-piɔ́m sanga pɛ a vanvílɛ́iya, mɛɛ nda bɛɛ a sanganin a vannda delɔɔ coo le nda siinguuo cɛa ndaa.

⁶ Vanaa nda bii kan-nda kpede simulnin nda, mà dɔw nda danga, mà dimul nda aa: «Dangaa co le niaa! La co caanda kafalan tosallo, mì la va ɲɛ-sɔlaa ndaa cuungiaa, mì la va vɛlɛ hiovɔɔ laci a vannda delɔɔ coo. Telen kuɛɛ niaa mal-lɛnin dɛnndan-ndan?

⁷ Vanaa niaa del coo-a hinulnin niaa maa mɛɛ vana kueo kɔa suukoo nuaa yɛ, mì nda bɛɛ poondiaa ɲɛm niaan.

⁸ Le tùú niaa poondiaa lɛŋii bɔɔ-bɔɔ ɲɔɔn o laba-o, niaa bɛɛ, lɛŋii tɔ̀ɛi poondiaanin ɲɛm niaan le vanaa niaa diw-va, le kafala niaa tosa o lɛŋnden nin-ndan a le delɔɔ niaa del kobio a vanaa co lenin-nda coo-o.

⁹ Dangaa co le niaa! La co ɲɛm pilan cɔwviaa a kafalan le kɔlan cɛila niaalan tangullo nɛɛ kɛndɛ-kɛndɛa yɔŋii dɛnɛ palaa komal niaa.

¹⁰ Tuula niaalan kpede la co niaa pila mingulɔn, mì siɛmbulan la bii vanaa niaa. La va yiyanndo maa la diw pɛ vannda taw, la sɔla baŋaa, kɛ nduyɛ, ken co niaa dɛnɛ palaa yɔngoo ni.

¹¹ Hali cìì cɛiye bɛɛ yondanin, mì toulen le saala sɔɛi ken le dɛnnda niaalan cɔɔmuuo.

¹² Dangaa co le niaa! La co delɔɔ coo le kobilan kilaa, mì la va vannda diwvo le lan tangullo.

¹³ Lelan Mɛlɛka-Nɔ-Kpaayaa-Kpow-vo co tosaa ni mì ɲɛ-sɔlaa vannda co ŋɔu o yin, mì vanaa bɔɔ-bɔɔ va sanga fondoo fúú.

¹⁴ Kani vannda sinanin biilu Mɛlɛka-o mò hiow ba,

¹⁵ Dangaa co le niaa! Le niaa vanaa co puapilɛa niaa mɔiyan keo le kolɔɔ-a, a le niaa vanaa co man talaa le caanda koesio háá mì ma bii nda, haliko mi la va a nda-a.

¹⁶ La cii bɛɛle va le niaa len tɛɛmbuu, siɛmbulan la vanin le niaa. Mɛɛ niaa bɛɛ, la kol mì la fula tumnda fondo! Mɛlɛka co niaa lɔɔ a kɔl ndɔ tuwvo, mì bɛɛle niaalen le siŋnun siɛmbulan.

¹⁷ Dɛnnda vɔɔnnda niaa tosa Liban-ndan la mingulunnin niaa pila: la diw visia mí la tɛɛmbuu lɛŋnden, kobilan a vanaa va lenin-nda kpow.

¹⁸ La co cilinndon teengiaa, mì la va tuuliaalan toosiaa a mun le vannda còòlan dimullo. Piɔmndo suu le, o kpeŋan a ba ndɔ le, le yɛɛ mì la tiindan ndu? Ɔ́ɔ̀ kpeku piɔmndo solul vana-o?

¹⁹ Dangaa co le niaa! Niaa co yɔm nda sɛl-lo dimullo aa: «Cɔn»-nda, mì la va vɛlɛ pow nɔla isɔɔ loo dimullo aa: «Cɔn». O kɛ́-kɛ̀ kindi vana kɔl te, vana yikpa bɛɛ nda a sianion te kon te a volion, sanga fondoo fúú.

²⁰ Mɛlɛka caando co lende le, o co o cɛi ndɔ diandaa nin, lɛŋnden kpow le bɛnda mì le mei ndu o hɔl.