O Kandɔɔ 9 - BII BILA

Kpema Hala yiilu Noe-o

¹ Mí Hala dɔaw Noe nda poaa ndɔa duaa, mó dimul nda aa: «La naŋ ipúlú, la kuí mì la pei lɛŋnden ca.

² Visia bɛndua a à pɔmbɔa o lɛŋnden coo, yowva, visia sasun lɛŋ-nda a suwva o peelo kpow a nɔnin siòòŋii niɛi. Niaa o ba bɛngu nda vanin ni.

³ Ɲaa yoomaa co kelaa o lɛŋnden coo-a kpede vanin ɲɛ niaa diaa ni. Mɛɛ ya yɔngu niaa bil kiyɛiyo a yɔmii koamɛi le dioo yɛ, lende koni ya yɔngu vɛlɛ niaa ɲaa yoomaa kan ni.

⁴ Kɛ nduyɛ, la dia vision a yoomoo lenin te, koovan pɛɛn.

⁵ Le kooma niaan yɛ, i ɲunanin konaa le man, kani yoomu niaa co kon ni. Visi oo visi dii pɛ vanacieo, i ɲunanin ndu ɲɛ vem ndu ken tosaa-o, vanndacieea bɛɛ, vana-vana dii pɛ vanacieo, i ɲunanin ndu le kɔlɔ o tɛɛmbuu yoomu vanaciee co puapilɛ ndɔɔ-o-o.

⁶ Kani vana soli pɛ vanacieo koovan, ndu bɛɛ vanacieo sòli ndu koovan. Bau a velan ya Hala-o ya cɔw vanacieo ni.

⁷ Le niaa yɛ, la naŋ ipúlú, la kuí taw mì la tiw o lɛŋnden coo sɔ́.»

⁸ Mí Hala soaa vɛlɛ o Noe nda poaa ndɔa lo, mó dimul nda aa:

⁹ «Kandɔɔ a niaa pila, kɔ bii a cuavaa niaa imamaa, le fɛɛn a fɛɛn, i yiilu niaa hau kpemaa.

¹⁰ Kpemaa ho yiinun vɛlɛ le ɲaa yoomaa co niaa ikɛi-ya kpow: yowva, cɔlua, visia yondoa, ɲɛ-ɲɛ yoomaa fula o dɛ̀ndɔ̀ɔ́ nin.

¹¹ Kpema yiilun niaa-o co hoo ni: le fɛɛn a fɛɛn nin, mɛnndan ma tɛɛmbuu lɛnin ɲaa yoomaa o ceendo coo le. Mɛmma bɛnduma celen ma mel-lɛnin kpundɛ vaa nuaa le.»

¹² Mí Hala cɔɔlu vɛlɛ dimi aa: «Le fɛɛn a fɛɛn, te vanacieo co vɔ pɛ yoomu o ceendo coo, tɔɔmasele kpema ya yiilu niaa a ɲaa yoomaa-o co hoo ni:

¹³ I kɛsi ninginangaa coocoo, ndu vanin tɔɔmaseloo le loonɔnndo a kpema ya yiilu niaa-o ni.

¹⁴ Lɔ́ɔ́-lɔ́ɔ̀ ya cuungiaa pɛ yumbuyumboo coocoo, mì piɔɔ hel, te ninginangaa fula pɛ,

¹⁵ i loonun dɔ́ɔ́ a kpema ya yiilu niaa cuàà n'vanndaciee a ɲaa yoomaa kpow-vo, kpema kon co hoo ni: mɛnndan ma tɛɛmbuu lɛnin ɲaa yoomaa o lɛŋnden coo le.

¹⁶ Ninginangaa hini pɛ o yumbuyumboo coo, mì tofa ndu, i loonun dɔ́ɔ́ a kpema ya yiilu ɲaa yoomaa o lɛŋnden coo le fɛɛn a fɛɛn-ndo.»

¹⁷ Mí Hala cɔɔlu sondo mingi o sɔɛi he coo, mó dimul Noe aa: «Ninginangaa co tɔɔmasele kpema ya yiilu ɲɛ-ɲɛ co yoomu o ceendo coo-o ni.»

Poaa Noe-a

¹⁸ Poaa Noe-aa fula o dɛ̀ndɔ̀ɔ́ nin-nda va Sɛm, Ham a Yafɛt ni. Ham yɔŋnun fuɲaa Kanaan ni.

¹⁹ Poaa yaa Noe-a yɔŋnun kan ni, nda kui nuaa ni mí lɛŋnden le pia cá a vanndacieea.

²⁰ Noe kandu lɛŋnden vàá ni, mó soli nakɔ n'rɛsɛnndo.

²¹ Paale pilɛ, mó kol mɔiyan, mɛɛ má bii ndu, mó yungan pulee, mó hinin tum fondo o cɛi-kola-toandaa ndɔɔ nin.

²² Mí Ham po ndɔ, fuɲaa Kanaan, kɔ komal ndu ihini tum fondo fúú, mó kɔ dimul Sɛm nda Yafɛt, nda va o bɛ́ɛ̀.

²³ Mí Sɛm nda Yafɛt cua doma bɛndoo, má handun o lacongú, má muli kɔɔlan, má luɛi a makɔɔ o cɛi-kola-toandaa fuɲa nda-o nin, má kuumbuu doma bɛndu kon ndu coo. A tofa nɛɛ fuɲa nda va ihini-a le, yɔŋii ndáà cɔ ndu tum fondo.

²⁴ Mɛɛ mɔiyan má kiolu Noe o hɔl, mó tuɛi ɲɛ Ham po ndɔ tosal ndu-o.

²⁵ Mó dɔaw ndu danga aa: «Dangaa co le Kanaan. O vanin o cɛle cɛa puapilɛa ndɔa bɛngu.»

²⁶ Kɛ mó dɔaw Sɛm nda Yafɛt duaa aa: «Biiloo co le Mɛlɛka, Hala Sɛm-ndo pɛɛn. Màá Kanaan siŋnun cɛ Sɛm-ndo!

²⁷ Màá Hala kui lɛŋnde Yafɛt len, mò va icali o cɛila-kolala-toandaala Sɛm-ndan bɛngu! Màá Kanaan siŋnun cɛ ndaa fɔ́!»

²⁸ O kpundɛ mɛmma bɛndu kon kɔɔli, mí Noe cii vɛlɛ yoomu vɔsilan kɛmɛ leyáá a beleŋuɛɛnu.

²⁹ O tosa yoomu o lɛŋnden coo vɔsilan kɛmɛ leŋɔmahiɔɔlu a beleŋuɛɛnu malan o vu.