O Kandɔɔ 8 - BII BILA

Noe fula o dɛ̀ndɔ̀ɔ́ nin

¹ Mí Hala loonun a Noe a visia yondoa, visia cieeninnda a á ɲɛ-ɲɛ va Noe ikɛi o dɛ̀ndɔ̀ɔ́ nin. Mó cuu hoeyii fùkù-fùkùei o lɛŋnden coo, mí mɛnndan ma kandu velaa.

² Mí soonnda mɛnndan ma va fulaa nin lɛŋ-ndan la baŋul, mí halataalaa bɛɛ kindan, mí piɔɔ viangu.

³ Mí mɛnndan ma kandu tolɔɔ o lɛŋnden coo ma pɔm-pɔmbɔ. Mí ma va velaa o palɛi kɛmɛ a beleŋuɛɛnu bɛngu.

⁴ O paale tɔ́ a leŋɔmmɛwndɔlen coo, o paangii ŋɔmmɛwndɔɛi nin, mí dɛ̀ndɛ̀ bɛndu kon kundun o pembon Ararat bollen, mó sim ndon.

⁵ Mɛnndan ma lo kɔlan a velaa háá mí paangii tɔ́ndɔɛi tiiya. O paale tasele paangii ken, mí pembon fula bolle muɲɛ́ɛ́-muɲɛ́ɛ́.

⁶ Mɛɛ palɛi tosan belehiɔɔlu, mí Noe kumbi dio-pɔmbɔ o tosa o dɛ̀ndɔ̀ɔ́-o.

⁷ Mó soli basabasakoendoo lon, mó mal ndu. Basabasakoendoo kɔlan, o viw le mó muungu o dɛ̀ndɔ̀ɔ́. Mɛɛ mì vanáà cum-ndɔ ɲɛ-pɔmbɔ le mɛnndan velaa o lɛŋnden coo.

⁸ O kon kɔɔli, mó soli vɛlɛ poonpoondo le sinaa te mɛnndan maa vela nin.

⁹ Kɛ poonpoon kon kɔ sɔla fonda calaa le, kani mɛnndan ma va vɔ o lɛŋnden kpow coo. Mó muungu Noe ikɛi o dɛ̀ndɔ̀ɔ́ nin, mí Noe siɛndi baa, mó bii ndu, mó luei ndu o dɛ̀ndɔ̀ɔ́ nin.

¹⁰ Mɛɛ nda cii palɛi ndii ŋɔmmɛw o kon kɔɔli, mó soli vɛlɛ poonpoon kon, mó mal ndu.

¹¹ Mí poonpoondo muungu ndu o ibuŋ icɔllo a peele kiyɛile yɔm oliviee o icɔcɔ. Mí Noe sina dɔ́ɔ́ maa mɛnndan ma kandu tolɔɔ.

¹² Má tosa vɛlɛ palɛi ŋɔmmɛw, mó soli poonpoondo, mó mal ndu. Kɛ poonpoondo muungu lɛ ndu o ibuŋ te.

¹³ Vɔsi Noe suili vɔsilan kɛmɛ leŋɔmpum a ò pilɛ-o, paale tasele vɔsi kon, mí mɛmma man ma vela o lɛŋnden kpow coo. Mí Noe faŋa yindɔ ndóò handu o dɛ̀ndɔ̀ɔ́ coo-o, mó tofa o bɛ́ɛ̀, mó ca maa lɛŋnden le vesa.

¹⁴ O paale bidiin a leŋɔmmɛwndɔle paangii diinndɔɛi coo, mí lɛŋnden le vesa sɛ́ɛ́n.

¹⁵ O kon, mí Hala dimul Noe aa:

¹⁶ «Fula o dɛ̀ndɔ̀ɔ́ nin a laa nɔm, a poaa nɔmnda a á laandaa ndaa.

¹⁷ Soli visia co nɔm ikɛi lon-nda kpow: yowva kpede, visia bɛndua a à pɔmbɔa faw, haliko ma sɛŋin o lɛŋnden coo, mà kui.»

¹⁸ Mí Noe fula o dɛ̀ndɔ̀ɔ́ nin nda laa ndɔ, poaa ndɔa a laandaa poaa ndɔa kan.

¹⁹ Mó soli vɛlɛ visia, yowva a ɲaa yoomaa pɔm-pɔmbɔa sasun lɛŋ-nda kpow a ŋiɔn-ŋiɔnda.

²⁰ Mó cɔaw fonda-loamaa-lasálàá le Mɛlɛka sálàá solullo lecoo. Mó cua visia diandaa yɛ́-yɛ́a a yovaa diandaa yɛ́-yɛ́a, mó soli sálà loamaa a cɔlua kan o fonda-loamaa-lasálà kon coo.

²¹ Mɛɛ Mɛlɛka tuei hoeyii kɛndɛi sálà kon cun, mó dimi aa: «I dow lɛnin lɛŋnden danga le kela vɔɔn vanacieo le. Kani cɔn o felengiyɛi nin, yiyan tosaa yɔŋ vɔɔndo kposon co ndu o kɔl ni. I tɛɛmbuu lɛnin ɲaa yoomaa kpede mɛɛ ya tosa o laan nuaa yɛ le.

²² Te lɛŋnden le co vɔ pɛ, ciɛɔn vanin saŋnɔnndo a kownɔnndo, hoeiye a hangullo vanin, vɔɔlen a sialten le vanin, paalen a ɲumndan ma vanin. Ɲɛm mun pɛnginin tosanndo le few.»