O Kandɔɔ 7 - BII BILA

Noe luɛi o dɛ̀ndɔ̀ɔ́ nin

¹ Mí Mɛlɛka dimul Noe aa: «Nɔm a yungu nɔmndo kpow, la luɛi o dɛ̀ndɔ̀ɔ́ nin, kani nɔm pilɛ kpé ya ce vana sandaa ya o hɔl o vannda ha kpow tɛɛn ni.

² Cua visia diandaa súúlan kpow, súú oo súù visia tɔ́ a à hiɔɔlu: a piaandua a ŋɔmmɛw a laandua a ŋɔmmɛw. Kɛ o visia dindu le-a nin, o piaandoo a o laandoo koni n bɛnda ma cua o súú oo súù nin ni.

³ Le yowva yɛ, cua yowva tɔ́ a à hiɔɔlu o súú oo súù nin: a piaandua a ŋɔmmɛw a à laandua a ŋɔmmɛw, haliko mi súúla ndala yɛ́-yɛ́la lan bɛɛ la sɔla cindaa le lou yoomu ma kui o ceendo coo.

⁴ Kani o lo palɛi ndii ŋɔmmɛw mì tuisi piɔɔ bɛndu-bɛndoo o lɛŋnden coo, mò lo siaa háá palɛi belehiɔɔlu a malɔ belehiɔɔlu, mì tɛɛmbuu ɲɛ-ɲɛ co ɲɛ yoomaa.»

⁵ Mí Noe tosa ɲɛ-ɲɛ Mɛlɛka dimul ndu le tosaa.

Mɛmma bɛnduan ma hin o lɛŋnden coo

⁶ Tuma mɛmma bɛnduan ma hin kon o lɛŋnden coo-o, Noe ndóò nɔ vɔsilan kɛmɛ leŋɔmpum.

⁷ Mó luɛi o dɛ̀ndɔ̀ɔ́ nin a laa ndɔ, a poaa ndɔa a á laandaa poaa ndɔa, yɔŋii ndáà lo o mɛmma kpundɛma man nin.

⁸ Mí visia dendu-a, a dindu le-a, yowva a visia pɔmbɔa sasun lɛŋ-nda kpow

⁹ a hun o dɛ̀ndɛ̀ bɛndu Noe-o a ŋiɔn-ŋiɔnda: o piaandoo a o laandoo, maa mɛɛ Hala pila ndóò dimul Noe yɛ.

¹⁰ Mɛɛ palɛi ŋɔmmɛvii ken i cuu, mí mɛmma bɛnduan má hun o lɛŋnden coo.

¹¹ Vɔsi Noe suili yoomu o ceendo coo vɔsilan kɛmɛ leŋɔmpum-ndo, mɛɛ paangii diinndɔɛi tiiya palɛi tɔ́ a i ŋɔmmɛw, mí lɛŋnden le tɛɛndiaa, mí mɛnndan ma fula nɛɛ-nɛɛ ka, mí halataalaa kumbin,

¹² mí piɔɔ kandu siaa o ceendo coo, mó lo siaa háá palɛi belehiɔɔlu a malɔ belehiɔɔlu.

¹³ Paale len Noe luɛi o dɛ̀ndɔ̀ɔ́ nin nda laa ndɔ, poaa ndɔa yáá-a Sɛm, Ham a Yafɛt, a laandaa poaa ndɔa ni.

¹⁴ Mó luɛi vɛlɛ a visia yondoa, a visia cieeninnda súúlan kpow, visia sasun lɛŋ-nda, yowva, kamballa a visia pɔmbɔa kela lɛŋ-nda.

¹⁵ Mí ɲaa yoomaa súúlan kpow a kɔa a ŋiɔn-ŋiɔnda Noe ikɛi o dɛ̀ndɔ̀ɔ́.

¹⁶ O ɲaa yoomaa súú oo súù nin, mí o piaandoo a o laandoo luɛi o dɛ̀ndɔ̀ɔ́ nin maa mɛɛ Hala pila dimul Noe le tosaa yɛ. Mɛɛ nda luɛi kpow, mí Mɛlɛka pila kinda dioo Noe kɔɔli.

¹⁷ Mí mɛnndan ma lo hunɔɔ háá palɛi belehiɔɔlu o lɛŋnden coo. Mí má hun taw-taw, mí ma cua dɛ̀ndɔ̀ɔ́, mó hel lecoo.

¹⁸ Mɛɛ mɛnndan ma va hunɔɔ a piɔu o lɛŋnden coo yɛ, lende koni dɛ̀ndɔ̀ɔ́ va cɔnɔnndo lecoo ni.

¹⁹ Mɛnndan ma lo hunɔɔ háá, mí pembun bɛndun co o lɛŋnden coo-on kpow n mɔɔva lenin.

²⁰ Mɛɛ pembun mun mɔɔva, mí mɛnndan ma hel vɛlɛ lecoo le dunndo tɔ́ a leŋuɛɛnu.

²¹ Mí ɲaa yoomaa o lɛŋnden coo kpow a vu: kandɔɔ a yowva, cɔlua, visia yondoa, visia pɔmbɔa kela lɛŋ-nda, kɔ bii a vanndacieea.

²² Mí ɲaa yoomaa hoeiye va fulaa o milin-nda kpede, a va o lɛŋnden coo-a, a cuu vu.

²³ Nuaa Hala cii ɲaa yoomaa va o lɛŋnden coo-a ni, kandɔɔ a vanndacieea, visia, visia pɔmbɔa kela lɛŋ-nda, kɔ bii a yowva, mí ɲɛ-ɲɛ basun o ceendo coo selemenden. Fɔ Noe a ɲɛ-ɲɛ va ndu ikɛi o dɛ̀ndɔ̀ɔ́ nin a lo yoomu ni.

²⁴ Mí mɛnndan ma lo mahunaa lende o lɛŋnden coo háá palɛi kɛmɛ a beleŋuɛɛnu.